Gi-tag kos akong higala nga si Adonis nga tua karon sa Oman sa usa ka music video nga alang kaniya duol kaayo ang padagan sa mga kanta ni Budoy ug sa pundok niani nga Jr. Kilat.
Kining kantaha mao ang “Tug Ta Tug” ni Earnest Hope Tinambacan nga iyang gisuwat uban ni Jerry Angelo Catarata. Ug sakto si Adonis nga maypagka Jr. Kilat ang padagan ning maong kanta. Ang naka similar sa “Tug Ta Tug” sa mga kanta sa Jr. Kilat mao ang kinantahan ug ang iyang beat.
Ang nakalahi nila kay mas luag ang areglo sa Jr. Kilat ug mas hugot kining sa “Tug.” Mas seryoso ang mga tema sa Jr. Kilat nga kabahin sa drug abuse, folk beliefs ug corrupt practices sa military samtang ang tema sa “Tug” kabahin sa usa ka batan-ong gidimalas intawn ug nga gitambagan nalang og “maypag ma tug ta tug.” Mas catchy ang humor sa “Tug ta Tug.” Tungod ba kaha kini kay mas batan-on sila ug tingali mas natural nga bisdak. Maurag original bisdak ra gyuy makahimog wordplay sa “tug ta tug.”
Kon mahinumduman ang frontman ug lyricist sa Jr. Kilat nga si Budoy “Waray” man ang first language. In fact, daku na kaayo nga achievement ni Budoy sa lingwahe sa iyang paghimo ning gitawag niyag RnB o Reggae nga Binisaya.
Sa way langanlangan gi-share ko dayon sa akong FB kining “Tug Ta Tug” ug nakadawat dayon akog comment ug message sa among editor nga si Niza. Matud pa niya mao kini ang iyang paboritong entry karong tuiga sa Vispop. Ug midugang siya nga “Brgy. Blues” ang paborito sa lain namong editor nga si Mimi.
Ug gitan-aw ko dayon ang video “Brgy. Blues” nga gisuwat ni Andy Calope ug gi perform ni Earl Andrie Ornopia. Ug tuod man, na lingaw usab ako niini nga ako dayon kining gi-share. Mas duol ang music nila sa mga karaang Pinoy rock pero, again, mas hugot silag areglo ug ma-pick-up mo dayon ang virtuosity sa mga musikero. Daw funk n’ blues ang padagan sa kanta. Mas dili personal ang tema ning maong kanta. Dunay social dimension ang ilang obserbasyon sa epekto sa alcohol (Tanduay) sa indibidwal ug sa katilingban.
Ang laing mga finalist Vispop.03 mao ang “Buwag Balik” ni Lourdes May Maglinte (composer/performer), “Bok Love” ni Therese Marie Villarante ug Felipe Anjelo Calinawan (nga gi-perform ni Therese ug sa akong higalang maniniyut nga si Kurt Fick, “Pangandoy” ni John Stepehen Cadelina ug Irving Ladanan Guazon (si Daryl Leong maoy performer), “LQ” ni Adam Corvera nga iyang gi-perform uban ni Eugene Corpin (sa Agressive Audio) ug Julyann Uy.