With all due respect ngadtong Cebu City Mayor Michael Rama ug sa iyang kampo, unsa pa man ang ilang personalidad nga mangayog temporary restraining order (TRO) sa Court of Appeals Cebu Station nga midawat naman siya sa two (2) months preventive suspension?
Wa nay TRO kay dili naman urgent ngan nga iya na’ng gitugyan ngadtong Vice Mayor Edgardo Labella ang liderato sa City Hall.
Ang iyang pagkanaog sa puwesto niadtong Biyernes maoy makapa-moot and academic sa issuance sa restraining order.
Ang maayo unta niadto kay wa man siya puwersaha sa taga DILG pagpakanaog kay dili pa final and executory ang suspension order, miduso unta dayon sila og motion for reconsideration sa DILG kay anaa pa silay 15 days period.
Human ibasura ang ilang motion for reconsideration, mao na unta ang ilang basihanan pag-elevate sa Court of Appeals.
Hinuon akong tan-aw masupalpal baya niini ang taga DILG. Klaro kaayo nga giduwaan si Mayor Rama sa politika ni kanhi city mayor Tomas Osmeña ug mga kaalyado sa Liberal Party.
Kung kaalyado pa lagi unta sila sa politika, wa gyu’y suspension nga mahitabo.
Sa akong mga nabasahan, mapaubos lang sa preventive suspension si Rama kung bug-at ang kaso nga iyang giatubang.
Unsa may nakabug-at ning kasoha niadtong pagguba ngan nga nagsubay si Rama sa iyang regularity in the performance of duty human nipagawas og opinion ang DPWH nga risgo gyud sa mga motorista ang gipa-construct nga center island ug lighting ni Labangon barangay Captain Victor Buendia?
Laing rekisitos pagsuspenso mao nga nakahulga siya sa mga possible witnesses ug makaguba sa mga ebedensiya.
Kining dapita dili na applicable kay wa na maimpluwensiyahi ni Rama ang mga motestigo ug dili na siya makaguba sa mga documentary evidence.
Pero kung kaalyado pa sab ni Mayor Rama si kapitan Buendia, moguba kaha siya niadtong maong center island?
Pagdaog na lang mo sunod tuig kay segurado man gyud dunay mamunbon ninyo ba.
Maglaom ko nga niining unang adlaw paglingkod ni Acting Mayor Labella, way mababoy nga mga pasahero subay sa gilusad nga transport strike.
* * *
Hapit gyud ko madisgrasya nianang high tech nga traffic light diha sa dakbayan sa Mandaue niadtong sayong gabii sa Martes, petsa 8, diha sa may UN Avenue ug may Pacific Mall.
Lupad gyud akong espirito gumikan sa ilang timer/counter sa “go signal” kay mikalit og short cut ngadto sa 5 seconds remaining gikan sa 15 seconds.
Kadto maoy una nakong kasinatian nianang high tech nga traffic light sa Siudad sa Mandaue. Ang ubang intersection way problema sa timer kay way kawat.
Ngan nga super highway nang lugara gikan sa 2nd Mandaue-Mactan Bridge mao nga nagbaguros akong dagan.
Nakabantay ko nga ni-flash back pagtakdo sa 17 seconds remaining mao nga padayon kog padagan aron gyud makalabang sa grabeng traffic.
Sus karon pag-abot og 15 seconds kalit bitaw nag kanaog sa 5 seconds mao nga puwerte gyud nakong nakatamak sa break aron way disgrasyang mahitabo.
Nakalikay man tuod sa disgrasya apan natugkan kog hubag-hubag niadtong tungura.
Sumala pa ni Norman Mendoza, among kauban sa Super Radyo ug dinhi sa CDN, nga i-mano-mano diay na ang pag-laktod sa timer/counter kung nakita sa CCTV camera sa traffic central command nga wa nay sakyanan nga approaching. Buot ipasabot nga wa nakakita nako ang ilang camera.
Kung mao nang kalakiha, risgo gyud kaayo.
Dihang akong gihisgutan kining maong isyu sa akong programa’ng “Lloyd Suarez On Board Saksi” sa DYSS Super Radyo, puwerteng daghanang mga motorista ang mitimang ug mihirit pagsaway sa maong sestema ilabina mga taxi driver kay daryot sab sila nangadombol ug nadisgrasya.
Sa akong kasinatian, kadtong 10 segundos nga gikawat daghan pa unta kaming mga motorista ang makalabang sa nag-traffic nga intersection.
Dunay public demand nga ipaundang kanang maong sestema nila ni Glen Antigua nga mano-mano kay risgo gyud kaayo sa publiko.
Maglaom ko nga aksiyonan kini ni Mayor Jonas Cortes sa labing daling panahon.
Nganong dili naman lang i-set og tag 60 seconds straight nga way short cut aron makalikay kita sa peligro?
* * *
Dunay dakong medical mission nga ipahigayon karong Pebrero ang Capitol Integrated Provincial Health Office (IPHO) didto sa Carcar City Provincial Hospital.
Libreng pagpang opera lakip na ang pagpangibot og ngipon ug consultation. Himuon kini gikan sa Pebrero 8 ngadto sa petsa 12.
Abagan kining maong kalihukan sa Philippine Medical Society of Northeast Florida.
Ang mga kaso nga ilang tabangan sa libreng operasyon mao kadtong thyroid mass or goiter, hernia o danlak sa mga bata ug tiguwang, bungi, breast mass or bugon sa totoy, problema sa matris ug sakit sa bukog.
Ang maka-avail niining maong libreng serbisyo mao ang mga residente sa Talisay City, Minglanilla, Naga City, San Fernando, Carcar City, Sibonga, Argao, Dalaguete, Alcoy,Boljoon ug ang taga Barili.
Kadtong mga intresado, giawhag pagpakigkita alang sa pre-screening sa inyong health center ug puwedeng moderekta sa Carcar Provincial Hospital ug kinahanglang magpalista daan sa dili pa ang Enero.