Mora’g lisud na gyud nga maka-angkon ug hustisya ang 6 anyos nga si Ellah Joy ingon man iyang mga ginikanan nga sila si Renante ug Ligaya Pique.
Kuli kay ang mga bata nga kauban sa pagpanglakaw ni Ellah Joy sa Calajoan Minglanilla niadtong pagdagit kaniya pulos dili na katoho-an sa korte ug mao kini ang pinakasakit nga kamatuuran tungod sa palpak sa kapolisan.
Unang set of suspects ug gipangdakop sa kapolisan ug gilibre sa kasong kidnapping with homicide mao sila si Karen Esdrelon kinsa usa ka Sugbuanong nurse ug iyang uyab nga Norwegian national nga si Sven Erik Berger.
Ikaduhang hugna nga mga suspetsado mao sila si Bella Ruby Santos ug iyang uyab nga British national nga si Ian Charles Griffiths. Si Bella bag-o lang gilibre ni Judge Ester Veloso via granting sa demurrer to evidence.
Posible si Griffiths maoy sunod nga malibre kana kung mo-submit siya sa jurisdiction ni Judge Veloso pinaagi sa pagpa-arraign tungod kay gikiha siya isip co-conspirator ni Bella.
Akong tan-aw maka-kuha lang tingali ug hustisya ang bata ug iyang kabanay kung usa o duha nga naka-apil sa pag-abduct, makonsensiya ug moangkon sa krimen ug motestigo pabor sa gobyerno batok sa mga prime suspects sa linoog nga krimen.
Ang pangutana, mao, kung duna pa bay magpaka-hero ug andam nga mosakripisyo sa ngan sa hustisya?
Kung dili gyud makaya pagsulbad sa kapolisan kining maong krimen nga nagpabiling tanghaga, kanus-a man molihok ang taga National Bureau of Investigation kon NBI-7?
Kung duna may reinvestigation nga himoon sa kaso, mas maayo tingali nga palawman sa mga imbestigador kay nganong sa tanang mga bata nga nanglakaw si Ellah Joy man gyud ang gi-kidnap.
Sa babaye nga abductor ug misabak ni Ella Joy unang nadunggan sa mga testigo nga nangutana sa pangan sa mama sa biktima ug asa nagpuyo.
Unsa may motibo sa mga midagit ni Ellah Joy? Wa kahay atraso ang mga ginikanan ni Ellah Joy? Dili gyud kaha ang mga ginikanan sa bata maoy target ug maoy gipanimaslan?
In fairness ni Renante nga amahan, iyang gibalik-balik kaniadtu nga wa gyud silay kontra.
Hinoon possible man nga biktima lang sa tripping sa mga assailants si Ellah Joy.
Pero ingkaso kung dunay newly discovered evidence batok nilang Bella Ruby dili pa ba igong sukaranan nga itaral siya pagbalik taliwa nga malapas ang law on double jeopardy ug ang rules on criminal procedure sa demurrer to evidence?
Daku gyud kaayong black eye sa PNP kining desisyon ni Judge Veloso nga gipaagi ang pag-absuwelto ni Bella Ruby sa granting sa demurrer to evidence nga wa na ipa-agi sa full-blown trial.
Dili lang dakung sagpa ngadto sa PNP ang desisyon, lakip na sa tibuuk puwersa sa prosecution panel kay napakyas sila pagkonbinse sa korte nga credible gyud kaayo ang bata nga testigo.
Gikasab-an pa sila sa huwes nganong wala i-presentar ang pulis nga nag-imbistigar sa batang testigo aron unta madetalye nganong sa 15 ka mga pictures nga gipakita, kang Bella man gyud ang gi-pick-up.
Hadlok ang prosecution nga sayong mabunggo sa korte nga gitudloan lang ang bata sa pagtestigo?
Kung dili pa lang ligdong pagka-huwes si Judge Veloso daghan na kaayong dautang komentaryo ug pagkondenar ngadto kaniya.
* * *
Niadtong Sabado sa hapon atul sa among programang ”Dialogue on the Air” sa DYSS Super Radyo among gituki uban sa mga representante sa Department of Education (DepEd-7), Department of Social Welfare and Development (DSWD-7), Children’s Legal Bureau (CLB) ug mga psychologists ang isyu kabahin sa mga kaso sa bullying sa mga tunghaan ug corporal punishment subay sa kamatayon sa estudyante sa grade 3 didto sa Bantayan.
Akong nasabtan nga isolated case lang kadtong maong hitabo sa Bantayan kay segun sa mga kadagkuan sa DepEd, mga principals ug guidance counselors dili gyud alarming ang bullying incidents dinhi sa Sugbo bisan sa mga dagku’g population nga mga tunghaan sama sa Abellana National School, Lahug, Apas ug bisan sa mga private schools.
Si Dr. Isaiash Wagas, Division Coordinator for Private Schools sa DepEd Cebu Province nagkanayon nga sa kinatibuk-an, manageable pa ang kaso sa bullying sa mga tinun-an.
Bisan sa Lapu-lapu ug sa Mandaue Divisions gitug-an nila ni Dr. Marcelita Dignos ug Dr. Robert Gallardo nga way nadawat ang ilang mga buhatan sa kaso sa bullying.
Nagtoo hinoon ang mga opisyal sama ni Alan Pancho sa Cebu City Division nga dali rang mahilot ang mga problema sa level sa mga teachers-in-charge ug sa mga guidance counsellors nga sagad mga psychologists.
Gisugyot ni Dr. Emmanuel “Tata” Hernani usa ka psychologist nga kinahanglang buwagon gyud ang opisina sa principal ug guidance counselor sa matag tunghaan.
Kini aron makapadayag gyud ang estudyante nga moreklamo ug way tihik-tihik nga mohatag sa kompletong detalye.
Matud ni Hernani nga dili gyud ganahan ug magduha-duha ang mga tinun-an pagreklamo kung anaa ang presensiya sa principal.
Alang sa taga DSWD ug taga CLB, ang mga ginikanan gyud maoy mabasol nga way desiplina ang mga anak nga ma-isip nga sipat ug badlungon gyud sa klase.
Apan sila mi-insister nga dili gyud epektibo ang pagpasakit sa bata aron siya ma-desiplina ug matul-id. Mas mo-prefer sila sa counselling.
Pero alang nako, importante gihapon ang pagbakus basta lang makatarunganon.