Kaluoy sab intawn ni Atty. Jiecel Tiu kung tinuod man nga igo ra siyang nasaypan ni Mrs. Pearl Ungab nga may tinaguan silang relasyon sa bana niini nga si Vice Mayor Atty. Jonah John Ungab nga maoy hinungdan sa grabeng selos nga miresulta sa pagdagmal kaniya gamit ang baseball bat niadtong Huwebes sa hapon.
In fairness ni Atty. Tiu daghan baya ang susama sa iyang sitwasyon nga maselosan ug masaypan lang sa asawa.
Labaw na’ng makalo-luoy si Pearl kung tinuod sab ang iyang pag-insister nga si Atty. Tiu maoy naka-guba sa iyang pamilya.
In fairness ni Mrs. Ungab, dili sab tingali ingon ani siya ka bayolente kung wa siya’y igong sukaranan.
Matud pa sa akong mga higala nga dali kaayong maka-sense ang asawa sa pagbudhi sa bana.
Sama lagi sa akong gi-ingon kinahanglang motingog si Ronda Vice Mayor Ungab aron ma-klaro kung unsa man gyud ang tinuod nga sugilanon.
Wa gyu’y angay’ng kabalak-an si Vice Mayor pagtug-an sa tinuod kay masabtan man siya sa publiko kay tawo ra baya ta.
Sa kalambuan kagahapon, dili gyud ikalipay ni Atty. Jiecel Tiu nga gi-down grade nila ni piskal Liceria Rabillas ug OIC City Prosecutor Ma. Luisa Ratilla ngadto nalang sa kasong slight physical injuries ang kasong frustrated murder nga iyang gipa-saka batok sa asawa nga si Pearl.
Nanggawas na ang mga alegasyon sa mga suod ni Atty. Tiu nga kuno close friend si piskal Rabillas ug Vice Mayor Ungab mao nga pabor ni Pearl ang resolution nga wa kasohi ug frustrated murder.
May lang kuno kung kawras lang unta kay dili sila mo-kwestiyon sa resulta sa imbestigasyon ni Rabillas.
Si Rabillas mipasabot nga dili na siya maka-usab sa iyang findings ug mirekomendar siya ug 2 mil pesos nga piyansa alang ni Pearl sa kasong slight physical injuries.
Duha ka options ang himoon ni Atty. Tiu pag-kuwestiyon sa resolution. Una, pwede’ng ipa-usab sa korte ang information sa kaso. Samtang ang ikaduha mao ang pag-file ug petition for review didto sa Department of Justice or sa Regional State Prosecutor’s Office.
Sa iyang disposition, gipasabot ni piskal Rabillas nga way qualifying circumstances of treachery and evident premeditation mao nga iyang gi-downgrade.
Gawas pa wa gyu’y intensiyon nga mopatay si Pearl kang Atty. Tiu kay baseball bat maoy gidala ug dili armas nga mobuto unya igo ra’ng migukod ug midombol sa sakyanan sa abogada.
Akong natawgan kagahapon ang igsoon ni Atty. Jiecel nga si Atty. Alisha Tiu pag-komentaryo sa findings ni piskal Rabillas apan nipasabot nga wa pa sila makabasa sa disposition sa piskal.
* * *
Nagkita mi kagahapon ni Cebu Assistant City Prosecutor Ma. Theresa Casino kinsa usa sa mga gipa-inhibit ni Super Bobby sa kasong libel.
Na-klaro intawn sa mga panagway ug inistoryahan ni piskal Casino nga dunay kasuko sa akong mga komentaryo ug ni Super Bob nilang duha ni piskal Gandhi Truya sa wa gyud nila pag-inhibit.
Iyang gipasabot nga taliwa nga dili siya maminaw og radyo ug dili siya magdala’g newspaper sa panimay, iyang mama maoy nag-monitor sa isyu ug maoy misulti kaniya.
Pero ang nakanindot kay bisag nala-in ang tuno ni piskal Casino nga nakigharong kanako, naka-manage pa siya sa pagkatawa ug hangtud siya miingon nga way problema kay trabaho man namong mga sakop sa media.
Mao nga magpasalamat lang sab ko kaniya kay nakasabot sa among baruganan.
Dili gyud unta mi magsaba-saba sa radyo kung wa pa nila gisalindot ang motion ni Super Bob nga mang-inhibit sila bolontaryo human sila gipang-kuwestiyon.
Karon atua na ni Lapu-lapu Assistant City Prosecutor Jesus Rodrigo Tagaan ang kaso ug maglaum ko nga hatagan sa insaktong kaangayan si Super Bob.
Mas maayo nalang nga atua sa dakbayan sa Lapu-lapu ang kaso kay layo na sa impluwensiya ni kanhi City Mayor Tomas Osmena.