Ambot kon nakahisgot na ba ko dinhi ning maong lindog nga ang unang mga kanibal wa mokaon og lawas sa tawo tungod sa kagutom o kalagot. Ilang gihimo ang pagkaon sa patay nga lawas sa ilang mga nangamatay nga pinangga kay alang kanila, mao ra kini ang bugtong paagi nga madala nila ang ilang patay bisag asa sila madagsa. Puros kini sila mga nomad o mga libud-suroy nga wa mahibawo kon asa sila madagsa sa ilang pagpanimpalad. Kon ilang ibilin ang ilang patay sa usa ka lugar, dunay purohan nga di na sila makabalik ning maong lugar.
Nakahisgot akog kanibal karon tungod ning nabasahan ko sa Internet nga dunay usa ka babaye nga harness racer sa Sweden nga nikaon sa iyang kabayo para lumba human kini namatay. Ang maong babaye mao si Helena Stahl nga 24 anyos ug ang iyang kabayo gihinganlag si Iffy Mant.
Daghan ang misuki sa Facebook human niya gipahibawo sa tanan ang iyang gibuhat. Apan alang kang Stahl, mas maayo nga mokaon ka sa karne sa hayop nga nasinati ka ug nahibawo ka nga may maayo nga kinabuhi kay sa mokaon kag mananap nga wa ka makaila.
Dili kuno luod ang templa sa kabayo. Gani nagkanayon siya nga para kaniya ug sa iyang mga higala nga nikaon niani, maura lang kuno kinig beef o karni’s baka.
Daghan sa Facebook ang nitawag kaniyag “weird.” Apan alang kaniya, nganong ang mga ulod man maoy mokaon sa iyang kabayo nga iya man kining kabayo?
Hinuon kadtong dunay mga ransos kabayo nagkanayon: “I honestly don’t understand all this hysteria. Mankind has eaten horse meat since ancient times. Why throw away the meat? From a veterinary viewpoint, if not there is no objection, it was her horse.”
Sama gud natong mga Katoliko nga mokalawat: atong kan-on ang lawas ni Kristo kay ATO man siyang Ginoo ug buot tang mosulod siya kanato ug mokuyog kanato asa kita madagasa.
Samtang sa Netherlands, nihukom ang ilang gobyerno nga dili illegal ang pagpangayo og torjak (sex) sa usa ka driving instructor agig bayad sa iyang pagtudlo o paghatag og driving lessons.
Legal ang prostitution ning maong nasod diin ang mga sex workers motawag sa ilang kaugalingon nga self-employed ug nga mahimo silang mo-advertise sa ilang services sa pamantalaan.
Hinuon nipahimangno si Melanie Schultz van Haegen, ang ilang minister of infrastructure and the environment, ug ang ilang Security and Justice Minister nga si Ard van der Steur nga legal kining gitawag nilag “ride for a ride” basta lapas nas 18 ang mga hitungdan ug nga kinahanglan nga ang instructor maoy mo-offer niani ug dili ang estudyante.
Kay kon ang estudyante maoy mounag offer niani sa instructor, dili na kini legal kay nahimo na siyang burikat nga walay permit. Legalize and regulated ang pamurikat sa ila. Illegal kini kon walay permit.
Ang kabayo ug ang auto dili lang diay pang-ransportation.