Super Hirit
Subo gyud kaayong palandungon nga dunay mitumaw karon nga isyu batok sa taga City Intelligence Branch sa Cebu City Police Office nga dunay pito (7) ka mga police operatives ang gipasanginlan nga nangwarta sa ilang mga dinakpan niadtong Domingo sa hapon diha sa Duljo Fatima sa C. Padilla.
Kung tinuod man kini, kinahanglang ipa-ubos sa summary dismissal proceedings ning mga kanahan nga naka-kuwarta og 150 mil pesos ngadto sa mag-agaw’ng Mervin ug Christian Pardillo bugti sa ilang kagawasan.
Paeta gyud, kay samtang dunay ubang mga pulis nga seryoso kaayo sa kampanya ug andam makigpinatyanay sa ilang mga kabaro tungod sa problema sa drugas apan anaa ni’ng uban nga nagniyabag sa serbisyo.
Segun sa ikatulong nadakpan nga si Lito Paculanang, nga siya maoy pa-angkonon sa mga shabu ug gipasaligan sa amo sa mga Pardillo nga siya piyansahan.
Kung seryoso man ang mga kadagkuan sa Police Regional Office (PRO-7) pag-imbestigar kinahanglang ilang i-secure si Pardillo aron himoong testigo kay tingali’g kuoton kini didto sa prisohan.
Unya hisgot naman gyud ta’g kampanya batok sa illegal nga drugas, nindot kaayo nga gidawat sa atong mga politiko ang hagit nga sila magpa-ubos sa drug test.
Anhi makita kung deserving ba gyud silang mangalagad sa katawhan.
* * *
May pagka-inutil gyud ning atong mga kadagkuan sa Department of Public Works and Highways (DPWH) ug ingon man kining atong mga local government officials kay kuwang sa koordinasyon pagpalapad sa atong mga kalsada.
Kanyahay ra nga di gyud makasulbad sa problema sa traffic kay kuwang sa panglantaw sa unahan samtang mopatuman sa mga proyekto.
Usa sa akong nakit-an karon mao kining nagpadayong road concreting project diha sa may Doña Modesta Gaisano Street sa may Sudlon Lahug nga usa kana sa mga access road sa Lahug to Guadalupe and Escario – Capitol vice versa.
Ang wa nako masabti mao nga nganong wa gyud mapalapdi ang kalsada sa kontraktor nga Goldfin Construction nga unta ang yuta diha iya man sa Cebu Provincial Government.
Timing gyud unta kaayo nga mapalapdan ang kalsada ug gani akong tan-aw pwede pa makamugna og four lane kay government property ang mga sikbit nga lote.
Ang gihimo karon sa kontraktor mao ra gyud ang pag-ayo sa existing nga gamay’ng kalsada ug gibutangan og gutter.
Nagpa-ila lang gyud kung unsa ka inutil ni’ng atong taga gobyerno.
May unta nga lingkuran nila ni Governor Junjun Davide, City Mayor Michael Rama ug DPWH Director Ador Canlas aron sa posibleng pag-apil ni’ng akong proposal.
Alang nako kinahanglan man gyud nga mapalapdan na’ng maong kalsada diha kay daghan na kaayong mga nag-opisina nga mga national agency diha sa Sudlon Lahug.
* * *
Nakatawa ko sa akong nadawat nga mga impormasyon gikan sa mga tawo ni Governor Junjun Davide diha sa Kapitolyo kay matud pa daghan kaayong mga job order employee (JO) ang nangabuntis.
Usa sa mga opisina nga gitumbok mao ang Provincial General Service Office (PGSO).
Dili gyud unta isyu kung mga minyo na ug kauban permi ang bana. Pero ang nakaporke man gud kay mga dalaga pa.
Mahatagan gyud baya og malisya sa huna-huna sa publiko ni’ng maong isyu kay dunay mga department heads sa Kapitolyo nga pwera buyag mga kugihan sab kaayong mosabak-sabak sa ilang mga staff.
Ang usa nga wa maka-antos ning-resign gyud uban sa iyang minyo nga sekretarya.
Way plano si Gov. Junjun nga magpahigayon siya’g mass wedding aron mapahimutang intawn ang kinabuhi sa mga mamahimong inahan?
* * *
Medyo masulbad na ang problema sa parking space diha sa Qimonda IT Center nga anaa ang Cebu City Palace of Justice.
Kay gipahawanan na sa management sa Qimonda ang dakong bakante gamit ang heavy equipment.
Dili na mahugawan unya sa lapok ang sapatos sa atong mga abogado ug posibleng wa nay tubig uwan nga magpondo.
Pero ang nakaporke lang niining parking area sa Qimonda, i- negosyo na sa tagdumala kay pabayran naman.
Way kalainan sa ubang mga private establishments nga pabayran og mahal ang parking.
Ang akong nahibaw-an nga librehon sa bayranan ang atong mga huwes ug mga clerk of court.
Mao nga mitiyabaw karon ang mga court personnel kay ilang nahibaw-an nga anaa sa kontrata sa Korte Suprema nga libre silang tanan sa parking.