Akong nasabtan ang grupong PISTON ilabina ang Cebu chapter nga molusad ugmang adlawa (Martes) og transport strike aron kaprotihian ang ilang mga katungod sa dili makiangayon nga mga palisiya sa national government ilabina ang pag-estrikto na sa renewal sa professional driver’s license.
Sa bag-ong patakaran nga hapit na ipatuman sa hingpit sa Department of Transportation and Communication (DOTC) ug Land Transportation Office (LTO), ang si kinsa nga nagkupot og professional driver’s license dili na hatagan og renewal kung may previous records nga nakahimog two or more reckless-driving violations sukad gi-isyu ang lisensiya.
Si Joel Maloloy-on, chief sa operations division sa LTO, mipasabot nga ang definition sa reckless driving mao kadtong nakahatag og peligro sa kinabuhi sa uban ug mga propedad samtang nagmahino sa sakyanan.
Apil na dinhi ang DTS kon “disregarding traffic signs” sama sa pag-violate sa “no left turn, no right turn on red signal, no stopping anytime, no entry” ug uban pa.
Sama sa akong giingon nga misimpatiya ko sa mga drivers niining ilang welga ugma kay akong tan-aw silang tanan kulban gyud sa kaldero kay silang tanan akong tan-aw dili na maihap ang violation sa reckless driving.
Unsa pa may ibuhi ug ipa-edukar sa ilang pamilya? Ug kinsa pa may magmaniho sa mga pampublikong sakyanan nga maoy gisaligan sa 80 porsiento sa mga sumasakay? Practically kining bag-ong palisiya nagtukmod sa uban nga magrebelde.
Gani gi-angkon sa PISTON Cebu coordinator nga si Greg Perez nga halos silang tanan daghan kaayog mga reckless-driving violations.
Mihulagway si Perez nga pinaagi niining dili maki-angyon nga patakaran, patyon na sa gobyerno silang mga driver ug kini maoy timailhan nga wagtangon na ang mga PUJ aron hatagan og kahigayunan nga makaboylo ang operation sa BRT kon Bus Rapid Transit.
Sama sa akong sugyot niadtong Sabado, nganong dili naman lang i-condone o pasayloon ang mga drivers sa ilang mga kanhi kalapasan kung seryoso nga buhi-on sa gobyerno ang mga PUJ?
Sama gud unta sa criminal law nga way retroactive effect.
Dili ba gud puwede’ng usbon ang administrative order bahin niini nga unya nata magsugod pag-iniphanay sa mga reckless driving violations inig dayong implementar sa bag-ong lagda?
Kinahanglang atong hatagan og higayon ang mga driver nga mag-usab na kay panginabuhi baya ang atong gihisgutan dinhi.
Makasabot ta nga gisayon-sayon lang pag-abuso sa mga driver kaniadto kay off and on sab ang atong gobyerno pag-disiplina ning maong sektor.
In fairness sa taga LTO-7, makasabot ra sab ta nga mopatuman kay under de bunal man sila sa ilang ulohang buhatan.
* * *
Usa ko sa magpasalamat sa taga Land Transportation Office-7 (LTO-7) nga mi-seryoso na gyud sa hingpit pagpang-impound sa mga motorsiklo nga saba kaayog tambotso nga mas nailhan nga “bora-bora”.
Kaniadto pa ko nanawagan niini kay disturbo gyud kaayo sa atong pagkatug, sa mga santos nga misa ug sa mga seryoso nga kalihokan.
Gawas niini, kini maoy usa sa mga hinungdan nga mabungol ang tawo.
Si Joel Maloloy-on, hepe sa operations division sa LTO-7, mitug-an nga sukad ilang gisugdan ang operation niadtong miaging semana, miabot na og usa ka gatos kapin ka mga motorsiklo nga saba ang na-impounded.
Makabayad sa tag 6 mil pesos ang mga tag-iya paglukat sa mga motorsiklo sulod lang sa unom (6) ka buwan. Kay kung di malukat sa maong gidugayon, ipasubasta o ipa-public auction ang mga motor.
Gawas sa 6 mil pesos, may bayranan pa, sama sa storage fee nga tag P15.00 ang adlaw ingon man ang miscellaneous fee ug computer’s fee.
Dili na mabasol ang LTO sa maong dinakpanay kay hagbay ra’ng mipahimangno niadtong mga tag-iyag motor nga ibalik ang original nga tambotso o muffler nga dili saba aron dili maproblema sa unahan. Apan daghan gyu’ng gahig ulo.
Ang rason sa mga nadakpan nga nindot gyud padaganon ang motor nga bora-bora kay kusog ang dagan sa motor unya dali ra’ng makabantay ang ubang mga motorista ug layo sa disgrasya kay dali kaayo’ng madunggan ang kasaba sa bora-bora.
Pero wa kaha kini tuyo-a sa uban aron pansinon kay mga kuwang sa pansin (KSP)? O ba kaha tungod lang gyud sa kahambugero sa tawo nga magpatagad sa uban?
Maglaum ko nga hingusgan pa gyud ang kampanya batok niining mga bora-bora bisag kinsay maigo.
** *
Bisan unsaon pag pang-alias sa usa sa mga nalambigit sa shootout sa Catmon Police niadtong miaging semana, segurado gyud ko nga ang usa sa mga nadakpan nga nagpailang Andrew Abaigar Ocasla mao ni siya ang nagpailang
Nestor Carol nga sakop ni PBMA supreme master Ruben Ecleo Jr.
Kaila ko niya kay siya maoy perme’ng ikauban ni Glenda Ecleo sa korte ug maoy escort sa banay’ng Ecleo.
Mao ning tawhana ang nalambigit sa pagpusil-patay kang Atty. Arbet Sta Ana Yongco ug mao sab ni siya ang nagpailang sakop sa SWAT uban sa laing mga kauban nga nadakpan nga nagdala og mga high-powered firearms panahon ni S/Supt Louie Oppus sa Lapu-lapu City Police.
Mao sab ning tawhana ang daku-dako sa grupo ni Ecleo nga maoy tahasan pagpatay sa mga tawo nga mihimog kawsa batok sa ilang giila nga “ginoo” nga si Ruben Ecleo Jr. nga fugitive human nakonbikto pagpatay sa iyang asawa nga si
Alona ug nakonbikto sa Sandiganbayan sa mga graft charges.
Ako nagtuo nga kining duha ka mga pangan pulos ra kini mga aliases. Kinahanglang kuhaon sa mga pulis ang records niini sa NSO ug kinahanglang itaral pagpatay kang PO2 Dionelio Jurbina ug pag-angol nila ni SPO2 Rex Menchavez ug PO2 Aaron Arizo.
Kudos sa kapolisan sa Catmon!
Kinahanglang masubay sab ang kalambigitan niining mga sakop ni Ecleo nga nahimo na’ng gun-for-hire, sakop sa robbery gang ug nalambigit sa pagbaligyag drugas.