Nahimong inutil ang atong kapolisan human mi-invoke sa ilang diplomatic immunity ang magtiayong Chinese nationals nga sila si Guo Jing kinsa first secretary consul sa Chinese Consular Office dinhi sa Sugbo ug ang iyang bana nga si Li Qingliang nga maoy trigger man pagpamusil-patay sa ilang duha ka mga staff ug pag-angol sa ilang Consul General.
Ang consular agreement nga gipirmahan ni kanhi foreign secretary Alberto Romulo sa panahon ni presidente Gloria Macapagal Arroyo uban sa Chinese government niadtong 2009 maoy nagpalapad sa diplomatic immunity.
Sa maong kasabotan nilang Romulo , apil sa maka-avail sa diplomatic immunity mao ang mga consular officials ug mga kabanay nga makahimo’g common crime sa host country.
Kaniadto, ang Vienna Conventions on Diplomatic and Consular Relations limitado ang diplomatic immunity. Kadto ra’ng mga ambassador ug mga ministers maoy immune sa mga common crime. Buot ipasabot nga di makasohan sa host country apan ang respective country maoy motaral ug mao ray makasilot.
Alang nako, kung gusto gyud sa mga legal experts dinhi sa Pilipinas nga mo-kuwestiyon sa immunity sa managtiayon, nganong di man mo-contest pinaagi sa paghimo’g mga representations pagpadayon pagtaral sa magtiayon dinhi sa Sugbo ngan nga ang criminal case jurisdictional man gyud kini.
Di pa man ulahi ang tanang legal process. Puwede pa mang mokiha ang Cebu City Police Office og kasong two counts of murder batok sa magtiayon ug ipaubos sa normal preliminary investigation.
Ang pangutana mao kung respetohan ba sa atong Department of Foreign Affairs ug Chinese Embassy ang i-isyu nga subpoena sa Cebu City Prosecutor’s Office? Kung ibasura ang mga subpoena, duna pa bay laing paagi nga ma-serve personal ngadto sa magtiayon?
Dili kaha mosamot ka kataw-anan ang Pilipinas kung i-insister ang pagtaral dinhi sa Sugbo sa magtiayon?
Sa panahon nga ang atong mga staff sa consular office didto sa China maoy makahimo’g krimen, maka-avail kaha og susamang tratamento sa Chinese couple nga gihatagan og special treatment sa kapolisan?
Way tinguha ang Aquino administration nga ideklarar nga persona non grata ang magtiayon?
* * *
Unsaon man pagpalayas niining baga’ng gabon o “haze” sa atong kawanangan dinhi sa Kabisay-an ug Mindanao?
Dili ta manawagan sa atong mga pari nga mag-oratio imperata ta aron atong pangayoon sa Ginoo nga ig-on ang Pilipinas og laing super typhoon aron pagawson sa atong planeta kining grabeng haze o gabon? Akong tan-aw, kusog ra gyud nga bagyo ang makawagtang sa grabeng gabon nga haze.
Tiaw muna, pagka-delikado diay sa atong panglawas ilabina sa mga hubakon.
Nakahatag na kini og dakong epekto sa uban kay duna nay nakanselar nga mga flights ug nag-mask na ang uban ug nagpahimangno na ang atong mga tinugyanan nga dili mogawas sa mga panimalay.
Kung mao kini, risgo gyud ug maka-apektar kini sa atong mga inadlaw-adlaw nga panarbaho.
Unsa may labing maayo nga himoon sa atong gobyerno niini? Way plano nga ikiha nato sa international court ang Indonesia nga napakyas pagpawong ug pagpakgang sa sunog sa kalasangan didto sa Sumatra Indonesia nga maoy naka-ingon?
* * *
Nalingaw ko sa akong mga kauban nga mga media practitioners ug mga dramatorgo nga mo-apil sa bugno sa politika sunod tuig kay pulos gyud mga seryoso nga mosulod sa laing matang nga panerbisyo sa katawhan.
Niadtong Sabado atol sa among programa’ng “Dialogue On The Air” sa DYSS Super Radyo, nahimo nakong mga bisita sila si Tudela Camotes Vice Mayor Greeman “Jojo” Solante kinsa kanhi kauban namong komentarista sa Super Radyo ug Bombo Radyo ug si Bombo Cesar Albor.
Si Solante ubos sa BAKUD party magpa-pili pag-usab sa Tudela samtang si Albor magpa-pili pagka Provincial Board Member sa Cebu’s 1st district ubos sa One Cebu.
Mitunga usab ang beteranong drama writer/director nga si Leandro Boy Patalinghug kinsa buot mag-gobernador ubos sa partidong KBL.
Sila si Inday Malou Inocando Ouano Tabar, station manager sa CCTN-47, ug si The Freeman staff member Garry Lao nga pulos sakop sa BO-PK, magpapili pagka Cebu City councilors sa north district.
Nakadayeg ko sa ilang plata porma de gobyerno nga gipangladlad ug ang ilang dedikasyon sa panerbisyo.
Maglaom lang ko nga molampos sila sa ilang mga ambisyon. Good luck ninyong tanan!