Lloyd Suarez
Akoy naluoy sa mga tiguwang nga ginikanan niadtong batan-ong babaye nga namasangil nga gilugos pa gyud siya sa iyang guwardiya sa Department of Justice (DOJ) witness protection program gikan nga gi-gang rape sa iyang mga silingan sa dakbayan sa Lapu-Lapu.
Si Nang Pacing, dili tinuod niyang ngan, mipadayag sa iyang kahiubos kay wa na sila tabangi sa Crusade Against Violence (CAV) sa ilang pagpangayo og hustisya.
Matud niya nga iya na lang isayaw sa Sto. Niño ang iyang mga kahiubos.
In fairness ni Thelma Chiong nga maoy chairperson sa CAV miingon nga mi-withdraw na sila sa pagsuporta kay wa siya makasabot sa inahan. Buot ipasabot nga dunay mga misunderstanding.
Mitiyabaw sab si Nang Pacing kay duna silay abogado nga giduol apan gipangayoan sila og P50 mil pesos nga acceptance fee plus per court appearance. Pobre intawon kaayo ang pamilya sa biktima ug way ikasugakod.
Nagkinahanglan sila og pro bono nga private lawyer/lawyers nga dunay passion sa profession ug tinud-anay nga serbisyo nga andam mobugno paglangkat sa hustisya.
Mao nga akong gihangyo si manlalaban Elaine Bathan presidente sa Integrated Bar of the Philippines kon IBP Cebu City Chapter nga makatabang sa pamilya.
Niadtong Biyernes, miadto sila si Nang Pacing sa IBP Cebu City Chapter unya gitugyan sila sa IBP Cebu Province Chapter kay residente sila sa dakbayan sa Lapu-Lapu ug gitagad sila ni manlalaban Delfin Quilaquil ug gitun-an pa sa abogado kun ila ba gyung dawaton sa ilang free legal aid program.
Maglaum ko nga tabangan sa IBP ang pamilya sa biktima ngan nga ang suspetsado giduphan sa iyang mga labaw sa DOJ kay marshal sa witness protection program ug nakakuha pa sa serbisyo ni manlalaban Noel Archival kinsa milampos sa pagpa-dismiss sa kaso sa level ni piskal Felixberto Geromo sa dakbayan sa Mandaue.
Ang pamilya nagtinguha og reconsideration sa findings ni piskal Geromo.
Maglaum ko nga moabot kining kasoha sa korte aron adto himoon ang full blown trial aron maklaro ang tanan.
Kun dili pa konbinsido ang nagdumala sa witness protection program nga si piskal Llena Ypong sa krimen nganong iya mang gisuspenso ang iyang marshal nga gipasanginlan?
Akong sublion nga dili gyud tawon buang ang biktima. Apan kun atong sakyan nga buang ang biktima, samot na unta nga ilang protektahan og tarong.
Kun buang ang biktima sumaa pa ni Ypong, nganong nadugay man sa ilang safehouse nga dili man sila capable mo-handle ug buang nga tawo?
Buang na ang biktima ron kay mireklamo naman sa tawo ni Ypong nga makaguba sa iyang liderato?
* * *
Nagkagidlay og samot ang atong mga bombero sa Cebu City Fire Department pagpawong sa sunog niadtong Sabado sa buntag sa may Zone 3, sitio Barracks, barangay Ermita ning Siudad.
Haskang paeta gyud kay dunay bata nga napaig ug dunay upat nga nangapaso.
Daghang katarungan nganong paspas kaayong mikatap ang sunog tungod kay sagad sa mga structure gama sa kahoy, pun-an pa sa kusog nga hangin ug ang kagamay sa agianan alang sa mga fire trucks nga naglisud pag-responde.
Basta Ermita na gani ang sunog, wa gyuy maayong laki nga bombero nga makapawong dayon. Tiaw muna miabot og oras kapin una na-under control sa kabomberohan.
Gikinahanglan gyud nianang lugara nga palapdan ang kalsada.
Kinahanglang sutaon sab ang hinungdan sa sunog taliwa nga dunay mga istorya nga naggumikan sa electrical wiring ug ang gipangpondo nga mga pabuto sa usa sa mga stalls.
Mas maayong subayon sab sa mga bombero kun dili ba gumikan sa pot session sa mga drug addict kay nabantog na kanang lugara nga lunggaan sa mga adik.
* * *
Grabe gyud karon katugnaw didto sa northeast ug sa midwest sa America tungod sa snow storm nga mugna sa gitawag nga polar vortex o grabeng bugnaw gikan sa North Pole sa kalibutan.
Niadtong milabayng mga adlaw mirehistro na og negative 51 ang ilang temperature nga matud pa kun maabtan og 5 minutos ang tawo nga mogawas sa ilang panimay, delikado nga ma-frozen.
Dinhi sa ato sa Pilipinas niadtong Sabado, ang Baguio City nakarehistro na ug 10.5 degrees Celsius.
Ang taga-Philippine Atmospheric, Geophysical and Astronomical Services Administration diha sa Mactan miingon nga ang grabeng gibugnawon karong hinapos sa Enero ug sa unang semana sa Pebrero posibleng makaapas sa record sa pinakabugnaw nga panahon niadtong pipila na ka tuig ang nakalabay nga mirehistro og 21 degrees Celsius dinhi sa Sugbo.
Niadtong Sabado sa gabii hangtud sa pagsuwat ning maong lindog kagahapon sa hapon puwerte gyung bugnawa sa panahon pun-an pa sa way puas nga uwan ug taligsik.
* * *
Pagkanindot niining kalamboan sa gihimong pagtuon sa usa ka Australian firm nga Gas2Grid Limited nga dunay dakong pondo sa lana-gasolina diha sa bukirang bahin nga pag-utlan sa dakbayan sa Carcar ug Aloguinsan.
Ang kompaniya mibana-bana nga moabot gikan sa 4 million ngadto sa 42 million barrels nga pundo sa lana ang maong lugar. Pero sa ilang best estimate maka-supply kini og 12 million barrels.
Kun matigayon man kini makapabulahan kaayo sa taga-Carcar ug Aloguinsan kay makapasulod kini og trabaho ug makahatag kini og dakung income sa mga local government units ilabina sa Kapitolyo.
Laing benepisyo nga atong makuha mao nga posibleng mabarato na ang presyo sa gasolina dinhi sa ato kay duna tay kaugalingong source.
Tinuod dakong isyu sa kalikopan ang oil production sa usa ka lugar apan kinahanglang kuwentahon sab nato ang benepisyo nga atong makuha niini.