Dili ni kabahin ni Vice Ganda ang atong lindog karon. Kabahin kinis mga senador nga naglumbag lukso gikan sa kwadra para makasalmot sa lumba pagka bise presidente.
Dunay uban kanila nga sakop sa Pundok Atras Abante. Sila mao si Alan Peter Cayetano, Gregorio Honasan ug Camarines Sur Rep. Leni Robredo.
Si Senador Alan Peter Cayetano, nga igsuon ni Senador Pia Cayetano ug nga giingong pinangga sa mga Iglesia Ni Kristo, unang misugyot nga modagan pagka presidente. Dayon miingon siya nga lisud idagan tungod sa mubo niyang rating sa survey. Midugang pa gayud si Cayetano nga “If I do run, I’ll run for president and not for vice president.”
Apan niadtong miaging semana, niadto siya sa Davao para ilusad ang iyang kandidatura sa pagka bise presidente. Wa siya mosulti kon kang kinsa siya mo-vice president. Pero matud pas may mga kasayuran sa politika nga tataw kaayo nga buot siya mokuyog ni Duterte nga giingong modagan pagka presidente. Kay kon makuha ni Duterte ang mid ug south Philippines, maapil siya sa bira niani. Hilabi na nga naghuot ang mga kandidato sa amihanang bahin sa nasud.
Si Senador Gregorio Honasan, ang hawod sa kudeta sa panahon ni Cory, daw nakuratan dihang gipili siya ni Binay para running mate. Miingon siya nga iya sang hunahunaon kay ganahan na siyang moretiro sa politika. Apan wa madugay, nikuyog ra gihapon siya ni Binay. Dunay miingon nga panghudlat si Honasan ni Binay para kon mapildi sila, magkudita marathon ang mga loyalist ni Honasan.
Si Congresswoman Leni Robredo sa Camarines Sur nga byuda ni Interior and Local Government Secretary Jesse Robredo nagpunay og balibad sa mga sugyot nga himuong bise presidente ni Mar Roxas para sa Liberal Party. Usa sa rason tingali ang iyang pamalibad niadto maong giila siya nga second choice lang para sa maong partido nga nangulitawo sab kang Senador Grace Poe para vice president sa ilang partido.
Aduna usay matawag ta nga “Maybe Babies,” sama ni Senador Bongbong Marcos ug Senador Antonio Trillanes.
Si Senador Marcos nga anak sa kanhi diktador sa atong nasod mitubag og “There’s a saying, ‘Never say never,’ so maybe” dihang gipangutana siya kon modagan ba siya pagka presidente. Dihang gipangutana usab si Trillanes kon modagan ba siya pagka bise presidente, mitubag usab kinig “Let’s just say, yes, I will run. As for what position, I will abide by the Nacionalista Party.” Ania karon ang duha nanagbangga ning maong position. Unang gihangyo ni Binay si Marcos nga mahimo niyang bise, apan mibalibad kini. Kon kahinumdoman, aktib kaayo si Binay niadto sa mga anti-Marcos rally, ug mao kini nakapasuod niya kang Cory Aquino. Si Trillanes, sa iyang bahin, dakog pagdumot kang Binay kay matud pa niya, gitraydor siya niani. Misaad kuno si Binay kaniya nga magdalag people power dihang mikudita siya batok sa pamunoan ni Gloria Arroyo, apan bisag anino man lang ni Binay way nisipot.
Ang Inila ug ang Wa-il maoy matawag nato ni Senador Francis Escudero ug ni retired judge Diego Maceda Palomare. Si Escudero, bana sa artista nga Heart Evangelista ug kanunay nga mogawas sa TV nga daw mag-Balagtasan, giingong gisuportahan sa pundok ni Danding Cojuanco. Bise si Escudero ni Poe. Ang iyang asawa nakauban sa usa ka teleserye diin kauban niani ang igsuon ni Poe. Showbiz-inspired kining ilang kandidatora. Si Palomare, sa iyang bahin, midagan ubos sa
Philippine Green Republic Party.
Unsa may buot ipasabot ning daghan kaayong miintra sa bangga sa pagka bise presidente sa atong nasud? Una, daghan kaayong maayong politiko sa ato. Ikaduha, nagkaguliyang lang ang agi nato.