Gi istoryahan ko sa akong amigo nga si Ramon kabahin sa iyang higala nga hilig kaayo mamuso. Kausa sa nagpuyo kuno kini sa usa ka boarding house dinhi sa dakbayan. Dihang nahibaw-an sa iyang amigo nga babae diay ang nag-abang sa tupad sa iyang lawak sa boarding house iya dayong gibuslotan and ubos nga bahin sa iyang bungbong. Iyang gitiman-an kon unsang orasa mouli ug mogikan ang iyang boardmate ug unsang orasa kini maligo ug mag-ilis. Walay sipyat, kada adlaw maghapa ang iyang amigo matag ilis sa babae sa pikas lawak. Walay kalibutan ang babaye nga duna diay siyay audience sa pikas kwarto. Nabantayan sa lalake nga kining bayhana ganahan kaayo manamin nga walay sapot. Nabantayan usab niya nga aduna kini habak. Ang kasagarang habak usa ka basiyo sa bala nga gibitay gikan sa hawak. Gi-ingon nga tambal kini sa buyag.
Maayo ra unta ang dagan sa pamuso sa iyang amigo apan wa madugay gitugkan kinig kaibog sa iyang gibuso. Naigo kinis bala sa gugma. Wa ka-antos iyang gi ila-ila ang babae ug gihagad niyag snacks. Ug tuod man nagkasuod sila. Dihang wa na siya makapugong iya kining gipanguyaban. Apan mibalibad ang babaye kaniya og mi-ingon nga friends lang sila kutob. Nangutana siya kon duna na ba kini uyab? Niingon ang babaye nga wala siyay uyab apan dili kuno susama kaniya ang gusto niyang mahimong hinigugma. Nanghupaw ang lalake ug tungod sa iyang kahi-ubos iyang gi-ingnan ang babaye nga – “salig lang ka kay naa kay habak.” Misiga ang mata sa babae, mi-tindog ug mibiya. Wala damtig semana mibalhin kinig pinuy-anan.
Sa 1,322 ka bala nga na-imbargo gikan sa mga pasahero sa Mactan Cebu International Airport (MCIA) karong tuiga, 1,040 mga habak ug anting-anting. Ug sa mga nahabiling “live bullets” usa ra maoy gikasuhan. Diha usay laing nga gikasuhan sa miaging tuig. Ang kasagaran nga dunay mga “live bullets” nga miagi sa MCIA mga sakop sa militar ug mga contestant sa mga shooting competition sa gawas.
Unsa kahay naa sa basiyo sa bala nga daghan man ang ganahan mohimo niani nga habak ug anting-anting? Tungod ba kay bronsi (bronze) kini? Gi-ingong nga bronsi ra ang hinigiban nga makapatay og sigbin. Ug di ba kaha kay gituohang bangis kini kay nagamit naman kini sa pagkuhag kinabuhi. O tungod ba kaha sa buslot niani nga mahimong lang bara pagsikop sa mga dautang espiritu, sama sa dream catcher sa mga ethnic Americans nga mo dakup sa mga ngil-ad nga damgo.