Nakapanglingo-lingo ko sa lain-laing reklamo nga akong nadawat gikan sa publiko batok sa atong mga pampublikong tambalanan dinhi sa Sugbo niadtong Sabado sa hapon atol sa among programang “Dialogue On The Air” sa dySS Super Radyo.
Ang topic kabahin sa obligasyon sa gobyerno paghatag og serbisyo sa katawhan sa natad sa panglawas human sa mga panghitabo sa mga district hospitals ilabina sa Minglanilla ug Tuburan.
Atol sa maong programa, dunay usa ka Cecil Cabuenas Zapanta, taga Tangke, Talisay, ang mipadayag sa iyang reklamo batok sa usa ka pharmacist sa Vicente Sotto Memorial Medical Center kay matud pa, nasayop paghatag og tambal alang sa iyang inahan nga nagsakit og diabetes nga si Annie Anna.
Segun ni Zapanta nga maayo lang gani abtik ang nurse pagbasa sa sayop nga tambal. Ang natunol nga tambal ngadto kaniya gikan sa boteka sa Vicente Sotto usa ka anti-rabies sa iro.
Dihang gipauli ang tambal sa boteka, igo ra’ng nangayog pasaylo ang pharmacist ug nipasabot nga naingon ato ang sitwasyon tungod kay grabe na gyu’ng duka-a. Paeta gyud!
Kung susama pa sa katanga sa on-duty nurse sa Tuburan, ma-inject gyud unta ang anti-rabies ngadto sa iyang inahan.
Ang Vicente Sotto ubos sa pagdumala sa Department of Health-7. Dili ba kini dako’ng insulto sa taga DOH nga dunay mga danghag nga pharmacists?
Gawas niini, dunay laing inahan ang nagpa-on air nga si Tessie Arevalo, taga Mambaling ning siudad, ug iyang gireklamo ang usa ka doctor sa pediatric ward diha sa Cebu City Medical Center.
Segun sa inahan nga gibalibaran sila sa doctor nga ipa-admit iyang 6 anyos nga anak nga gi-amoeba kay matod pa puno na niadtong higayona ang CCMC.
Giingnan siya sa doktor nga adto na lang sila sa private hospital. Apan ni-insister gyud si Mrs. Arevalo nga magpabilin sila sa CCMC kay di gyud makaya sa bulsa.
Pag-abot nilag duha ka adlaw sa CCMC, giingnan siya sa doktor nga papaulion na lang sila aron sa balay na lang tiwason ang medication sa iyang anak.
Nanglipagho ang pobre’ng inahan kay bisag nagsige pa’g discharge sa hugaw ang iyang anak ug di pa makaya sa lawas, gihinginlan na sila.
Gawas niining maong mga reklamo, duna pay laing mga insidente sa mga district hospitals nga mangasukong pukawon ang mga doktor ilabina dunay pasyente nga moabot og kadlawon.
Duna say mga reklamo nga ang ilang mga pasyente himoong praktisanan sa mga OJT nga nurse ug mga doctor.
Samtang kabahin sa ambulance, sibaw sab kaayo ang mga reklamo kay bisag emergency ug wa kaandam ang pamilya, dili gyud molarga ang driver sa ambulance kung way ibayad nga P1,500 ngadto sa P2,000.
Kaniadto pa kining reklamo bahin sa ambulance sa kalungsuran panahon ni kanhi governor Gwen Garcia. Ambot gyud kung nganong wa kini usba sa administrasyon ni Governor Junjun Davide nga “daang matuwid”.
Dili ba gud mahimo nga unahon ang paghatod sa mga pasyente sa ospital ug unya na lang panilngon inig maka-kaya nag bayad?
Nindot lagi unta kung mitunga pa sila si Dr. Cynthia Genosolango sa Capitol Integrated Provincial Health Office (IPHO) ingon man ang taga Department of Health-7 ilabina ang taga Food and Drugs Administration aron makatubag sa tanang isyu ug mga yangongo.
Ang ako unta ba, gawas nga matubag ang tanang isyu, iplastada nila ang mga programa aron malikayan ang mga palpak ngan nga nangalagad sila sa gobyerno.
Unsa man gyud ka estrikto ning taga DOH batok niining mga sari-sari store o mga gagmay’ng tindahan nga namaligyag tambal nga expire o dili expire?
Wa gani makasubay sa boteka sa Tuburan, unsa na kaha sa mga gagmay’ng tindahan?
*****
Niangkon ang akong mga amigo nga medyo lisud gyud ang bag-o lang natapos nga Bar examinations.
Matud pa nila nga “OGK” nalang maoy masayod. OGK, nagpasabot nga “Only God Knows” kung sila papasaron kay dunay mga definition of terms nga wa gyud nila matun-i ug kadto pay ilang pagkasugat sa mga legal terms.
Hinoon taliwa niini, dako gihapon kog pagsalig nga dunay daghang mga Sugbuanon ang makapasar tungod kay duha ka mga law schools dinhi sa ato nga mao ang University of San Carlos (USC) ug University of Cebu (UC) ang nakasulod sa top ten nga “Best Performing Law School” nationwide nga gi-recognized sa Legal Education Board (LEB) ug sa Supreme Court’s Office of the Bar Confidant.
Ang top 1 nga law school mao ang University of the Philippines nga may passing average nga 73.71 percent.
Gisundan ang UP sa Ateneo De Manila University Law School nga dunay 67.55 passing percentage.
Ikatulong puwesto mao ang San Beda College Manila nga dunay 67.13 percentage.
Ika-upat ang University of San Carlos 58 percent. Ika-lima ang Ateneo De Davao University nga dunay 53.02 passing pct.
Ika-unom ang University of Santo Tomas nga dunay 43.98 passing percentage.
Ang University of Cebu maoy anaa sa ikapitong lugar nga dunay 41.49 passing pct.
Anaa sa ikawalong bahin ang San Beda College Alabang nga dunay 39.10 passing pct.
Ikasiyam ang Pamantasan ng Lungsod ng Maynila nga may 35.80 passing percentage ug ikanapulo ang Xavier University nga may 32.20 passing percentage.
Ang gibasihan niining maong data mao ang cumulative performance sa mga law school sa Bar examinations result gikan niadtong tuig 2012, 2013 ug sa miaging tuig 2014.
Maglaom ko nga seryoso na’ng tun-an sa Korte Suprema ug aprobahan na ang mga hangyo nga unta i-regionalize na ang venue sa Bar examinations aron dili masakripisyo ang taga probinsiya.
Gasto kaayo didto sa Manila.