Comelec control alang sa Dumanjug

Kaniadto pa gyud kini nga medyo init na ang away sa politika tali sa mga Garcia ug mga Gica diha sa lungsod sa Dumanjug.

Nabalaka ko nga ang kainit sa politika dili na mapugngan sa atong mga otoridad subay sa nahitabo niadtong Biyernes sa hapon nga giingong girakrakan ang kampo ni Vice Mayor Efren “Gungun” Gica didto sa barangay Masa.

Kung ingon ani ka init ang politika sa Dumanjug, way plano si Provincial Election Supervisor Lionel Marco Castillano nga ipaubos sa Comelec control ang Dumanjug?

Bintaha man gyud nga ipaubos sa Comelec control ang Dumanjug kay daghang idestino nga mga police ug Army unya may curfew pa aron dili makalihok ang mga binayrang mga armado nga ang papel pagpanghadlok sa mga botante.

Si Vice Mayor Gica misugilon sa akong interview niadtong Biyernes nga siya gyud ang target, unya duha ka anggulo ang iyang gitohoang motibo.

Una, iyang gipasanginlan ang mga nag-operate og illegal drugs sa ilang lungsod nga maoy mga responsable kay matod pa daghan kaayo sila’ng nadakpan atol niadtong siya maoy acting mayor pagkasuspenso ni Mayor Nelson Garcia.

Ikaduha, iyang gitohoan mao ang politika sa ilang lungsod.

Ang buot ipasabot sa pagduda ni Gica mao gyud ang pagdaot ni Mayor Garcia kay palpak kini paggukod sa mga durugista ug siya maoy labing ngilngig nga nangampanya. Samtang giigo gihapon niya si Mayor Garcia ngan nga ang ikaduhang motibo mao ang politika .

Apan ang kampo ni Mayor Garcia namasangil nga “ambush me” ang nahitabo kay way bisan usa ang naangol ug paukyab lang aron mosimpatiya ang publiko.

Gawas pa, dunay giingong mga testigo si Garcia nga ang responsable sa drama nga pagpangrakrak mao ang police escort ni Gica nga gipa-relibo ni Garcia sa Dumanjug Police kaniadto.

Kung target gyud tuod si Vice Mayor Gica, nganong ang sakyanan man ni vice mayoralty candidate Rene Asensista maoy gipaarakan nga way tawo?

Si Vice Mayor Gica nag-atubang usab og kaso sa Provincial Prosecutor’s Office tungod sa pagpanagpa ug pagpangulata sa usa ka konsehal gawas sa kasong malversation of public property tungod sa wa pag-turnover sa laptop nga giisyu sa iyaha niadtong konsehal pa kini.

Alang lagi nako, ang sulbad niining tanan mao nga ipaubos nalang gyud sa Comelec control ang Dumanjug aron patas ang laban.

Unya nata managana kung duna nay mahitabo?

* * *

With all due respect ngadtong Gov. Hilario “Junjun” Davide III nga kanhi Associate Graft Investigation Officer sa Ombudsman Visayas, mura’g nagmata gyud siyag buntag sa public bidding sa Kapitolyo nga gipadaog ang ConEquip pag-supply og China-made nga mga heavy equipment bisan maoy highest bidder.

Karon pa lagi ko nakamatikod nga ang highest bidder maoy padag-on inay sa naandan mao man ang lowest bidder aron makadaginot ang gobyerno.

Unsa naman ni’ng atong public bidding? Morag duwa nga dama nga pilde gana?

Ang depensa mao nga wa makapasar sa specification ang ubang nisalmot sa bidding.

Ang akong nalibgan kay ang ubang nisalmot mitanyag man nga ang i-supply nga mga units Japan made or European made.

Akong klarohon nga tested and proven na nga mas pulido gyud ang Japan or European made ikomparar intawon sa China.

Kompiyansa gihapon si Governor Junjun sa mga naglangkob sa Provincial Bids and Awards Committee (PBAC) taliwa nga nabuko-buko siya niadtong pag-award unta sa Black Pearl Security Agency?

Kung way trampas ug tinarong gyud, sige inyo na nang risgo. Akong tan-aw maglumba seguro ang mga kontra sa politika pagkiha nilang Governor Junjun.

* * *

Di ikalalis nga pamulitika kining pag-lobby ni Cebu City Councilor Gerardo Gerry Carillo pagpagahin og budget aron ihinabang sa mga “solo parents” nga nag-ilaid sa tumang kalisod.

Pero alang kanako, makahatag kini og kaayohan sa tanang “solo parents” nga makadawat sa tag P5,000 kada buwan bisag atong ibutang nga dunay mga “amiga” ni konsehal Gerry nga mahimong recipients.

Nindot man gani nga suportahan kini ni Rep. Bebot Abellanosa ug sa taga Bando Osmeña-Pundok Kauswagan (BO-PK).

Tiaw muna, basi sa survey sa University of San Carlos, moabot sa dul-an 5 mil ka mga “solo parents” dinhi sa Siudad sa Sugbo diin 80 porsiento niini nag-income lang og dili makaabot sa P5,000.

Malooy sab tawon mo, uy!