Nakadawat ko’g text message kagahapon sa buntag samtang nagsuwat ko ning akong lindog.
Ang reklamante nagkanayon: “Gud am sir loyd. Puede ko ngayo nmu openyun sir. Nvolve ko ug vehicular acc dec 27 with judge Dacanay, sa sketch daug ko but pag abot sa police investigator niingun ang police nga dili cya muhatag decision, opinion ra daw iyaha. Nya kay ang judge nakainom, iya ko gihadlok ipa detain ko kay damage property mahalun man ang iya auto. Nya ang police investigator niingon man sad nga puede ko madetain, citizens arrest daw den ila alalayan. Sa kahadlok nako ma detain ko ni pirma nalang ko nga ako sala. Unsa kaha sir lisud jud ko ako desisyun nahadlok ko maprisu.”
Mao nga akong gitawgan ang nag-text. Nagpaila siya nga si Jose Mamolo Jr., lumad nga taga Argao, usa ka PUJ driver.
Ngan nga duna siya’y gihuptan nga mga dokumento ilabina sa sketch, iyang gitug-an ang full name sa iyang naengkuwentro nga mao si Jasper Jesse Gerali Dacanay.
Gidetalye ni Mamolo ang insidente niadtong alas 7:20 sa gabii sa Disyembre 27 diha sa may R. Landon Jakosalem.
Matud ni Mamolo nga driver sa ruta nga Plaza Housing sa Busay, nga samtang nagsubay siya sa primary lane, kalit lang miguho ug mi-left turn ang Isuzu SUV nga gisakyan sa huwes. Mao nga nagsungag gyud sila.
Niingon si Mamolo nga wa maglangay, nigawas ang nag-drive ug nagpaila nga huwes unya nanimahong bino ug dayon nibungat nga ang iyang danyos moabot sa 250 mil pesos kay nindot iyang sakyanan taliwa nga nagaras lang ang bumper ug naliki ang suga.
Unya matud pa ang huwes nagsige’g panghambog nga pirme siya’ng nagbista og mga kaso nga vehicular accident ug suweto sa estimated damage.
Gitambagan siya sa huwes nga angkunon na lang nga siya’y sad-an kay kung dili, itaral siya sa kasong reckless imprudence resulting to damage to property ug gihulga siya nga padak-an ang piyansa ngadto sa 30 mil pesos.
Samtang gihimoan og sketch sa traffic personnel, nigawas nga sad-an ang huwes. Apan pag-abot nila sa opisina sa police investigator, nausab na ang tunada. Si Mamolo nay sad-an.
Gihulga ang PUJ driver sa huwes nga ipabalhog niadtong higayona kung di mopirma nga siya maoy sad-an.
Apan sa sinugdanan niinsister si Mamolo nga silang duha ipa-detain kay nakainom ang huwes. Gani niangkon ang huwes matud pa nga nakainom apan dili hubog.
Pero gilupig siya sa impluwensiya kay wa mangusog ang police investigator nga ipa-liquor test ang huwes.
Tungod sab sa kabalaka ni Mamolo nga adto siya mag-New Year sa prisohan mao nga nipirma na lang ang pobre nga siya maoy sad-an.
Naningkamot ko sa pagkuha sa habig sa huwes apan pakyas.
Akong gitambagan si Mamolo nga iyang ireklamo sa Korte Suprema ang mga actuations sa huwes, apan mipasabot intawon ang kabus nga wa gyud siya’y ikasugakod sa pagkiha ilabina ang pagkuha’g abogado.
Ang ako niini ba, kinahanglang imbestigahon kini ni Director Arnel Tancinco sa Land Transportation Office kay naa nay balaod nga dagko kaayo ang silot niining mga nakainom unya momaniho’g sakyanan.
Ang nakaporke ra ba matud sa PUJ driver kay ang driver’s license sa huwes giuli apan ang iya gitanggong.
Sa kalagot ni Mamolo, wa na makatarong paghinumdum sa police investigator. Ang iyang nabantayan murag PO3 Biton or PO3 Diton.
Ingon ani gihapon ka kiko ang atong balaod? Kay kumo impluwensiyado, ngan nga huwes, wa tay mahimo? Kung mao ni, inutil gihapon ang kampanya sa LTO batok sa mga abusadong driver.
*****
Kung akoy biktima sa sunog sa sitio Avocado, barangay Lahug, akoy mag-una pagpahiluna sa gitanyag nga relocation site sa UP Cebu didto sa Busay area kay sa magpaugat diha sa lugar sa nasunugan sa sitio Avocado nga dili ila.
Pagkanindot kaayo sa lugar nga ilang balhinan. Gani daghang nag-ilog ug daghang nag-away sa puwesto ilabina karon nga ang mga housing projects ug subdivisions atua na gipahimutang sa mga lagyong lugar.
Gawas pa sab, kanang pagsige’g paugat diha sa sitio Avocado wa gyu’y kalinaw nga maangkon kay pirme kalang hulgaon sa demolition.
Tam-is ug nindot gyud to’ng ato bisag gamay.
Akong subli-on, may dakong rason ang taga UP nga gamiton na gyud nila ang ilang lote diha nga dugay na’ng gipuy-an aron modako ang ilang population sa high school alang sa mga deserving students.
Ang ako, mas maayong tabangan sa mga opisyales sa Cebu City Hall ang taga UP aron mapahiluna ang mga apektado kay total di man mawala ang ilang pagkabotante dinhi sa Siudad sa Sugbo.