Nakatawa ko sa akong experience kagahapon sa hapon samtang misuway ko pagsulod sa IEC Pavilion bisan way ID accreditation.
Ang akong tuyo didto mao gyud kung puwede pa ba nga maka-isyu ang ilang secretariat og ID namong mga sakop sa media nga wa ka-isyuhi aron way limit ang among access sa bisan asang venue ug mga kalihukan niining nagpadayong 51st International Eucharistic Congress.
Sa tinuud lang kami sa DYSS Super Radyo mi-attempt mi makadaghang higayon pagpa-rehistro online sa Internet sa website sa 51st IEC. Apan pakyas mi kay ni-crash ang ilang system niadtong mga higayuna.
Pun-an pa sab ang among signal sa Internet nag putol-putol unya nagkamang.
Mao nga mi-adto ko aron maka-hirit og ID ug aron sab maka-saksi didto sa mga panghitabo.
Bisag wa koy ID gipasulod ko sa gate 3 sa Seminaryo Mayor kay ang mga guwardiya among mga tigpaminaw. Wa sab ko kuti-kutiha sa atong kapolisan kay nakaila man ug nakasabot sa akong trabaho.
Pero dihang naka-abot nako sa main entrance sa IEC Pavilion gibati nako og kaulaw kay sa tanang tawo didto ako ray way ID ug way white wrist band. Hehehe.
In fairness, gipasulod ko kay akong gi-esplikar nga mo-adto ko sa secretariat nga in-charge sa mga sakop sa media.
Ang duha ka mga gitugyanan maoy akong giduol ug mi-esplikar nga dili na gyud sila puwede nga maka-isyu og ID kay maoy patakaran sa mga organizers.
Mao nga wa nalang sab ko maglangay ug migawas sa IEC Pavilion kay tingali’g makuhaan ko’g hulagway sa mga intresado unya i-post sa social media.
Pasalamat nalang ko nga nakasimhot ug naka-lili og kadyot sa venue sa bililhon kaayong kalihukan.
* * *
Kung kinsa may modaug nila’ng Governor Hilario “Junjun” Davide III ug Atty. Winston Garcia pagka-gobernador sa Sugbo karong Mayo, panahon na nga seryosohon ang pag-renovate sa Cebu International Convention Center (CICC).
Kini aron magamit sa higayon nga dunay mga dagkung kalihukan sama sa nagpadayong 51st International Eucharistic Congress (IEC).
Kung wa pa seguro maguba ang CICC niadtong kusog nga linog sa October 15, 2013 ug wa pa gi-capitalize sa pamolitika ang CICC tingali usa kini sa mga venue sa mga kadagkuan sa Simbahang Katoliko sa ilang mga kalihukan sumpay sa IEC.
Pagka-anugon gyud sa CICC nga wa tagda sa pagpa-ayo ni Gov Junjun bisan duna nay pagtugot sa Ombudsman.
Manghinaut ko nga kining misa sa Kapitolyo karong Biyernes ug ang prosesyon maoy makapahigmata sa atong mga politiko nga dili i-hostage ang atong mga kabtangan ug dili samotan ang pag-usik-usik sa atong kuwarta.
Kung duna may corruption si kanhi Gov. Gwendolyn Garcia ug mga department heads sa Kapitolyo pagpatukod sa CICC, manubag sila sa hukmanan.
Ang ako lang wa unta pun-i ni Gov. Junjun ang pag-usik-usik sa kuwarta sa katawhan nga maoy gipatukod sa CICC.
Sugdi na intawon na’g ayo ninyo aron di madunot!
* * *
Unsa naman sab ni ang akong nadawat nga estorya nga ipatuman gyud sa management sa Qimonda IT Center nga pabayran na ang ilang parking area sa mga buot mo-parking?
Di ba gud ni apil sa kontrata pag-abang sa Supreme Court diha sa 3rd ug 4th floor sa building sa Qimonda nga libre sa parking ang tanang court personnel ug ang publiko nga may legitimate purpose sa husgado?
Maglaum ko nga mahangyo nila ni Court Administrator Midas Marquez ug RTC Executive Judge Soliver Peras ang taga Qimonda nga dili idayon ang pay parking kay mosamot ka apike ang kahimtang sa mga trabahante nga gagmay’g suweldo.
Sama sa CICC, manawagan sab ko sa mga kadagkuan sa Korte Suprema nga hina-hinayan na ang pagpa-retrofit sa atong karaang building sa Cebu City Palace of Justice aron makabalik sila diha.
Wa pay makalupig sa desenyo sa atong karaang building unya hamugaway pa kay daku’g lugar unya wa pay problema sa supply sa tubig ug sentro pa kaayo.
Sama sa akong giingon nga lig-on gihapon ang kara-ang building. Dili na kinahanglang magbag-o kita’g building.
Sa mga experto kaniadtu miingon nga insakto na kaayo nga mogasto ang gobyerno og P100 million alang sa pag-retrofit sa building.