Super Hirit
Saludo ko sa lider nga makamao nga mopaubos kay diha sa pagka-mapaubsanon makita ang sinsiridad sa panerbisyo.
Karon akong naobserbahan nga nalimot na ang taga BO-PK ug Team Rama nga importante kaayo ang pagpaubos kay sa maglumba’g pagarbohay nga makapaalaut sa Siudad pagbayad og minilyong interest sa utang sa SRP.
Kining atong problema pagbayad sa loan sa SRP butang kini nga angay’ng tutukan. Ipadaplin intawon ang inyong personal nga interest kay temporaryo ra kini’ng tanan.
Nganong iinsister man gyud ni Mayor Michael Rama ang pagpasar sa Supplemental Budget No. 1 sa miaging tuig nga komplikado naman kaayo?
Nganong i-insister man sab ni Cebu City Councilor Margot Osmeña nga ipatagi-tagi ang pagbayad sa SRP nga naa may kuwarta?
Ang labing maayo nga hinuktukan sa atong mga haligi sa Siudad mao ang pagbayad sa tanang obligasyon sa SRP aron papas ang tanang penalty pinaagi sa pagpasar og bag-ong Supplemental Budget for 2016.
Ayaw mo’g palabi kay dili na inyong kuwarta!
* * *
Daghan sa atong mga huwes ug mga court personnel ang nagpangurog sa kahadlok niadtong miaging simana tungod sa ka luag sa security diha sa Cebu City Palace of Justice sa may Qimonda IT Center human nasudlan og armado’ng tawo niadtong Martes (Feb. 9).
Usa sa akong amigo nga si “Sir J” nanglipagho gyud pagkahibawo niya niadtong hapona kay nagtoo siya nga totally secured sila diha sa Qimonda.
Daku ni’ng sagpa ni RTC Executive Judge Soliver Peras kinsa maoy nagdala sa army reserve sa Armed Forces of the Philippines (AFP).
Kami’ng mga sakop sa media, dili pasudlon ni Judge Peras kaniadtu sa iyang sala kung dili mo-submit og proper identification nga dili man unta mi mga criminal, assassin ug mga terorista. Ug ang among gipang-bitbit: ballpen, notebook, camera, telepono ug uban pa nga wa makalapas sa security protocol.
Pero dunay tawo nga gihinganlan’g Mark Solon nga nagpailang combat / karate instructor yano ra kaayong nakasulod sa Qimonda nga unta angayang sitahon ubos sa “plain view doctrine” kay gibaat raman ang iyang armas nga .45 cal sa iyang paa nga nagkarsones og maong ug naka-upper uniform sa Philippine Navy.
Nagpasabot ba kini sa pagka-incompetent ni Judge Peras ug sa iyang mga security personnel?
Suwerte lang nga dihay sundawo nga naka-ako sa pagpangutana ni Mark Solon kung unsay iyang code ug butang nga wa makatubag ang kanahan nga maoy sinugdanan nga gi-alarma siya.
Kung wa pa, tan-aw ko laing John Pope ang magwala sa korte ug posibleng magpasagad nalang sa pagpamusil ilabina ngadto sa iyang target nga si PO3 Edmund
Tiempo nga maoy nakadakop kaniya niadtong tuig 2013 sa Kamagayan sa pagdala niya’g nubain.
Asa man diay ang atong mga pulis nga nagbantay diha sa Qimonda? Nagtug-tug sa pansitan?
Kumusta man tuod ang atong mga huwes? Armado na ba sila tanan? Nakaagi na sa gun safety seminar? Estrikto ba sila sa ilang practice shooting?
Ang akong usa ka amigo mikomentaryo nga praktisado sila pero hangin ray maigo. Hehehe. Pag sure mo oi!
* * *
Samtang “adlaw sa pagminahalay” o Valentine’s Day kagahapon apan subo kaayong palandungon kay alarming na kaayo ang gidaghanon sa mga magtiayon nga nagtinguha nga ipaanular sa korte ang ilang kaminyoon.
Sa bag-ong data nga akong nakuha gikan kang Atty. Jeoffrey Joaquino nga maoy clerk of court sa Cebu City Regional Trial Court (RTC) Central, niabot sa 394 ka mga kaso ang ubos sa jurisdiction sa mga family courts niadtong tuig 2014.
Sa tuig 2015 niabot sa 375 ka mga kaso. Unya sa maong statistics sa duha ka tuig, 90 percent niini mao ang mga kasong “declaration for nullity / annulment of marriage, sumala pa ni Atty. Joaquino.
Nahug nga halos matag adlaw dunay kaso bahin sa pagpaanular sa kaminyoon ang i-file sa husgado.
Dunay mga huwes ang mitug-an kanako nga ang panagbulag sa magtiayon naggumikan niining Facebook kay adto makit-an ang mga ebedensiya sa pagkamabudhi-on sa kaminyoon.
Nganong magminyo pa man kung magbuwag ra diay gihapon? Daghan pa gyud kanato ang wa makasabot sa mga responsibilidad sa kinabuhing minyo? Nganong magpatuga pa man?
Kinahanglang paspasan ug dublihon sa Simbahan ang ilang pakiglambigit sa isyu sa marital problems.