Nagpabaya atong mga huwes?

LLOYD SUAREZ
Super Hirit
Grabe na gyud ang nahitabong kinawatay sa karaang building sa Cebu City Palace of Justice diha sa Capitol compound.
Karong bag-o gilungkab ang RTC Branch 7 nga iya kang retired Judge Simeon Dumdum.
Dunay mga ebedensiya sa mga kaso ang nakawat sama sa mga armas ug mga kuwarta nga exhibits sa mga nahuman na nga mga kaso sumaa pa ni Mario Flores, coordinator sa security agency nga misaksi pag-responde sa kapolisan ug mga tinugyanan sa korte.
Gawas niini, gisuwayan sab paglungkab ang mga sala sa RTC 5, 6 ug 18. Ang sa branch 18, nabinlan pa ang doorknob og putol sa kutsilyo.
Sa Cebu City Prosecutor’s Office gipangkawat sab ang mga compressor sa centralized air con nga gibutang sa gawas habig sa may M. Velez nga maoy hinungdan nga nag-antos na sab karon sa kainit ang mga piskal ug ilang mga support staff.
Sa RTC branch 7 nga lungkab, si on-duty guard Agustin Dionaldo sa Eagle Matrix Security Agency miingon nga niadtong Miyerkules (January 13) sa hapon niya nadiskobrehan nga abli na ang pultahan sa RTC -7.
Sa iyang spot report, giila ni Dionaldo ang tawo nga iyang nakita didto sa 2nd floor atubangan sa RTC Branch 6 nga nagbahig sa mga records kinsa trabahante sa Cebu City Prosecutor’s Office.
Ang maong tawo usa ka process server sumaa pa sa ilang administrative officer nga si Maria Liza Ocañada.
Ang guwardiya nagduda nga kadtong maong tawo maoy naglungkab ngan nga maoy pirme’ng mosaka sa 2nd ug 3rd floor kay maoy tigpahimutang sa mga case records kay ang paagi sa pag-file sa mga dokumento pasaka sa hagdanan gikan sa ground floor paingon sa 3rd floor.
Gawas niini, ila na’ng gihangyo kining maong tawo nga dili na kinahanglang ipasaka ang mga dokumento kay ang ilang gi-okopahan mao ra man ang ground floor sa building ug ila pa’ng giingnan nga puwede pa’ng gamiton ang nakabakante’ng space sa main entrance sa Palace of Justice apan wa gyud mopatoo.
Si Ocañada unang misugilon kanako nga may pagtugot ang maong tawo sa iyang sestema pagpahimutang sa mga records paingon sa 3rd floor sa building nila ni Assistant City Prosecutor Liceria Lofranco Rabillas ug ni Acting City Prosecutor Maria Luisa Ratilla.
Apan si piskal Ratilla nga akong gi-adto miklaro nga wa gyud intawon siya mohatag og pagtugot sa maong tawo sa iyang paagi.
In fairness sa maong trabahante, gipasabot sa guwardiya nga wa gyud sila maka-akto kaniya nga nangabli sa mga pultahan sa mga sala.
Pakyas ko pagkuha sa habig sa maong trabahante kay niadtong Huwebes absent siya kay kuno na-ospital iyang apuhan unya pagka Biyernes wa gyud mi magkita.
Naka-ila kaayo ko niya kinsa akong mahulagway nga medyo buotan, hilumon ug mahadlokon sa trabaho.
Gipasabot ni Ocañada nga nakasabot sab siya sa maong trabahante nga adto ipahimutang ang mga records sa mga hagdanan pasaka sa building kay duol ra sa ilang opisina unya makahatag sab og kasamok ug hamos ang hallway sa ground floor.
Niadtong Biyernes giingong gihinay-hinayan na pagpakanaug ang mga records. Akong gisaka pagbalik ug atua pay daghang nagtipon-og didto.
Ngan nga ang taga Scene of the Crime Operatives (SOCO) sa Cebu City Police Office maoy mikuha sa mga latent prints sa doorknob ug sa ubang ebedensiya mag-expect nalang ko sa maong trabahante nga mobolontaryo pag-submit sa iyang kaugalingon alang sa fingerprint comparison aron paghatag og katin-awan niining tanan.
Gawas kaniya, puwede sab nga imbestigahon ang atong mga guwardiya nga nag-duty ug ubang mga personnel nga suheto diha.
Sa nahitabong pagpanglungkab, way plano si RTC Executive Judge Soliver Peras nga pun-an og guwardiya ang kara-ang building sa korte?
Unsa ka tinuud nga daghan pa’ng kawatonon nga mga butang diha?
* * *
Na-alarma ko sa pagpusil-patay sa urban poor leader sa Barangay Lahug nga si Virgilio Gaviana nga mas nailhang “Tatay Billy”.
Si “Tatay Billy” usa sa mga adviser sa mga biktima sa sunog diha sa Sitio Avocado Lahug ug maoy gihatagan og SPA (Special Power of Attorney) sa pamilyang Magno isip caretaker sa propedad nga ilang gi-okopahan diha sa ilang basketball court, volleyball court ug sa ubang dapit.
Dunay mga higayon nga nang-reklamo sila si Tatay Billy ug Robert Ortega kanako kay gihulga sila nga papahawa-on sa mga representante sa mga Gaisano ug gani nag-abot sila sa barangay.
Dihay insidente nga gibato sila si Tatay Billy human nga wa gyud sila mopahawa ug isip bawos gibabagan ni Tatay Billy ang gate pinaagi sa pagparking sa iyang van nga sakyanan ug hangtud karon anaa pa diha karon ang van.
Naka-ila kaayo ko ni “Tatay Billy” kay kauban ni sila’ng Ortega diha sa luyo nga bahin sa Barangay Hall sa Lahug kay kanunay sila’ng magpaliga sa duwang basketball sa mga bata ilabina panahon sa summer.
Duna silay pundok nga gitawag og SASA kon Sunrise All Sports Association.
Ang biktima daan na’ng mitugon sa iyang mga silingan nga iyang pakamatyan ang maong basketball court diin anaa siya gihaya karon.
Si Acting Mayor Edgardo Labella nanawagan sa taga National Bureau of Investigation (NBI) nga motabang pag-imbistigar sa kaso.
Ang mga pulis sa Mabolo mihatag na sa mga silingan og hulagway sa usa sa tulo ka mga suspetsado sa pagpamusil apan naglibog ang pamilya ug mga silingan kung unsay gibasihan sa PNP kay way testigo nga nakatumbok sa mga suspetsado.
Intresado gyud ang pamilya nga modangop sa NBI, sumaa pa sa asawa nga si Dorie kay wa silay salig sa kapolisan.
Pero unsa ka tinuud kining bag-o nako’ng nasagap, nga ang motibo sa krimen may kalambigitan ang politika?