Ugkaton karong adlawa ni Dr. Rene Cam, medico legal officer sa National Bureau of Investigation (NBI) ang patay’ng lawas sa 11 anyos nga batang babaye nga giingong manglimosay sa Mango Avenue nga si Chastity Mirabiles.
Kinsa man gyud ang midagmal ug mipatay sa bata? Ang hepe sa Fuente Police Station nga si Chief Inspector Wildemar Tiu? O ba kaha iyang mga sakop?
Duna gyu’y manubag sa kamatayon sa bata.
In fairness sa hepe, daan nang nanghimakak sa alegasyon. Ang unang gipagawas nga gi-dengue ang bata ug biktima sa heat stroke.
Pero nganong wa mansi Tiu mo-atubang sa imbestigasyon sa Police Coordinating and Advisory Council (PCAC) nga gipangulohan ni Vice Mayor Edgardo Labella?
Kung seryoso si Tiu paglimpyo sa iyang pangan nganong mikalit man siya og sibat?
Kung daan na siyang naka-apply og leave alang sa iyang bakasyon uban sa iyang pamilya dili ba pwede’ng ipa-recall sa iyang mga labaw ang iyang leave application?
Kinsa man gud ang dili magduda sa iyang pagsibat?
Nahinumdom lang ko niadtong usa ka higayon nga mitunga si Cebu City Councilor Margot Osmena sa among programang “Dialogue On The Air” nga nagtuki bahin sa isyu sa mga bata nga “Libod- Suroy”.
Si konsehal Osmeña mipasangil sa liderato ni Cebu City Mayor Michael Rama nga gipasagdan ang problema sa mga “Libod-Suroy” nga mga bata.
Matud pa sukwahi kaayo sa ilang panahon ug gani nakadawat sila’g pasidungog kaniadto tungod sa mga programa alang sa mga bata nga pinasagdan nga anaa sa kadalanan.
Sa tinuod lang bitaw, kaniadto pa kining mga sugyot nga kinahanglang magtukod og maayong facility o center alang sa mga bata nga gipasagdan.
Kay sa panahon nga mag-rescue sa mga bata, buhi-an ra gihapon kay way mga facilities.
Asa man tuod ang mga ginikanan niining mga bata nga “Libod Suroy”?
Way plano ang gobyerno nga ang mga ginikanan maoy prisohon? Apan dili kaha hinuon ampay sa mga ginikaan nga prisohon kay libre na’ng kaon sa prisohan?
* * *
Unsa may gidugayan sa taga Environmental Management Bureau (EMB) sa Department of Environment and Natural Resources (DENR) pag-renew sa permit niining mga tigkolekta sa mga infectious waste gikan sa mga ospital ug sa ubang mga medical health providers?
Ingon ani na ka estrikto karon ang taga DENR?
Unsaon man ning mga basura? Pasagdan lang sa taga DENR nga dili makolekta nga maghatag og risgo sa mga pasyente?
Dinhi sa ato ang tigkolekta niining klaseha sa mga basura mao ra ang taga Pollution Abatement Systems Services Inc. (PASSI).
Apan ang taga PASSI mi-insister nga naka-comply na sila sa tanang requirements nga gipangayo sa DENR.
Kung pasado na ang taga PASSI wa nay rason nga maglangay-angay ang taga EMB-DENR.
Unsa may kuwang? Padangog?
* * *
Pwerte’ng sadya-a gyud namong mga sakop sa News and Public Affairs sa DYSS Super Radyo uban sa among tagsa-tagsa ka pamilya niadtong Domingo atul sa among summer outing didto sa Barili.
Didto kami sa Barangay Campangga Barili ug nangaligo sa sikat na kaayo nga Mantayupan Falls ug ingon man sa swimming pool ni Sir Tito Causin tag-iya sa A.C. Tilapia Fun Fishing and Family Park.
Walking distance lang ang Mantayupan Falls sa establisimento ni Sir Tito.
Wa ko makapamasol sa mga tilapia kay nalingaw nako sa among tagay, videoke ug istorya.
Pwera buyag haom kaayo sa mga bata ang duha ka swimming pool ni Sir Tito ug makapa-ingganyo kaayo ang pagsakay sa iyang upat ka mga kabayo.
Didto sa Mantayupan Falls, risgo gyud kaayo sa tanang mangaligo nga magpaduol sa pusdak sa tubig sa busay (falls).
Bisan ako nga mi-risgo pagpa-duol sa bundak sa tubig, medyo suyopon gyud akong tibuok lawas pa-ilawm.
Kung di lang siguro ko makamao molangoy delikado gyud sa disgrasya.
Akong gisugyot sa mga life guards nga kung mahimo pun-an gyud nila og mga pisi nga kuptan sa mga tawo kay kung simbako bikugan dunay kakapyotan.