Lisud ning mga tomboy kung maoy mahigugma. To the max gyud ang selos.
Sagad sa akong nailhan nga mga tomboy nga kung di magtubok sa kaugalingon human mapakyas sa gugma, maoy makapatay sa iyang hinigugma o ba kaha sa karibal.
Sama sa nahitabo didto sa Bohol nga grabe gyud ka brutal.
Selos ra gyu’y naingnan sa tomboy nga si Maricel Ramos ngadto sa iyang hinigugma’ng policewoman nga si PO1 Rosalie Cuario nga wa na mopakita kaniya.
Patay gyud ang inahan sa policewoman ug igsoong lalaki ug duna pay kritikal human nag-wala ug namusil si Ramos sa mga biktima human nga iyang gitoho-an nga gitago-tagoan sa pamilya ang iyang hinigugma nga unang gidudahan nga naka-uyab sa kaubang police.
Porbida gyud ning gugma, makabuang! Nahibaw-an nga ang policewoman mibasol sa iyang mga kaubang pulis sa Calape kay matud pa overkill ang pagpatay sa iyang hinigugma’ng tomboy. Inay adto mosimpatiya sa iyang kabanay nga gipamusil apan atoa na hinoon sa laing tawo.
Namasangil matud pa si PO1 Cuario nga bisag mi-surrender na si Ramos ug miisa sa iyang mga kamot apan gipusil gihapon sa iyang mga kauban.
Paet gyud kung ang tawo mabiktima sa OGG kon (Olipon sa Gugmang Giatay).
Kaniadto sab, among duha ka mga silingan nga mga tomboy mihimo’g managlahing paghikog kay ang usa gibiyaan sa iyang uyab samtang ang ikaduha nabuntis ang iyang gika-live-in.
Kining mga hitabo-a ebidensiya kini nga di gyud maayong supakon ang kabubut-on sa Diyos nga ang lalaki alang gyud sa babaye.
Insakto gyud kining baruganan sa Simbahan nga nagsupak sa same-sex marriage kay ang labing tinuod mapunta ra gyud ang abnormal nga relasyon ngadto sa kaalautan kay di gyud maangkon ang tim-os ug kompletong kalipay sa duha ka mga binuhat.
* * *
Pagkaluoy gyud kung tumo-tumo lang ang kasong rape batok kang Donald Geniston kinsa kanhi nagranggo ug Senior Inspector sa PNP ug kanhi hepe sa kapolisan sa Sante Fe Police Station ug lumad nga taga Lorega San Miguel ning dakbayan.
Depensa sa kanhi opisyal sa kapolisan nga wa gyud niya hilabti ang biktima. Nahimo nilang katabang sa panimay ang biktima.
Sulod sa panarbaho sa complainant sa banay’ng Geniston, nakapanghilabot kini sa alkansiya hinungdan nga ang mga ginikanan sa 15 anyos gipatawag sa Barangay Lorega.
Apan natingala nalang ang pulis nga siya nay gikiha’g rape. Gituho-an nga gisakyan sa pamulitika ang kiha kay ang amahan niining kanhi pulis milansar pagka kapitan.
Laing depensa ni Geniston nga wa siya kahatagi’g due process sa Ombudsman Visayas nga maoy nag-conduct sa preliminary investigation.
Gani sumaa pa, wa sila makadawat og summons aron tubagon ang kasong rape nga criminal ug ang kasong administratiba.
Alang nako kinahanglang mokuha si Geniston og maayong laki nga abugado nga mo-depensa kaniya aron ma-reinstate siya kung tinuod man nga inosente siya.
* * *
Grabeng kahi-ubos karon sa mga piskal ug ilang mga support staff human nga ilang nakompirmar nga ang ilang mga kaubang trabahante sa Department of Justice nga mao ang taga Public Attorney’s Office (PAO) ug mga kawani dagko kaayog gidawat nga bonus niadtong miaging Pasko.
Samtang silang mga piskal ug mga empleyado sa prosecution service nag-antos sa tag 2 mil pesos apan ang mga abogado sa PAO nakadawat og tag 90 mil pesos samtang ang mga ordinaryong kawani sa PAO nakadawat og tag 60 mil pesos.
Asa man tawon ang hustisya niini?
Unsa may kalainan sa PAO ug sa mga piskal nga sila ra ma’ng departamentoha? Pulos sila under sa Department of Justice (DOJ).
Daghan ang mikuwestiyon ni former Justice Secretary Leila de Lima kung asa pa-ingon ang ilang savings sa personnel services kay sumaa pa daghan kaayong mga bakante nga mga position nga maoy hinungdan nga gamay ra unta’g sweldo-hanan.
Dunay ubang mga piskal ang mipadayag nga lahi ra gyud ang liderato ni De Lima kay sa kang PAO Chief Persueda Acosta.
Namahayag ang uban nga di gyud makatilaw sa ilang boto si De Lima pagka senador karong Mayo.
* * *
Nakahigayon ko pagduaw sa lamay sa patay’ng lawas ni retired RTC judge Esperanza Fiel Garcia o Ma’am Inday niadtong Biyernes sa gabii sa Crystal Palace sa Cosmopolitan Funeral Homes.
Sa entrance pa lang daan, pwerte’ng daghanang tawo. Puno kaayo sa mga sakyanan ug taas kaayo ang linya sa mahalon nga mga buwak.
Naka-ingon ko sa akong kaugalingon nga pagka-nindot sa kamatayon ni Ma’am Inday kay bisan ang mga kontra sa politika sa pamilyang Garcia mi-respeto gyud sa pagduaw ug nakig-unong sa pagbangutan sa pamilya.
Akong nahibaw-an nga usa sa mga mibisita niadtong unang mga gabii mao si former Chief Justice Hilario Davide Jr. nga amahan ni Governor Junjun Davide.
Nakaduaw sab si House Speaker Sonny Belmonte ug ubang mga kongresista kinsa pulos nang-reklamo sa grabeng traffic sa Lapu-Lapu ug Mandaue.
Ngan nga duol na ang eleksiyon, di gyud kalikayan nga apil sa kulokabildo sa mga bisita mao ang mga pangandam sa piniliay.