Salins Hulbot
Sooner or later we learn to throw the past away / History will teach us nothing” —Sting
Migukod si Bernie Sanders kang Hillary Clinton pagka Democratic party presidential nominee sa US samtang gitabla karon ni Ferdinand “Bongbong” Marcos, Jr. si Chiz Escudero sa pinaka bag-ong survey tali sa mga vice presidential candidates sa Pilipinas.
Ang youth sector, or to be precise, ang millennial youth sector.
Cute ang appeal sa usa ka hippy nga lolo sama ni Sanders alang sa mga bata-on sa America nga kasagaran ga-fantasize o ga-idealize sa Woodstock Concert niadtong gitawag nilag summer of love. Ug alang kanila, ang socialist nga senador sa Vermont usa ka ambassador niadtong mao nga romantic movement. Kining relic sa “make love not war” era nakapa excite usab sa mga bag-ong tubo ug mga first-time voters tungod sa iyang mga panaad nga free education ug mas maayong health care program.
Ang laing appeal ni Sanders mao sab ang iyang pagka outsider sa political system. Misugod si Sanders sa politika isip independent. Year of the Outsiders man gud kuno karon matud pa sa US media. Ug tungod niani, ang bilyonaryong negosyante nga si Donald Trump nga wala pa maka tinir og elected position mao usay gauna sa pagka Republican party presidential nominee.
Sa wala pa mogawas kining maong survey, may higala na ako nga expat nga galingo-lingong niingon nga Bongbong appears to be unstoppable. Si Bongbong ang bugtong anak nga lalaki ni kanhi diktador Ferdinand Marcos. Ug tungod niani, parat o aslom ang ngan nga Marcos sa tanan nga nakaabot pa sa martial law. Labi na niadtong gipang-torture o may mga kaila nga gipangpatay sa military.
Apan nagkanayon si Marcos nga dili na issue ang martial law karon kay sa iya kunong paglibot-libot ug pangampanya, walay ni usa nga mihisgut kabahin sa maong giingon nga issue. Matud pa niya ang kasagarang pangutana nga mosugat kaniya may kalabutan sa pagpangitag trabaho ug sa public transportation.
Mga tulo na ka dekada sukad nawala ang martial law ug kasagaran sa mga bag-ong botante wa nay alamag kabahin sa mga abuso sa militar niadtong panahon sa amahan ni Bongbong.
May nangutana kon angay ba diay ipasa ang sala sa amahan ngadto sa anak. May mitubag nga bisag dili sala ni Bongbong ang nahitabo niadto apan ang iyang dili pag-angkon nga sayop kadto sa kagamhanan sa iyang amahan nagpasabot nga malagmit iya kadtong mausab.
Tingali kining mga bag-ong tubo mao unta tingali ni ang maayong sakop sa Bagong Lipunan sa amahan ni Bongbong.