Di ko kasabot sa atong kapolisan dinhi sa dakbayan sa Sugbo nganong mang-insister gyud pagpasangil kang PO3 Eugene Salingay nga maoy responsable sa mga sunod-sunod nga pagpanulis dinhi sa dakbayan sa Sugbo karong bag-o, nga unta detinado naman kining kanhi pulis.
Unsa may depensa sa kapolisan nga nakompirmar naman nga niadto pa’ng Setyembre 8 nabalhug si PO3 Salingay didto sa Misamis Occidental Provincial Reformatory Jail (MOPRJ) sa Oroquieta City?
Mamasangil sila kang Supt. Eduardson Tagaoc, jail warden, nga gibuhi-an si Salingay aron makapanulis dinhi sa Sugbo?
Gustong ipalabas sa kapolisan nga si Salingay mag-helicopter back and forth sa Misamis-Cebu nga rota?
Porbida, kung wa moduol sa akoa ang iyaan ning maong kanhi pulis ug mi-insister nga na-priso na ang iyang pag-umangkon, dili makoreksiyonan ug dili mabisto ang palpak sa atong mga intelligence officers sa PNP.
Akong klarohon nga anaa ang akong simpatiya sa kapolisan pagsulbad niining mga sunod-sunod nga pagpanulis.
Apan kinahanglang segurohon nila ang identity sa mga responsable sa pagpanulis aron dili sila kataw-an.
Bilib ko sa pagka-iresponsable ni deputy chief for administration sa Cebu City Police Office nga si Supt. Alet Virtucio kay mi-speculate ug taphaw kaayong namasangil nga posibleng gibuhi-an gyud si
Salingay kay posibleng motukma ang iyang mga fingerprints sa mga nakuha sa mga establismento nga biktima sa tulis.
Maayo lagi kung mapositibo. Pero unsa kaha kung negative sa mga fingerprints si Salingay?
Ang akong punto ba, maayo unta nga sa dili pa mubuka sa baba ang atong kapolisan ngadto sa media kinahanglang na-suportahan na ug konkretong ebedensiya ang ilang teyoriya.
Pagka dakung surambaw kung mamatud-an nga gipagawas-gawas si Salingay sa jail warden aron manulis.
Unsa man gyud ka epektibo ning paagi sa kapolisan nga mopakita ngadto sa mga testigo sa ilang mga file photos sa mga suspetsado sa krimen?
Wa ba abusohi sa kapolisan kining maong practice nga ipa-insister sa mga testigo nga maoy itumbok aron makapanghambog dayon ang kapolisan nga sulbad na ang krimen resulta sa taphaw nga imbestigasyon?
* * *
Nagkinahanglan gyud ug lawom nga imbestigasyon ang giingong paghikog patay pinaagi sa pagpusil sa iyang kaugalingon si PO1 Heidi Garcia niadtong Biyernes a buntag.
Naghikog gyud kaha si PO1 Garcia? O ba kaha gipusil sa iyang suod nga higala nga si PO1 Cyrelle Marie Bayate?
Di ko konbinsido nga naghikog si PO1 Garcia kay dunay duha ka mga gagmay’ng bata. Gawas niini, pulis sab intawon iyang bana.
Wa kaha pusila ni PO1 Bayate ang biktima human siya gihimo-an ug black eye mugna sa ilang away?
Pagkalooy tawon sa iyang duha ka mga anak.
* * *
Insakto gyud si Cebu City Mayor Michael Rama nga nagkinahanglan siya ug budget aron ipalawom, ipalapad ug limpiyohan ang mga kasapaan, kanal, drainage ug uban pa’ng agi-anan sa tubig.
Tinuod dili pang long term solution ang maong lakang sa mayor apan makatabang kaayo kini isip pagpangandam sa panahon kung simbako may kusog ug dugay nga pag-ulan.
Maglaum ko nga subli-on sa mga sakop sa konseho ang paggahin ug P70 million o ba kaha bisag katunga nalang niini aron makapang-limpiyo kita sa mga culvert nga nabuni na sa yuta.
Akong nahibaw-an gikan sa tigpamaba sa DPWH-7 nga si Marie Mignon Nillama nga dunay duha ka mga bag-ong ekipos ang ilang opisina nga mopalawom ug molimpiyo sa bukana sa Mahiga creek ug puwede kining huwam-huwaman sa mga local government units.
Ang pang “long term solution” sa problema apan dugay pa’ng ma-implimintar mao ang insaktong drainage master plan nga kanang drainage nga dagku gyud unya open type nga puwedeng ipahimutang sa tunga-tunga sa atong mga kalsada.
Open type nga drainage aron sayon ra’ng ablihon sa panahon nga dunay makabara nga basura.
* * *
Ang mga representante sa Department of Social Welfare and Development kon DSWD-7 nangangkon nga dili pa gyud masulbad sa hingpit ang problema sa mga biktima sa bagyong “Yolanda” inig tapos sa termino ni Presidente Noynoy Aquino.
Sila si Leah Quintana, tigpamaba, Artemia Degamo ug ubang mga tinugyanan sa DSWD miangkon nga nalangay pag-ayo ang pag-release sa cash assistance kini gumikan kay wa maka-kompleto ang mga LGU pagduso sa listahan sa mga makadawat unya ipa-ubos pa sa validation.
Ang nakaporke unya niini mao nga ipa-mulitika gihapon sa mga kapitan ug mga mayor ang listahan sa mga biktma sa bagyong “Yolanda”.