Nyor Gamay (NG): Nyor nakakita kas senate hearing adtong Huwebes?
Nyor Daku (ND): O Nyor. Maayong pagkapasabot ni MILF chief negotiator Mohagher Iqbal kon nganong ang kultura sa Muslim Mindanao ganahan magdada og armas.
NG: O. Nakakita ko adto Nyor. Kadtong niingon siya nga sukad sa ‘50s silang gihasi sa gobyerno ug nga kon moreklamo sila walay padulngan ang mga legal action nga ilang ipasaka mao nga agig panalipud ila na lang gipang-armasan ang ilang kaugalingon. Luoy baya sad diay sila Nyor no? Pero nganong mag-unay ra man sad silag patay? Naa may siging gubat sa mga feudal lords didto?
ND: Mao sad nay after effect kon daghan namong armas. Unsaun man nimo ang imong pusil ug ArmaLite rifle kon di nimo pabuthon. Pilay pagkablit. Ang kakuwang sa law and order sa maong lugar mipalig-on sa position sa mga feudal clans. Na sige na lang silag intramurals sa pinusilay kon kinsay maayong laki nila.
NG: Pero buanga Nyor wa man gyud makasulti ni P-Noy ang iyang Secretary of National Defense nga si Voltaire Gazmin kabahin sa gipang rakrakan nga mga Special Action Force didto sa Mamasapano nga nagkuyog ra man unta sila niadtong tungora sa Zamboanga.
ND: Bak.
NG: Ha? Unsay Bak? Unya si Mar Roxas nga kuyog usab sa presidente didto wa sad makahunghong kang P-Noy nga gipang i-haw na intawn ang atong SAF.
ND: Kak.
NG: Kak? Bak? Bakak? Wa ka motuo nga mitug-an sila sa tinuod kang Senador Nancy Binay?
ND: Gaduda ko nga gapa tanga-tanga lang tong mga kurokongho kay mahadlok sila mosulti nga ilang gisulti-an ang presidente sa maong hitabo ug nga ang presidente way nabuhat niani. Kay kon mo-angkon sila nga ilang nasultian si P-Noy sa maong hitabo ang sunod nga pangutana mao nga kon unsay gibuhat ni P-Noy. Kay kon wa kini gibuhat nahug intawn kini og tanga. Mao nga sila na lay gapa tanga-tanga. Fall guys kon sa Ininglis pa. Either kana or wala gyud silay paki.
Mas concerned sila sa pogi points nila nga didto sila nangimbistigar sa bombing sa Zamboanga.
NG: Unya lain pay ato Nyor. Nganong wa man magdag two way radio sila sa maong operasyon? Nganong ga sige naman lang intawn to silag text? Wa na lang gani manawag. Text lang nang text.
ND: na addict na tingali na sila Nyor.
NG: Na addict sa unsa Nyor?
ND: Na addict sa unlimited text.