Dunay usa ka dakung krimen nga nahitabo didto sa Kawayanan Barangay Yati Liloan niadtong Miyerkules sa buntag October 14, 2015, sumad karong adlawa unya usa ka asawa ang biktima sa pagpamusil-patay.
Ang biktima mao si Bethsadar Joyag-Longakit, 40 anyos, psychology graduate, pamilyado ug dunay tulo ka mga anak.
Si Dr. Mario Longakit sa Integrated Provincial Health Office – (IPHO) Capitol igsoon sa biktima, nagpakitabang intawon ug akong gikuyogan sa opisina sa National Bureau of Investigation (NBI) kagahapon aron kahatagan og katin-awan kung kinsa ang mga responsable sa krimen.
Matud ni Dr. Mario nga samtang nagtiwas sa pagpanglaba ang iyang maguwang sa sayong buntag mga alas 6:30-7:00 a.m. niadtong Miyerkules sa ilang tugkaran, dihay duha ka mga lalaki ang miduol ug namusil nga maoy hinungdan sa hinanaling kamatayon.
Wa sa ilang panimay ang iyang bana nga si Russell Arthur Longakit atul sa pagkahitabo kay namalit sa merkado alang sa ilang pamahaw unya ang mga anak nangatug pa.
Nahibaw-an nga way nakahatag sa description sa mga mamumuno nga nanglakaw ra kay medyo distansiya kaayo.
Ngan nga gidudahan ang bana sa krimen gi-imbitar sa Liloan Police ug gipa-paraffin test apan negatibo unya gi-release kay way basihanan.
Si Dr. Mario wa mopadaplin sa posibilidad nga ang bana usa sa mapasanginlan kay matud pa dunay mga panghitabo nga mo-grabe ang away sa magtiayon.
Apan nahibaw-an ni Dr. Mario nga ni-anang Martes sa gabii malipayon ug sadya kaayo ang iyang maguwang ug ang bana ug ilang usa ka anak kay nang-disco pa sa silingang dapit kay fiesta.
Usa sa patutukan nga anggulo ni Dr. Mario mao ang mga silingan sa iyang maguwang diha sa Kawayanan Yati Liloan nga nasilag pag-ayo ug nanaglagot human gikoral ang ilang lote nga sobra 900-square meters nga may basketball court nga kabilin sa ilang apuhan.
Kaniadtu suma pa sa doctor nga dunay silingan sa iyang maguwang nga mi-asdang ug nanigbas sa parte sa ilang balay.
Dunay mga insidente nga ang gipangtanom sa pamilya sa iyang maguwang pang-ibton ug dunay kanding kaniadtu nga giputlan sa sungay.
Miingon ang doctor nga ang maong panghitabo sa away-silingan napaabot sa Barangay apan nahilot ang tanan.
Ang ako ba wa gyud ko makasabot nganong gipatay ang biktima nga usa ka babaye nga kuwang kaayo sa umoy nga di gyud makasukol.
Butang kini nga angay’ng tugkaron ang tinuud sa atong mga imbestigador sa NBI.
Kagahapon si NBI-7 Director Ricardo Diaz mipasalig nga mopahigayon sila ug separate and parallel investigation sa maong krimen human nagpakitabang si Dr. Mario sa ilang buhatan.
Matud niya nga himoon nila ang tanan ug iyang gitugyan kining maong kaso sa supervising senior agent sa NBI nga gikan pas Manila nga si Atty. Ervin Garcia.
Kagahapon sa hapon, akong nahibaw-an ni Dr. Mario nga dili pa maka-autopsy si NBI Medico-Legal Officer Dr. Rene Cam kay atua pa sa Manila kay dunay gitambungan nga seminar ug unya pa sa sunod simana himoon ang autopsy sa patay’ng lawas ni Bethsadar.
Ngan nga karon na’ng Sabado ang lubong sa biktima, ako nalang gitambagan si Dr. Mario nga ipa-autopsy gyud sa PNP Medico-Legal Officer kay klaro man gyud nga gipusil-patay ang biktima. Segurado ko nga susama ra ang findings sa NBI ug PNP sa cause of death.
Ang ponto man gud nako nga kung paabuton pa si Dr. Cam kinsa usa sa mga gi-respeto sa forensic science, malooy ko sa patay’ng lawas sa biktima nga ugkaton na sab o ipa-exhume sa lubnganan nga medyo matugaw ang iyang pagpahimutang ug hasol sab kaayo sa pamilya.
Unya ang laing nakahasol niining paghaw-as sa patay mao nga modangop na sab sa korte ug mangayo’g court order for exhumation.
Maglaum ko nga kahatagan og hustisya ang kamatayon sa ginang.
Akoy gisayangan kay ma-ilo gyud intawon og sayo ang iyang tulo ka mga anak ilabina ang kinamanghuran nga 3 anyos.
Lahi ra gyud ang pag-amoma sa inahan.
Sa akong kabahin daku ko’g pagtoo nga silingan ra ang utok sa krimen nga nagtanom na og grabeng kalagot sa ilang sitwasyon.
Akong tan-aw possible nga ang biktima maoy target ug dili ang bana kay siya maoy immediate family sa tinuud nga tag-iya sa lote.
Pero mas maayong tan-awon sab ang anggulo kung wa ba gyud magbisyo ang bana sa ginadiling drugas.