#Nine

Dunay usa ka inahan sa America nga nalipay dihang ang iyang autistic nga anak namakak kaniya. Gika-ingon man gud nga ang mga autistic dunay ilahang kaugalingong kalibutan. Maglisud sila pagsabot ug gali pag-ila sa atong kalibutan nga gawas sa ila. Ug tungod niani mao nga nalipay kaayo ang usa ka inahan nga namakak kaniya ang iyang anak kay nagpasabot kini nga naka-amgo na ang iyang anak nga lahi ang iyang kalibutan sa kalibutan sa ubang mga taw sama sa iyang inahan. Namakak siya kay nahibaw na siya nga ang iyang nabuhat o gihunahunaang buhaton dili madawat sa kalibutan sa iyang inahan.

Miangkon ang inahan nga usa ka sukwahi nga kalipay ang iyang gibati kay ang ubang ginikanan masuko man kun mamakak ilang mga anak.

Ang anhing John Lennon sa Beatles gahimog iyang kaugaling kalibutan nga atong masudlan pinaagi sa pagpaminaw sa usa ka kanta nga iyang gihimo pinaagi sa pag-record og lain-laing loop sa mga recording nga iyang gipahaum ngadto sa basic track. “Revolution 9” ang title niani ug naapil kini sa ilang “White Album.” Ning maong track, may madunggan kang tingog nga mosulod lag kalit og moingog “number 9.” Giingon nga dunay mild form of autism si John Lennon.

Daw duna usab akoy pagka-autistic kay kasagaran sa akong ganahan lahi ra man sa gusto sa uban. Usahay makig-lalis ko. Usahay di na lang ko motingog ug igo na lang moyango. Usahay mamakak ko. Usahay mangita kog paagi nga mahulagway nako ang duha ka kalibutan.

Kun dunay mangutana kanako karon kun kinsay akong bet sa Miss Cebu 2014, nga karong Myerkules na ang piniliay, tubagon ko silag pina low-tide-high-tide nga tubag. Si contestant #9 ang akong personal choice pero si contestant #2 ang akong practical bet.

Duna naman guy archetype ang mga hurado ug kasagarang mohaum sa ilang template lahi ras akong ganahan. Mao nga kun makatambong kog beauty contest, mopili akog personal ug practical bet. Ang personal maoy akong gigwapahan apan ang akong practical bet maoy akong pustahan kay kini may gituhoan kong mohaum sa template sa judges. Duna gyud hinuoy judges nga gusto magpalahi apan panagsa ra kayo kini mahitabo.

Apan basig niabre na ang akong kalibutan kay gatuo ko nga ako ray giganahan ni #9 apan ang mga higala kong maniniyot nga ka-edad ra nako mipili usab diay kaniya. Dunay usa ka editor nga miingong angid-angid ang hitsura ni #9 kang Glaiza de Castro nga artista sa GMA. Duna poy usa ka designer nga midayg sa iyang postura ug pahiyum. Gawas kang 2 ug 9, mo-side bet ko sa numbers 3 ug 12.

Dihang gi-sultihan ko ang akong amigo sa akong gipamili, miingon siya nga papustahan kuno ni nako sa lotto. Pero morag kuwang mag duha ka numero. Ug kon suertres, sobra ra usab.