Nganong di man si Ryan Alegre ang miatubang sa mga sakop sa media kagahapon aron paghatag og katin-awan sa kasong pag-ambush-patay sa iyang asawa nga si Atty. Amelie Ocañada Alegre?
Wa siya mosibat? Dili pa igo nga miatubang siya sa taga Criminal Investigation and Detection Group (CIDG-7) niadtong Sabado kinsa miisyu og general denial.
Ang papa ra nga si Ramon Jr. maoy mitunga ug nanghimakak nga si Ryan maoy mastermind sa krimen.
Dili gyud kuno makahimo si Ryan sa krimen ug wa makatambong kay grabe ang kasub-anan sa nahitabo sa asawa.
Pero unsa ka tinuod nga nagtanom og grabe’ng kalagot ug kahi-ubos si Ryan ngadto sa iyang buwag nga asawa human nagmakuli nga paliton nalang ang fishpond sa Talisay nga ilang conjugal property?
Sa court record, gawas nga misupak si Atty. Alegre sa pag-anular sa ilang kaminyoon, mibabag usab sa judicial partition sa ilang conjugal property.
Akong mga tinubdan miingon nga dako kaayo ang interest ni Ryan sa fishpond kay ang negosyo sa mga Alegre mao man ang prawn fingerling production o kining pagpadaghan sa semilya sa pansat nga dako kaayog income.
Unsa man sab ka tinuod nga suod nga higala sila si S/Supt. Mariano Natuel ug ang amahan ni Ryan kay kauban sa Bukas Loob sa Diyos (BLD) community? Nabalaka ba ang akong mga tinubdan nga posibleng ma-white wash ang imbestigasyon sa Mandaue City Police?
Kung mao ni, haom gyud nga misulod na ang taga NBI-7.
Pero bisan pa man niining mga nanggawas nga impormasyon parte sa bana, kinahanglang tutukan ang ubang anggulo ilabina ang pagpanglaban ni Atty. Alegre sa mga kaso bahin og kayutaan samtang anaa pa sila sa elimination process.
* * *
Haskang paita sa kahimtang karong bag-o sa atong mga huwes dinhi sa dakbayan sa Sugbo nga anaa diha sa Qimonda I.T. Center kay nagpas-an og daghang problema.
Gawas nga loaded na sila sa mga kaso nga ilang gihuptan, gipun-an pa sila sa mga kaso nga nagtipun-og gikan sa dakbayan sa Mandaue.
Akong nahibaw-an nga times three ang gidaghanon sa mga kaso nga gikan sa Mandaue ikomparar sa mga kaso nga gikan dinhi sa dakbayan sa Sugbo.
Maayo ra ba unta kung gipatas-an ang suweldo ug allowance sa atong mga huwes sukad gipun-an sila og mga kaso gikan sa Mandaue aron makahupay ug makagana kanila.
Ang worst pa gyud kay ang atong mga huwes mokuot sa ilang bulsa aron makapalit sa mga office supplies tungod kay kuwang kaayo ang ihatag sa Korte Suprema.
Unsa may gihimo ni RTC Executive Judge Soliver Peras ning maong mga problema?
Kinsa pa may maingganyo pagtrabaho kung di masulbad ning maong mga problema?
Maglaum ko nga paspasan sa Korte Suprema ang pagsulbad sa problema niining kakuwang nato og mga huwes.
* * *
Sa mga kalambuan karon sa politika, dili gyud kalikayan nga dunay mga politiko nga mobudhi sa ilang partido.
Sama sa nahitabo karon ni Cebu City Councilor Mary Ann Delos Santos nga klaro na kaayo nga mitapon sa Bando Osmeña-Pundok Kauswagan (BO-PK).
“Bisan ang kalibutan magdumili,” kung sa kanta pa, apan dili na mapugngan ni Mayor Michael Rama si Konsehal Delos Santos.
Alang nako sayang gyud ug dako’ng hulga sa Team Rama nga nawala kanila si Mary Ann kay bisan unsaon dako kaayog papel ang Barangay Lahug sa kadaugan sa Team Rama kaniadto.
Kanang mga negatibong isyu batok ni Mary Ann sa iyang pagka-balimbing ngadto sa BO-PK maayo unta nga maka-sustiner sa mga botante sa Lahug nga modulot gyud sa kabukugan nga dili angay’ng botaran si Mary Ann ug ang taga BO-PK.
Kung mapakyas ang kampo ni Rama, delikado sab siyang mamumbon sa Lahug.
Bilib gyud ko sa strategy ni Tomas kay nakuha gyud si Mary Ann kinsa mortal niyang kaaway sa politika kaniadto.