Super Hirit
Ang pamilyang Oyao sa dakbayan sa Lapu-Lapu, pinaagi sa ilang abogado nga si Atty. Rameses Villagonzalo, mipalag sa mga napublikar nga anaa kining grupo nga gitawag og “Oyao Drug Group”.
Niadtong Lunes niingon si Atty. Villagonzalo nga dili gyud makiangayon kay way basihanan nga existing kining maong pundok.
Sumala niya nga nihulga ang pamilya’ng Oyao nga mokihag libel ug damages batok sa kapolisan ug sa mga sakop sa media nga mobalik-balik paghisgot niining maong pundok.
Ang abogado nitug-an nga naulawan pag-ayo ang pamilyang Oyao ug nahadlok sanglit init kayo ang kapolisan ngadto sa mga Oyao subay sa gitoho-ang kalambigitan ni anhing Joel Oyao Amistad pagpatay niadtong Sabado kang PO3 Antonio Inihao Jr.
Subay sa pagpatay kang PO3 Inihao, di pa gyud klaro kung si Joel Oyao Amistad ba gyud ang nakapatay.
Pero 90 porsiento nga ang pagpatay ning maong pulis naggumikan sa iyang subsub nga kampanya batok sa illegal nga drugas.
Luoy lang kaayo ang pamilya ning maong pulis kay gagmay pa ang iyang upat ka mga anak.
Samala lagi sa akong giingon nga samtang dunay mga pulis nga seryoso na kaayo sa kampanya pakiggubat batok sa mga nalambigit sa sindikato sa drugas, apan subo nga palandungon nga dunay mga police scalawags.
* * *
Unsa na man sab ning akong nadawat nga mga reklamo gikan sa mga residente sa lungsod sa Asturias nga miatake na man sab ning grabeng langaw?
Duna nay mga pamilya nga nagkalibanga kay di gyud makaya ang pagbugaw sa mga lagom nga motugpa ug mobatog sa ilang mga pagkaon.
Usa sa mga residente sa Barangay Manggiyaw nga nagpaila, ni-text kanako ug nagkanayon nga: “Gud pm sir loyd, ako i-padangat sa kahanginan kining among problema sa kadaghang langaw sa among barangay ang manggiyaw sa lungsod sa Asturias. Perti na gyud daghana ug kung mangaon mi daghan kaayong mga langaw nga motogdon sa among pagkaon. Nagpuli-puli nalang og kalibanga akong mga anak. Ning uwahi ang ako na pod asawa. Daghan na kaayong poultry ang gitukod sa barangay langub ug among barangay manggiyaw ug sa barangay agtugop. Paeta na kaayo sa among kahimtang”.
Ang mga molopyo nireklamo kang Asturias Mayor Allan Adlawan kay maoy nitugot niining maong mga poultry farm.
Akong tawgon ang atensiyon ni Dr. Cynthia Genosolango, hepe sa Capitol Integrated Provincial Health Office (IPHO), ug ingon man sa taga Department of Health
(DOH-7) aron sulbaron kini ug alang sa posibleng misting operations sa maong mga barangay.
Dili na gyud komedya kung langaw nay moatake kay kini maoy labing hugaw nga matang sa insekto nga maghulga sa panglawas sa tawo.
Tagda intawon ninyo ni!
In fairness ni Mayor Adlawan, wa pa siyay nadawat nga report bahin niini ug iya pa’ng ipasusi sa iyang mga tawo.
* * *
Dunay dakung kalihukan karong Biyernes diha sa Provincial Capitol Social Hall nga gitawag og “Yukbo Alang sa Mga Sugbuanong Kompositor” agig paghandom nila ni Minggoy Lopez, Mil Villareal, Mahnee Cabase ug Ben Zubiri (Iyo Carpo).
Niining maong kalihukan, atong masaksihan ang mga kantang Binisaya nga i-perform nilang Max Surban, Hannah Villame, anak ni anhing Yoyoy Villame, ug sa ubang mga local performers.
Ang tumong ug tuyo niini aron maka fund raising drive ang pundok nga gitawag og CURTA Corp. kon Cebu United Radio and TV Artists Corporation.
Kining maong pundok nga CURTA Corp. maoy miabag sa mga mi-retiro na ug niadtong aktibo pa nga mga artista sa entablado ug telebisyon nga maglisud intawon sa panahon nga magka-ospital, mabiktima sa kalamidad ug mamatay.
Sumala pa nila ni Aljin Abaquita, program director, ug Tata Buo, secretary sa CURTA, nga tag 300 pesos ang ticket.
Sulod sa maong kalihukan dunay tribute ngadto kang Cora Rosales Jayma nga dramatorgo ug singer kinsa maoy original nga nag-awit sa kantang “Pasayawa Ko Day”.
Maglaum ko nga atong kaabagan ug suportahan kining maong kalihukan.