Samtang nagpahigayon ko’g live coverage niadtong Sabado sa hapon sa Cebu City Abellana Sports Complex sa tinuig nga Sinulog sa Kabataan sa Lalawigan sa Sugbo, dunay mga butang nga akong naobserbahan nga nakapahimong haw-ang ug nakapa-negatibo kanatong Sugboanon.
Una, wa si Gov. Hilario Davide III. Kadto maoy pinakaunang higayon nga absent ang gobernador nga unta ang nanayaw mao man ang mga singot sa kadlawon sa iyang mga konstituwente sa kalungsuran ug sa mga component cities.
Si Vice Gov. Agnes Magpale maoy nagrepresentar sa gobernador kay matod pa dunay importanteng lakaw.
Sa duha ka tuig nga nilabay, consistent si Davide nga nitunga taliwala nga dili sila kaalyado ni Cebu City Mayor Michael Rama, chairman sa Sinulog Foundation.
Apan niadtong Sabado, wala ang amahan sa lalawigan sa Sugbo. Unsa man? Guilty ang konsensiya ni Governor Junjun nga makigharong sa iyang gipasuspenso?
Laing butang nga nakapalaay kanako mao ang speech ni suspended Mayor Rama nga mihisgot pa gyud sa ilang away sa politika nga iyang gipasabot sa mga nanan-aw nga biktima siya sa political persecution.
Ang ako ba, likayan unta nato ning mga butanga kay dili kini panahon sa bugno sa politika. Wa pa gyud ta maleksiyon.
Ang nakabati pa gyud kay si Mr. Ricky Ballesteros nga maoy executive director sa Sinulog Foundation maoy unang namahayag nga ibawal nila sa mga politiko nga himuong venue ang atong kasaulogan.
Unsa man, exempted ba si Mayor Rama nga nigamit sa mikropono sa paghisgot sa isyu sa politika kay siya maoy chairman sa Sinulog?
Timan-i intawon ninyo nga maapil tag kauwaw sa atong mga bisita kung di ninyo ipadaplin kining inyong away sa politika.
* * *
Dako’ng isyu sa academic performance sa atong mga tinun-an nga maoy gipasayaw ug pasayawon sa Sinulog sa Kabataan sa Lalawigan sa Sugbo niadtong Sabado, sa Sinulog sa Kabataan sa Dakbayan sa Sugbo kagahapon ug ingon man sa atong Sinulog Grand Parade karong Domingo, January 17.
Niadtong Sabado, nakapahinuklog kaayo kanako ang gipadayag sa usa sa mga tinun-an nga graduating sa elementarya karong Marso nga wa na siya’y kasayuran kung unsa ang ilang leksiyon pagpangandam sa high school kay gikan niadtong Nobyembre, halos kada adlaw na sila’ng nagpraktis.
Gipasaligan sila nga pasar na daan ug makapaso.
Dili sa ingon nga mosuporta ko sa idea nga dili na tugotan nga pasayawon ang atong mga tinun-an.
Ang akong punto nga dili sab maayo nga tablahon na lang ang academic performance sa mga bata.
Kinahanglang hinuklogan sab kini sa atong mga kadagkoan sa Department of Education (DepEd) ilabina ni Director Juliet Jeruta.
* * *
Moalegre pagbalik ang isyu sa ownership sa yuta diha sa sitio Avocado, barangay Lahug nga maoy site sa sunog niadtong Disyembre 26.
Akong nahibaw-an nga dunay laing pamilya ang mo-claim sa ownership. Kung tinuod man kini, way legal personality ang UP ug Kapitolyo paghatag og relocation site sa mga pamilya nga biktima sa sunog.
Duna nay mihunghong kanako nga peke ang mga dokumento nga gihuptan sa provincial government ug sa management sa University of the Philippines (UP) Cebu.
Ang akong mga tinubdan nisugilon nga ang tag-iya sa maong lote mao ang pamilya’ng Magno.
Gani matud pa gipalihok na sa abogado sa mga Magno ang pagpakanselar sa title nga nakuptan sa Kapitolyo ug UP Cebu uban sa pasangil nga “fraudulent” ang pag-acquire sa mga papeles sa taga UP Cebu ug Kapitolyo.
Atong atngan ang mga kalamboan niini ilabina ang buruka unya sa korte.
Butang kini nga angay’ng tutukan sa Cebu City government.
Way tinguha si Acting Mayor Edgardo Labella nga ipa-expropriate ang lote ug adto na sila makig-negotiate sa mga Magno?
Kung tinuod man kining maong alegasyon nga iya diay kini sa mga Magno, labaw na’ng way legal personality ang taga UP Cebu ug Kapitolyo pagpahimutang sa mga biktima sa sunog.
Ang obligado nga makapapahawa sa mga biktima ug makahatag og relocation site mao ang mga Magno.