Waterloo

Ang Waterloo sa ato ispellingon na karon nga Mamasapano. Parehas ra ang ilang buot ipasabot kapildihan.
Ang Waterloo nga apil niadto sa United Kingdom of Netherlands (ug nga karon sakop na sa Belgium) maoy lugar diin napukan ang army ni Napoleon Bonaparte sa France niadtong Hunyo sa 1815. Dihang mibuwag ang Prussia sa coalition sa France naggubat ang duha ka nasud. Napildi sa France ang Prussia apan ang mga napildi nga sundalo niini mipadayag nga buot sila mokuyog sa Anglo Allied army nga nangandam na nga mo ataki sa France. Dihang naka-dungog si Napoleon kabahin niani midisider siya nga ilang sulngon kining maong Anglo-Allied army nga nahiluna sa Brussels mintras wala pa kiniy reinforcement sa mga sundalo sa Prussia ug sa ubang nasud nga nakig-gubat sa France.
Ga-atang sa may bukirang bahin sa dalan paingon sa Brussels ang Anglo-allied army samtang gahuwat sila sa pag-abot sa reinforcement sa Prussian army. Tungod sa ilang maayong pwesto, wala magmalampuson ang army ni Napoleon pag buntog kanila. Ug dihang naabot na ang tropa sa Prussia ni sumbalik dasdas sila ug ilang gigukod balik sa France ang pundok ni Napoleon. Ila kining napildi ngadto hinungdan nga exile nasad pag usab si Napoleon ug nabalik ang hari sa maong nasud sa iyang truno.
Ang maayong pwesto sa Bangsamoro Islamic Freedom Fighters (BIFF) nga naa sa ibabaw sa lapukong sapa nga gikamangan sa mga Special Action Force (SAF) sa atong mga pulis maoy usa sa hinungdan kon nganong wa gyud intawoy round ang atong mga kapulisan sa maong ingkwentro sa Mamasapano, Maguindanao.
Ug tungod sa way klarong coordination mi-reinforce na hinuon ang Moro Islamic Liberation Front (MILF) nga ato untang ka peace talk sa pundok sa BIFF. Murag miniscule nga Waterloo ang nahitabo. Hinungdan nga 44 ka SAF ang nawad-an sa kinabuhi.
Maong mahimo ta usab nga tawgon ang Waterloo nga usa ka pagdasdas sa usa nga may kuwang sa kasinatian. Kon masayran ang tumong sa SAF niadtong maong operation, mao ang pagkuha sa duha ka terrorista, usa kanila may kalabutan sa pamomba sa Bali nga si Zulkifli bin Hir alias “Marwan.” Ang usa mao ang Filipino bomb maker nga si Abdulbasit Usman. Wala diha si Usman apan napatay sa SAF si Marwan. Ang nakapait lang kay gasinukliay na sila og bala migawas ang tibuok katilingban sa BIFF nga mipauwan kanilag bala. Ug basig na alimungawan usab ang pikas campo sa MILF mipa-uwan usab kinig bala sa SAF.
Ang kompyansa bisan sa kakuwang sa kaalam maoy hinungdan sa kaparotan sa atong SAF.
“When a general, unable to estimate the enemy’s strength, allows an inferior force to engage a larger one, or hurls a weak detachment against a powerful one, and neglects to place picked soldiers in the front rank, the result must be ROUT.” Nagkanayon si San Tzu sa Art of War. Mao ni ang nahitabo sa operasyon sa SAF sa Mamasapano.
Sa panahom sa uban, ang suspendidong general maoy nagpalihuk ning maong operasyon sa hilum ug bisan paman sa ka peligro sa maong sitwasyon, wala makig koordinar sa uban kay buot angkonon niani ang garbo ug ang ganti sa ulo ni Marwan nga $5 million.