Super Hirit
Kining paglambo sa kinabuhi nag-agad ra gyud sa kabubut-on sa Diyos ubanan sa disiplina ug paningkamot sa tawo.
Dili kini madala sa mga palihi ug magpaabot nga hagbungan sa pagkaon ug sa ubang gikinahanglan matag adlaw.
Kun ang tawo mokayod sa insakto ug dili magpasagad og gasto sa mga butang nga way hinungdan anaa gyud ang iyang paglambo.
Mag-unsa man sab nang magsigeg hangad ug pangayo sa Ginoo kun dili ubanan sa kugi ug kayod taman sa ginhawa?
Bisan naigo kita sa mga dagkong kalamidad sama niadtong kusog nga linog pagka Oct. 15 ug sa kusog nga bagyong Yolanda niadtong Nov. 8 sa miaging tuig, sigurado ko nga niining “Year of the Horse” molambo pa kita ug dali kitang makabangon.
* * *
Dili na ko matingala nga mosaka ang presyo sa mga baligya niining bag-ong tuig ilabina nga motapos na karong petsa 8 sa Enero ang gideklarar nga “state of ational calamity” sa gobyerno nga nagpatuman og price freeze sa mga nag-unang palaliton tungod sa bagyong “Yolanda.”
Pun-an pa sa pagsaka sa presyo sa gasolina, sa kouyente ug tubig.
Ang Visayan Electric Co. kon Veco pinaagi kang Theresa Sederiosa miingon nga unya na mahibaw-an sa ikaduhang semana sa Enero kun mopa-increase ba sila sa bayranan sa kuryente.
Samtang ang Metro Cebu Water District kon MCWD, wa man tuod moanunsiyo og increase sa bayranan sa tubig apan wa nay discount sa mga konsumidor nga gagmay og konsumo nga ang konsumo dili molapas og 50 cubic meters matag buwan.
Niining paagi sa MCWD magtukmod kini sa mga tawo nga dili na magdaginot ug magpaturagas nalang og gamit sa tubig kay maka-avail man sa diskuwento.
Maayo unta nga sa wa pa ipatuman ang bag-ong paagi sa discount, nagpatawag og dialogue ang MCWD sa tanang mga stakeholders.
Karong Sabado sa hapon, Jan. 4, 2014 mangahas mi sa pagpatawag ug dialogue atol sa among programa’ng “Dialogue On The Air” sa dySS Super Radyo bahin ning maong isyu ug kami mangimbitar sa tanang mga stakeholder aron maklaro kining tanan ilabina nga nag-alboroto ang mga mayor.
* * *
Unsa na kaandam ang atong nasud alang sa Asean integration sa tuig 2015?
Ang Asean integration nagpasabot kini nga maglig-on ug mag-usa ang tanang mga nasud sa habagatan-sidlakang Asya lakip na ang Pilipinas pagpasulbong sa ekonomiya ug pagpalambo sa kinabuhi sa mga tawo sa Asean.
Gituyo kini sa mga economic managers aron ang tanang mga nasud sa Asean maghimo og currency aron pag-compete sa US dollars ug sa Euro sa mga nasud nga miembro sa European Union.
Si Rey Calooy sa Filipino-Cebuano Business Club kinsa usa sa akong dinapit nga bisita sa among programa’ng “Dialogue on the Air” niadtong Sabado sa dySS Super Radyo mipasabot nga kun mahitabo ang 2015 Asean integration hayan kitang mga Pilipino makasayon-sayon na og biyahe paingon sa ubang kanasuran sa Asean aron manarbaho ug magtukod og negosyo ug sa samang higayon ang atong mga silingang nasud makasayon-sayon sab sa paghimo sa ingon dinhi sa ato sa Pilipinas kay dili na istrikto sa mga dokumento.
Matud pa ni Calooy nga nasabotan na kini sa mga pundok sa mga ekonomista ug mga negosyante ug iyang giingon nga dili gyud kita dehado sa ubang mga nasud kun hisgotan ang competitiveness sa mga skilled workers ug mismo sa atong mga produkto.
Ambot lang kun maka-compete na ba gyud ang atong mga produkto sa Pilipinas ikomparar sa ubang mga nasud sa Asean nga sarang i-patronize ang atong mga produkto sa atong mga silingang nasud.
Kun hisgotan ang paghimo og mga sakyanan ug mga gadgets wa ra kita sa kumingking sa China ug South Korea. Dehado na sab kita sa rice production ikomparar sa Vietnam.
Ang mahitabo niini mao nga ang sagad natong mga Pinoy mahimong ulipon ug trabahante sa mga dagkong nasud tungod sa atong skills.
Kun dato pa ang Pilipinas ug dunay igong capital dili ta mauwaw pakigtigi sa uban. Unsaon man nga ang corruption man maoy nagpasulabi.
Makapabalaka usab kini sa atong interest ang Asean integration kay dili malikayan nga matandog na sab ang atong “sovereignty” ug “independence” ug possible nga ang maghawod-hawod niini mao ang China nga usa ka nasud nga komunista kinsa maoy ikaduha sa U.S.A. nga gamhanang nasud sa tibuuk kalibutan.
Dili kaha gawngan sa China ang political system ug ang atong sistema sa pang-gobyerno niining Asean integration?
Tingalig masubli na sab ang history sa Pilipinas kadtong kawsa nilang Dr. Jose Rizal, Andress Bonifacio ug sa ubang mga bayani pinaagi sa paglusad og revolution batok na sa China.
Kinahanglang tun-an kinig tarong kay tingalig mawagtang ang demokrasya sa atong nasud.
Ang akong mga suking tigpaminaw nabalaka sab nga tingalig gumikan sa Asean integration mas mosamot kakusog ang palusot sa drugas ug uban pang sindikato ug krimen.