Nyor Gamay (NG): Nyor, kon i-sum up nimo sa usa lang ka pulong ang nahitabo sa Mamasapano unsa man kining maong pulong? Miscommunication? Overconfidence? Ignorance?
Nyor Daku (ND): Usa lang ka pulong?
NG: O, Nyor. Usa lang ka pulong.
ND: Kagar.
NG: Kagar?
ND: Sama sa mga granada nga ilang gikarga sa ilang M203 o grenade launcher –kagar.
NG: Nikagar diay Nyor?
ND: Si Superintendent Raymund Train sa PNP SAF mao mismoy niangkon niani. Hapit tanan nga panghitabo nga may kalabutan sa maong lugar mikagar.
NG: Kadtong ilang gi-ingon nga hinay ang signal sa mga cellphone didto? Unsa may nikagar, ang ilang cellphone o ang signal?
ND Ang ga-plano maoy nikagar kay nganong mas nisalig sila sa ilang cellphone kay sa two way radio. O basig nikagar sab ang ilang two way radio mao nga nagpalaban na lang sila sa ilang unli text.
NG: Ug kadtong mga sakop sa army o AFP nga wana lang motabang kay kuwang ang ilang impormasyon kabahin sa pinusilay?
ND: Kagar. Kay kon kuwang ang impormasyon nga gihatag, di mangutana unta sila. Wa tingali unlimited text ning AFP sama sa SAF.
NG: Si P-Noy, Nyor?
ND: Kagar. Pagkadaku ning maong operasyona nganong wa man niya pahibaw-a ang uban. Bisan ang acting Chief na lang unta sa PNP nga si Espina maoy iyang gi-sultian. Sila ra man hinuong Purisima maoy naghunghunganay. Ga advance Valentines maning duha.
NG: Si Roxas ug Gazmin, Nyor?
ND: Kagar. Nakalimot sila nga si P-Noy maoy nisulti kanila kabahin sa Mamasapano mao nga wa nay kinahanglan nga sultian pa nila kini.
NG: Mao ba? So, kinsa man diay di ang iyang confidante nga si Purisima. Murag wa gihapoy salig si P-Noy sa iyang military ang iya rang mga karaang kaila iyang saligan ug nga bisag kagar sila sige lang gihapon siya nila.
NG: Si Purisima Nyor?
ND: Super Kagar. Suspended na siya nag sige pa gihapon og pang-advice bisag siya mismo wa man diay kuno makataak og Mindanao.
NG: Ang mga Kano, Nyor?
ND: Otrong kagar. Nagpada unta silag mga Pinoy nga paramedic para mokuha sa mga samaran. Kay ang nahitabo mura naman silag caterer nga nanghipos human sa usa ka kumbera.