Super Hirit
Aron gyud nga ma well-guided kitang tanan tugoti nga akong kopyahon ang kinatibuk-ang kalihukan niining nagpadayong ika 51st International Eucharistic Congress (IEC) basi sa records sa kapolisan sa Cebu City, Mandaue ug Lapu-lapu.
Nasugdan ang mga preliminary meetings sa mga kadagkuan sa Simbahan ug mga organizers diha sa Montebello Hotel sa Banilad, Cebu City gikan sa January 19 hangtud pagka January 21.
Sa Mandaue, niadtong January 20-22 gipahigayon ang “IEC Theological Symposium” sa Cebu Doctor’s University sa North Reclamation Area.
Diha sab sa Mandaue sa may Oakridge Pavilon gisugdan niadtong January 19 ang ika 112th Catholic Bishop Conference of the Philippines (CBCP) Plenary Assembly diin tapuson kini karong adlawa January 25.
Kagahapon petsa 24, alas 4:00 sa hapon maoy opening mass diha sa Plaza Independencia ug pagkabuntag sa alas 8:00 mao na ang “51st International Eucharistic Congress Proper” diha sa IEC Pavilion sa Pope John Paul Avenue Cebu City sa Mabolo. Kadto ra’ng mga delegado sa IEC ang gitugtan nga makasulod ug mga accredited nga mga sakop sa media.
Karong adlawa petsa 25, sa alas 8:00 sa buntag sumpayan ang mga kalihukan diha sa IEC Pavilion unya karong alas 2:00 sa hapon dunay Press Conference and Concurrent Session diha sa Waterfront Hotel Lahug Cebu City.
Ugma sa buntag Martes petsa 26, ipadayon ang mga aktibidadis diha sa IEC Pavilion ug inig ka alas 3:00 sa hapon dunay laing “Concurrent Session” diha sa Waterfront Lahug.
Sa adlaw’ng Miyerkules petsa 27, sa alas 8:30 sa buntag makatutok gihapon ang kapolisan sa mga eksklusibong kalihukan sa 51st IEC diha sa IEC Pavilion unya inig ka hapon 1:00pm-7:00pm mao ang “Parish Encounter”.
Dinhi sa Cebu City napulo ka mga parokya ang involve niining maong kalihukan nga mao ang: Cebu Metropolitan Cathedral Parish; San Rogue Parish sa Mambaling; Our Lady of Lourdes Parish sa Punta Princesa; Sto. Rosario Parish; Our Mother of Perpetual Help Parish-Redemptorist; Our Lady of Sacred Heart Parish Capitol; Our Lady of Guadalupe Parish; Saint Thérèse of the Child Jesus sa Lahug; Saint Joseph the Patriarch sa Mabolo ug Sacred Heart of Jesus.
Didto sa Mandaue ang upat ka mga simbahan nga malambigit sa “Parish Encounter” sa Jan. 27 sa samang takna mao ang: San Rogue Parish sa Subangdaku; Gethsemane Parish sa Casuntingan; Holy Family Parish sa Maguikay ug ang National Shrine of St. Joseph.
Sa adlaw’ng Huwebes, January 28, sa alas 8:00 sa buntag magpadayon diha sa IEC Pavilion Cebu City ang mga kalihukan sa mga delegado.
Ning maong adlaw, daku sab kaayo ang kalihukan diha sa dakbayan sa Lapu-lapu ug Mandaue nga mao ang “Youth Day”. Gikan pa sa sayong buntag ang mga kalihukan sa sulod sa Hoops Dome Lapu-lapu diin dunay Santos nga Misa inig ka udto.
Sa hapon dunay “Catechesis” diha gihapon sa Hoops Dome unya mga alas 4:00 sa hapon himoon ang “Pilgrim Walk” gikan sa Hoops Dome paingon sa Mandani Bay sa Mandaue City duol sa Cebu Doctors’ University. Tungod ning maong “Pilgrim Walk” daku ang posibilidad nga dili gyud paagi-an sa mga sakyanan ang karaang taytayan sa Mactan-Mandaue Bridge.
Sa January 28 gihapon, inig ka gabii gikan sa alas 7:00 hangtud alas 10:00 sa gabii mao ang “Visita Iglesia” sa pito (7) ka mga simbahan dinhi sa dakbayan sa Sugbo nga mao ang Basilica Minore del Sto Niño; Cebu Metropolitan Cathedral; Sto. Rosario Parish; Sacred Heart of Jesus; Redemptorist Parish; Our Lady of the Sacred Heart-Capitol ug ang Asilo de Milagrosa.
Gawas sa “Visita Iglesia” dunay Overnight Vigil sa Plaza Independencia ug sa Mandani Bay.
Sa January 29, adlaw’ng Biyernes sa buntag ipadayon diha sa IEC Pavilion ang mga kalihukan. Duna say “General Assembly of the World Federation of the Eucharistic Works of the Church diha sa Seminaryo Mayor de San Carlos Auditorium Cebu City.
Inig ka alas 4:00 hapon mao ang daku’ng Santos Nga Misa diha sa Cebu Provincial Capitol ug isunod ang procession paingon sa Plaza Independencia.
Sa petsa 30 adlaw’ng Sabado, sa buntag, magpadayon ang mga kalihukan sa mga delegado diha sa IEC Pavilion ug pagkahapon mao ang Santos nga Misa diha sa Cebu City Sports Complex ug isunod ang 1st Holy Communion sa mga bata.
Sa January 31, maoy katapusang adlaw sa ika-51st International Eucharistic Congress. Kini maoy labing daku nga kalihukan nga gitawag og Statio Orbis o “Misa Ng Mundo” nga bana-banang tambungan sa sobra usa milyon ka mga pilgrims diha sa South Road Properties sa alas 4:00 sa hapon.
Kabahin sa pag-suspenso sa mga klase, gihatagan sa DepEd ang mga private schools og diskresyon pagpakanselar o dili basta ang importante nga ma-comply ang 201 nga required school days.
Sa memorandum no. 28 ni Cebu City Schools Division Superintendent Bianito Dagatan, lima (5) ka mga eskuwelahan ang iyang gideklarar nga di gyud magklase gikan karong adlawa Jan. 25 hangtud sa petsa 30 nga gilangkuban sa Mabolo Elementary; Bagong Lipunan Elementary; Bario Luz Elementary, Mabolo High School ( Day & Night) ug ang Bario Luz (Day & Night) High School.
Wa say klase gikan sa Jan. 28-30 ang Abellana National School (Night) ug City Central NHS (Night).
Sa January 29, sa samang memo, way klase sa Guadalupe ES, Ramon Duterte MNHS (Day & Night), Tejero NHS (Night), Lahug Night HS ug ang Lahug ES (afternoon classes).
Sa Jan. 29-30, way klase ang Abellana National High School (Day) City Central School ug ang City Central NHS (Day).
Sa solemn nga opening mass kagahapon didto sa Plaza Independencia ni His Eminence Charles Maung Cardinal Bo gitambungan sa daghan kaayong mga pilgrims.
Naay concern sa ubang mitambong ilabina sa wa makasulod nga wa gyud tawon silay nadunggan kay way mga speakers nga gimontar sa gawas.