Nakabangon na ba ang lalawigan sa Sugbo ug ang probinsiya sa Bohol human mag- usa na ka tuig karong adlawa ang kusog nga linog nga mi-rehistro ug 7.2 magnitude?
Kumusta naman ang taga Sagbayan Bohol nga didto ang epicenter?
Akong nahibaw-an nga daghan pa’ng nagbarong-barong didto sa Bohol unya daghan pa’ng mga eskwelahan nga wa ma-adto sa atong mga geologist sa Department of Environment and Natural Resources (DENR-7) aron unta masubay kung luwas ba sa sinkhole ang gibarugan sa mga tunghaan.
Bisan dinhi sa Sugbo wa pa gyud kita makabangon kay ang Cebu City Medical Center (CCMC) wa pa masugdi pagpa-construct gikan nga gipaguba.
Hangtud karon wa pa mahuman pag-ayo ang kampanaryo sa Basilica Minore Del Santo Nino.
Naay atong building sa Cebu City Palace of Justice wa pa gyud ipa-ayo nga unta gamay ra kaayo ang ayum-ayumon kay ang 4th floor ra maoy dagko’g liki.
Gani mayoriya sa atong mga huwes ug mga court personnel nga anaa karon sa Qimonda IT Center gisayangan nga gibiyaan nila ang Palace of Justice.
Ganahan silang mamalik pero wa silay mahimo kay dili tugtan sa mga kadagkuan sa Korte Suprema.
Ang nagpabilin nga nag-opisina sa ground floor mao ang Cebu City Prosecutor’s Office, Provincial Prosecutor’s Office ug ang Public Attorney’s Office (PAO).
* * *
Balik niining isyu sa korte, makaingon na gyud ko nga bulay-og ning liderato ni Chief Justice Maria Lourdes Sereno kay dugay kaayo’ng nakapa-ayo sa Cebu City Palace of Justice.
Wa pa gyud sila’y salig sa findings sa mga experts sama ni architect Ariel Dela Cruz kinsa miingon nga lig-on pa ang tibuok building?
Sama sa akong giingon kaniadto nga nag-usik-usik lang gyud sa kwarta sa gobyerno ang Sereno administration sa ilang pag-abang ug pagpahimo ug mga gagmay’ng courts rooms sa 3rd ug 4th floors sa Qimonda.
Ang gigasto nila nga minilyon sa Qimonda gilahos pa lang pagpa-ayo sa Palace Of Justice, balik na unta kita karon sa normal operation sa korte.
Akoy gisayangan sa kwarta sa judiciary nga migasto ug 36 million sa pagpahimo ug mga temporary court rooms sa Qimonda ug magbayad kitag abang nga tag 14.4 million ang tuig.
Unsa man sab ang gihimo ni RTC Executive Judge Soliver Peras?
* * *
Nakatawa ko sa migawas nga balita niadtong Lunes nga dunay hubog nga mikabayo ug milugos sa iro sa iyang silingan sa dakbayan sa Mandaue.
Kung tinuod man, grabe na gyud ka hubog ang janitor nga Bol-anon kay babaye iyang tan-aw sa iro.
Ambot lang kung wa ba magtumo-tumo ang mga habal-habal driver kay nanghimakak ang suspetsado.
Ang tag-iya sa iro nagtuo man gyud nga nahilabtan iyang buhi kay mibuka ang kinatawo.
Pero basig iro gyud tong tawhana ug nagpatawo-tawo lang. Hehehehe.
Asa man ang pundok sa mga nag-protehir sa katungod sa mga kahayupan?
Way plano nga ipadayon ang pagtaral sa kasong kalapasan sa Animal Welfare Act ang Bol-anon?