Nyor Gamay (NG): Maayo, maayo.
Love Guru (LG): O, dayon, Nyor
Gamay. Dali, mangape ta nianing sinangag nga mais. Nagkasinabot man gud ning akong mga kauban diri nga mag organic kuno mi karong semanaha. Tagai ris Nyor Gamay og tasa sa atong kaping mais.
NG: Salamat. Lain pay ato Guru, wa ba ka mabalaka aning Ebola?
LG: Wa man kaayo. Tingali kon buot nang papason sa labaw nga makagagahum ang katawhan, usa ang Ebola sa iyang pamaagi paghimo niani.
NG: Nakuyawan man hinuon kog samot sa imong gipanulti, Guru.
LG: Uy, sorry kaayo Nyor. Wa baya ko mosulti niadto para paghadlok kanimo. Medyo fatalist lang ko usahay. Ngano, nabalaka diay kag maayo ning sakit nga gikan sa Africa?
NG: O Nyor, kada nako tan-aw sa internet mura mag nagsugod nag kamang kining maong sakit sa laing mga continent sa kalibutan. Mao nga dia unta koy isugyot nga five year plan nga akong ipada sa United Nations.
LG: Hala lingkod sa kuno be ug suginli ko nianang imong five year plan.
NG: Salamat Nyor. Mao kini ang akong gidamgong mahitabo sa year one. 1. Sugdan pagtukod, ginamit ang salapi sa mga dagkong western nations, ang pinaka-dakong ospital sa kalibutan didto dapit sa Africa diin ang unang atimanon niani mao ang sakit nga Ebola. 2. Magsugod na paghimo og low cost robot ang Japan nga maoy mo dispose sa mga garment nga gamiton unya sa mga mobantay sa mga pasyente. 3. Maghimo ug mag stock na og five years supply sa mga garment ang mga dagkong factory sa kalibutan. 4. Magsugod na silag test sa posibleng mga bakuna batok ning maong sakit. 5. Maghimo nag syllabus ang United Nations sa poultry ug hog raising sa Africa ug ingon man sa pagpatubo sa mga tanum nga ilawg niani para dili na sila magpunay og kaon ug unggoy ug kwaknit nga maoy gi-ingong nagdala sa maong sakit. Magtrain na og mga Filipino volunteers nga tagaan og five-year contract.
LG: Murag mokaging ang UN anang imong plano Nyor. Murag motuo kas campaign slogan nga –together we can make it happen. Pero, nganong Pinoy man maoy ipada nimo ngadto?
NG: Nyor ang mga Japanese andam magpakamatay para sa ilang nasud. Ang Pinoy dili. Ang Pinoy andam magpakamatay alang sa iyang pamilya. Kon mo offer kag five-year contract nga katulu-on ang minimum wage murag ang Pinoy ra sa mga second speakers of English ang mosukol. Kon saaran mo sila nga bisag mamatay pa sila sa panarbaho, mahatag gihapon sa ilang pamilya ang gisaad kanila, daghan kaayo ang mo volunteer.
LG: Bilib ko nimo Nyor. Pero murag dili pa kana tumanon nila Nyor. So kupti lang sa ang imong year two to year five plan.
NG: Ngano man Guru?
LG: Kay matud pas usa ka medical authority sa New York, ang Ebola infectious pero di tantong contagious. Kay sa 8 million population sa New York, usa ra may nataptan og Ebola. Mas daghan pa kuno ang mamatay sa Flu sa America kon itandi sa Ebola.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
