Pilato (P): O, nganong ga duko-duko man ka diha Nyor Gamay?
Nyor Gamay (NG): Uy, Lats! Ikaw man diay na. Nganong naa man kas tunga sa dalan? Traffic Enforcer na diay ka?
P: Tabang ra kog pa-labang sa mga bata kay ting pamuhi ron. Serbisyo publiko ra ning ato Nyor, O nganong ningisi man ka?
NG: Nahimuot lang kos termino nga “serbisyo publiko” kay gigamit man sad nas Taxi drayber nga nalambigit sa dyes pisos nga kagubot.
P: Aw o. Naka-dungog bitaw ko niana. Unsa man diay nahitabo.
NG: Matud pas drayber dihang gipangayo-an siya sa dyes nga deduction sa flagdown sa iyang managti-ayong pasahero nga nanarbaho sa call center gi-ingnan kini niya nga automatic na kuno ang deduction sa iyang metrosan. Mipadayon ang drayber nga migawas ang mga pasahero gikuhaag picture ang iyang sakyanan ug nga buot motan-aw ang bana sa iyang driver’s ID, pruweba nga na recalibrated na iyang meter ug sa sticker nga mopamatuod nga nausab na ang iyang metrosan. Nianing tungora miangkon siya nga misaka ang iyang tingog og nga gisingkahan niya ang magti-ayon nga duna silay reklamo sa LTFRB lang unya sila magkita. Sumpay pas drayber nga tulo na ka tuig siyang gamanihug taxi wa gyud kuno siyay bad record. Usa kuno ka serbisyo publiko ang iyang trabaho. Ug nga wa gyud kuno siya mamakak sa iyang gipanulti.
P: Ah mao diay nga nahimuot kas akong giingong “serbisyo publiko.” Unya unsa may gi-ingon sa mga taga call center?
NG: Suma sa asoy sa bana, nasuko ang drayber dihang gipangayo-an nila kini sa dyes nga adjustment sa flagdown. Nasuko ug namalikas kini. Gilabay niani ngadto sa magtiayon ang duha ka singko nga sukli uban sa panghagit kon isog ba sila ug nga kon mosukol ba sila. Mipadayon ang bana nga mikuhag kutsilyo ang drayber ug maong nidali-dali silag gawas apan migawas sad ang drayber ug gi syagit-syagitan sila. Unsa may ikasulti nimo ani Lats?
P: Basig tungtunga sa ilang duha ka asoy ang nahitabo. Nangayog saktong sukli ang magtiayon. Wa muhatag ang drayber. Gihudlat kini sa bana pinaagi sa pagpangayo sa iyang driver’s ID ug sa pruweba sa re-calibration sa iyang meter. Ang drayber nga kuwang sa katug gisapot. Gibato niyag duha ka singko ang magti-ayon ug gibalikas. Migawas ang magti-ayon ug gikuhaan nilag picture ang taxi ug gipost kini nila sa facebook.
NG: Unya kadtong kutsilyu, Lats? Pung pas bana gihudlat man silag kutsilyo pero niingon man ang drayber nga wa man gani kuno siyay banana-cue stick sa iyang sakyanan.
P: Ah, di to kutsilyu Nyor. Silver to nga sudlay. Wa naman gud ni tulganay ning mga drayber sa taxi. Basin sa iyang day-off namartaym nis parlor ug maong duna ni sudlay nga silver ug buot niyang sudlayon ang magtiayon para di na masuko kaniya.
NG: Butangi! Kinsa man gyuy sad-an ani Nyor?
P: Ang mga tigpanday sa balaud maoy angay nga basulon ani Nyor kon nganong wa sila kahimog ordinansa nga mo dili sa mga taxi driver pagdag sakyanan 24 oras straight. Init ug ulo ning walay tulog usahay, Nyor. Unya kuyaw pud nis awop sa panan-aw tungod sa duka. Gani daghan naman kunong ga shabu nga mga driver para lang pa was duka.
NG: Sa ato pa, alimungaw rag sapot maoy hinungdan sa lantugi sa dyes.