Breathe

“Breathe, breathe in the air/Don’t be afraid to care”
–Pink Floyd

Ang akong Tiya Mila, 83 ang panuigon, miundang ug ginhawa pag alas tres sa kadlawn sa Byernes. Wala kini siya maminyo ug kanamong dose ka manag-agaw, lima ang nagpabiling single. Tingali diha kami naliwat niya.

Akoy kinamaguwangan namong manag- agaw. Ang ako sang tiya maoy kinamaguwa-ngan sa ila. Ang akong amahan nga unang namatay kaniya maoy ikaduha. Sama kanamong managsuon upat sab sila. Sama sa akong inahan, usa usab ka pharmacist ang akong iyaan.

Didto kos ospital nga iyang gi-trabahuan na admit dihang nahilo kos red tide. Didto sad sa maong ospital namatay ang iyang amahan, akong apuhan nga 98 anyos, namatay dihang wa na kini maka ginhawa tungod sa plema sa baga. Tingali gisugat sa akong lolo ang akong tiya ganinang kadlawn.

* * *
Si Lebron James ug Kyrie Irving sa Cleveland Cavaliers maoy ga-una pag gamit sa “I Can’t Breathe” warm up T-shirt sa NBA. Wala madugay migamit usab niani si Derrick Rose sa Chicago Bulls. Dayon si Kobe Bryant ug hapit tanan sa LA Lakers migamit usab niani.

Ang mga pulong nga “I can’t breathe” maoy katapusang gisulti ni Eric Garner nga usa ka taas, tambuk og itom nga tao nga gituohang namaligyag sigarilyong way buhis, dihang gi-bira tuok siyas usa ka police sa New York. Namatay si Garner sa maong insidente ug nga karon lang buwana gihukman nga walay sala ang pulis nga niluok kaniya.
Ang “I Can’t Breathe” maoy battlecry karon sa protesta batok sa racial discrimination ug police brutality.

* * *
Ang lain karong nakapahugot sa ginhawaan sa Estados Unidos sa America mao kining senate report sa ilang nasud nga mibutyag sa mga torture nga gipanghimo sa mga bantay sa Guantanamo Bay ngadto sa mga dinakpan.

Gapungapunga man gud pag ginhawa ang mga Afghan nga binilanggo sa Guantanamo Bay dihang gipuno og tubig ang ilang lawas pinaagi sa water boarding technique nga gilaumang makapatug-an kanila sa mga sekretong plano sa Al Qaeda. Dilang pinaagi sa baba ang pagpasud og tubig sa ilang lawas kon dili hasta sa lubot ning gitawag nilag rectal rehydration.

Nagpungpunga karon ang mga Republican sa ilang senado og kongreso. Gani gitawag nila kining maong report nga usa ka propaganda o paukyab sa mga Democrats.

Nalipay ang China ug ubang galagot sa America ning maong taho kay makita man kini sa kalibutan nga ang America nga giingong gaunang nasud sa pag panalipud sa tawhanong katungod mao man usab diay ang gaunang violator niani.