Super Hirit
May punto kining pasangil sa mga kapitan dinhi sa dakbayan sa Sugbo nga ang kalayo sa distansiya ug ang pagkatungason sa labayanan sa atong basura didto sa Consolacion maoy naingnan sa ilang pagka-inutil sa problema sa garbage collection.
Niadtong Sabado atol sa among programang “Dialogue On The Air” sa DYSS Super Radyo nga nagtuki bahin sa problema sa basura, nag-abot ang mga kapitan nga dumadapig ni kanhi Cebu City Mayor Tomas Osmeña sa Bando Osmeña-Pundok Kauswagan (BO-PK) ug ang mga kapitan nga kaalyado ni Cebu City Mayor Michael Rama sa “Team Rama”.
Sa BO-PK mitunga sila si Guadalupe Barangay Captain Michael Gacasan, Tejero Barangay Captain Jessielou “Jing” Cadungog ug iyang konsehal nga si Rodrigo Albaño nga chairman sa waste management.
Samtang sa Team Rama mitambong sila si Tinago Barangay Captain Joel Garganera, Inayawan Barangay Captain Lotlot Ignacio Soon ug si Agsungot Barangay Captain Noli Anne Alcover.
Sa wa pa magsugod ang programa, akong gipasidan-an ang duha ka habig nga ang tinuud lang maoy isulti sa kahanginan ug dili ipamolitika ang isyu sa garbage collection aron way sinukliay sa kumo ang mahitabo.
Naklaro sa diskusyon nga niadtong diha pa sila maglabayan sa Inayawan Sanitary Landfill, paspas ang ilang pagpangolekta. Ang usa ka garbage truck makalabay makatulo sa usa ka adlaw unya minus ang guba sa mga sakyanan kay dili tungason.
Sukwahi na gyud nga atua na ang labayanan sa Consolacion nga layo ug tungason kay ang sagad sa garbage truck makalabay nalang og kausa sa usa ka adlaw unya dali kaayong maguba ang ilang mga unit.
Gani sumala pa nila nga maproblema gyud sila sa panahon nga ting-uwan kay dangog kaayo ang agianan sa labayanan ug halos tanang mga trak sa basura nakatilaw na og haybol.
Sumala pa usab sa mga kapitan nga molanat sa duha (2) ngadto sa tulo (3) ka oras ang biyahe sa ilang mga trak gikan sa ilang barangay ngadto sa labayanan sa Consolacion gumikan sa grabeng traffic kay mipatuman sa truck ban ang dakbayan sa Mandaue.
Si Kapitan Gacasan mihagit usab sa publiko ilabina ngadto sa mga sakop sa media nga di lang kutob sa pagkuha og litrato o video sa mga basura nga nagtipon-og sa kadalanan.
Kinahanglang adtoon sab ang labayanan sa Consolacion aron sutaon ang kalisud sa paglabay.
Akong nahibaw-an nga dili gyud kaayo kasugakod ang mga trak sa barangay ug dali kaayong maaberiya kay gagmay rag makina ilabina kung China made.
Ang sulbad mao nga balhin tag labayanan nga kanang patag unya duol ra gyud.
Si Kapitan Cadungog sa Tejero mipika sa Rama administration kay puwerte kaayong nakalaslas sa ilang supply sa krudo matag buwan.
Kaniadto nga sa Inayawan pa, 300 litros matag buwan ang krudo nga ihatag sa matag truck sa basura apan karon nga atua na sa Consolacion, katunga nalang.
Apan gisupo siya ni Kapitan Garganera sa Tinago ug ubang kapitan nga kaalyado sa Team Rama kay matud pa silang tanan nga mga barangay parehas og problema bahin sa gasoline allocation.
Gitumbok ang konseho nga dominado sa BO-PK nga maoy sad-an kay puwerte’ng nakalaslas sa budget.
Gipasabot sa taga Team Rama nga wa gyud pasagdi ang di nila kaalyado nga mga kapitan.
Dili gyud kalikayan nga ultimong pagpangolekta sa basura gipamolitika sa atong kanahan nga mga opisyal.
Maglaum ko nga bahalag maglumba silag pamolitika, ang importante nga dili manimaho ug dili hamos ang atong mga barangay.
* * *
Niadtong Domingo sa hapon, natingala ko kay pagkadaghan ba sa atong mga senior citizens sa Barangay Lahug ang nagdesente og sininaan.
Mao nga nangutana ko kanila kung unsay kalihukan. Gitubag ko nga paadtoon sila sa Rama compound sa Barangay Basak San Nicolas alang sa usa ka tigum.
Usa sa mga miyembro sa maong grupo nga nakauli og alas 10 pasado sa gabii ang misugilon kanako nga didto sa venue sa Rama compound gipanghatagan sila og libre’ng panihapon ug gipadalhan silag bring house nga tag duha ka kilong bugas humay.
Gawas sa lamiang panihapon, gikantahan sila’g “Carmela” ni Mayor Rama. Ambot nganong “Carmela” gyud kang Mike nga Stephanie man unta o ba kaha Joy. Hehehe.
Ang laing nindot nga balita nga gipasalig ni Rama ngadto sa mga edaran mao nga karong buwan sa Abril sa dili pa ang eleksiyon sa Mayo, ibulto niya ang paghatag sa financial assistance nga tag P10 mil kay nadawat naman nila ang tag P 2 mil sa unang hugna sa distribution sayo ning tuiga.
Gawas niini, palapdan ang panerbisyo ngadto sa mga senior citizens sama sa punto medical ug ang paspas nga pag-release sa burial assistance.
Bugno gyud ni sa politika kay si kanhi Mayor Tomas Osmeña himoon niyang P15 mil ang financial assistance sa mga senior citizens kung siya’y makadaug.
Pero ambot kung di ba kini panglingla.