Dihang nahurot na ang panuhod ni Kobe Bryant, dihang gipanamastamasan sa mga terorista ang kaanyag sa kinabuhi sa Paris, dihang na-knock out si Ronda Rousey ni Holly Holm pinaagi sa patid ngadto sa apapangig, misulod sa akong panumdoman ang kanta ni Neil Young nga “I Believe in You.”
Ang unang stanza niani kabahin sa lawom nga kasakit nga dala sa kausaban.
“Now that you found yourself/Losing your mind/Are you here again?/Finding that what you once/Thought was real/Is gone, and changing?”
Nostalgia, closure, moving on—mga Ininglis nga pulong may kalabotan sa buot tang pag-ikyas o ba kaha hinuon sa pagdawat sa hapdos nga pangos sa kausaban. Dili sayon ang pag-undang sa naandan. Cold Turkey, anyone? Ania ang second stanza:
“Now that you made yourself/Love me/Do you think/I can change it in a day?/How can I place you above me?/Am I lying to you when I say/That I believe in you/I believe in you.”
Kining ikaduhang linya mao tingali gibati sa mga fans ni Kobe ug ni Ronda nga gatan-aw sa pagkanaog sa ilang mga idolo gikan sa bukid sa Olympus.
“Coming to you at night/I see my questions/I feel my doubts/Wishing that maybe/In a year or two/We could laugh/And let it all out.”
Ning ikatulong stanza, ang mga biktima sa katalagman maoy akong mahunahunaan. Dunay Ininglis nga expression nga “wish it’s just a bad dream.” Nga unta moagi lang ang tanan ug mobalik dayon kita sa naandan. Pero sa nakita nato sa mga naagian ni Yolanda, dili ingon niani kadali ang tanan. Ang nakaparat lang sa nahitabo karon sa Paris, France kay dili kinaiyahan maoy nagpasakit kanila kon dili isig ka tawo ra gihapon. Ug unya kalit kaayo kini. Ug gihimo kini sa ngalan sa relihiyon.
“Now that you made/Yourself love me/Do you think/I can change it in a day?/How can I place you above me?/Am I lying to you when I say/That I believe in you/I believe in you.”
Ug sa kataposang stanza, gibalik ni Neil Young ang koro. Tingali gihimo niya kini aron pagsira o pagputos sa kanta para makumpleto kini nga sa ingon magpabiling buhi sulod sa kanta ang mga pagbati nga mapukaw niani. Apan mahimo usab nga iya kining gibuhat pag-awhag nga di nato angay buhian ang atong gituohan ug nga mopadayon kita paghigugma sa atong mga bililhong pinalangga, bisan pa man og nausab na sila ug wala na sila sa atong mga kamot.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
