“She don’t remember
The Queen of Soul
It’s hard times befallen
The sole survivors
She thinks I’m crazy
But I’m just growing old”
-Steely Dan/”Hey Nineteen”
Matud pas akong amigong magbabalak nga si Sawi Fox –“the muse doesn’t stay in one place.” Kay dakug purohan nga ang binuhat nga imong naibgan karon di na nimo maibgan ugma. Ang “pagkamadanihon” sama sa tanang butang nga makapadasig sa gasud-ong niani paghimo og bisag unsa, matawag nato og muse.
Si Sharbat Gula maoy nahimong visual representation sa muse ni Steve McCurry nga maniniyut sa National Geographic. Si Gula maoy nahimong nawong sa linibo ka mga binuhat sa lain-laing nasud sa lain-laing kultura ug sa lain-laing kahimtang nga gikuhaag hulagway ni McCurry.
Niadtong 1985 diin usa pa ka dose anyos ang Afghan nga si Gula gikuhaan kinig hulagway ni McCurry. Gipaguwa ang maong hulagway sa cover sa National Geographic magazine. Daw motaput sa panumduman sa tanang nakakita sa maong cover kining hitsura ni Gula nga usa ka batan-ong babaye nga berde kaayo og mata. Giingon nga mao kini pinaka inila nga cover sa maong magazine.
Tungod sa kasikat ning maong hulagway daghan ang nangutana kon unsay nahitabo ning maong green eyed teen. Maong gipangita ni McCurry si Gula aron masayran kon unsay nahitabo niani ug nga kuhaag bag-ong hulagway. Pagka 2002 nakit-an ni McCurry si Gula sa usa ka layong dapit sa Afghanistan diin duna na kini tulo ka anak ug naminyo kini sa usa ka panadero.
Ug ang sugilanon kon gi-unsa pagkaplag pagusab ni McCurry si Gula gipatik sa National Geographic ug si Gula nabutang na usab sa cover.
Pero niadtong Abril sa miaging tuig gikataho nga usa na ka illegal alien si Sharbat Gula sa Pakistan ug Sharbat Bibi ang ngalan niani. Nakakuha kinig ID sa Pakistan pinaagi sa pag gamit og mga fake nga documents. Usa siya sa mga libo kapin ka mga Afghans nga nakalusot sa computerized ID system sa Pakistan.
Gisusi sa usa ka AFP reporter ang lugar nga gibutang ni Gula nga address apan matud pa sa mga silingan nga mga usa ka buwan na siyang mibiya didto.
Ang mga kausaban nga naagi-an sa muse ni McCurry nga si Gula susama sa sugilanon niadtong usa ka pintor nga mipintal og last supper. Gi-una niya pag pintal si Kristo diin usa ka buotag nawng nga lalake ang mi model. Pipila ka tuig ang milabay ug nahuman niya ang tanang mga disipulo gawas ni Hudas. Hangtud nga may nakit-an siya nga lalake nga para kaniya angayan nga himuog Hudas. Dihang mi-posing na ang model isip Hudas, diha lang niya mahibaw-i nga mao ra diay kadtong tawhana ang mi-pose isip Kristo.