Salins Hulbot
Meet the Digitarians nga naila usab isip iGen, Homeland Generation, Post Millennials, Digital Natives, Generation Z ug Centennials. Gikaingon nga natao kini sila gikan sa 1995 ngadto sa 2010. (Apan may moingon usab nga nahimugso kini sila gikan sa tuig nga 2000 paingon na ngadto sa 2025).
Sila ang generation nga nagsunod sa Millennials (nga natao gikan sa 1980-2000).
Kon ikaw sama kanako nga naskop sa Generation X ayaw nalag patugatuga pag duwag DOTA batok sa mga Digitarian. Kilawon ka nila nga buhi.
Kon ang uban nga nasakop sa laing henerasyon mosampit sa ilang ginikanan inig recover nila gikan sa katalagman, ang mga digitarian, inig ka regain sa ilang consciousness, mangita sa ilang smartphone. Kasagaran kanila, wala pay elementary nakakupot o nakahikap na og cellphone. Sobra na ko sa 30 anyos dihang nakagamit ko ug cellphone ug computer. Kini sila murag pagkalutas nila nag Facebook na.
Gianga-an usab kini silag “stay connected” generation. Gikaingon nga dunay dakong dag-um ibabaw sa ilang panan-aw sa ilang kaugmaon. Tungod kini kay natawo sila human sa global recession ug sa pagkahugno sa twin towers sa New York.
Gikaingon nga mas agresibo kini sila kay sa Millennials. Mas duna silay technological savvy. Mas taas silag kaalam ug giingon nga mas dali kini sila makakitag trabaho.
Sa akong nakaila nga digitarians sa call center ang ilang kandidato pagka presidente mao si Duterte. Mahimuot kos ilang rason kabahin sa ilang choice. Matud pa nila maayo kuno si Duterte maoy ma presidente kay wa na kunoy mang snatch og cellphone.
Kon wa ako masayop kini sila mao usab ang nakapasaka sa survey ratings ni Bongbong Marcos. Wala na sa ilang bokabolaryo ang Martial Law. Batan-on og nawong si Bongbong ug gi-ila siya nga champion sa alternative energy. Ang iya sang kampanya sa pagdugang og trabaho daw mi-klik sa mga magtulungha nga sakop sa lower income group families.
Kaming mga sakop sa Generation X mokurog kon makahinumdom sa mga torture sa martial law. Apan ang Digitarians nga wala pa matao niadtong panahuna gatuo nga maayong balikon kadto para kuno kita ma disiplina. Apil sa dystopian fantasy ang hero/strongman solution sa gobyerno. Mao kini ang generation nga nagpasikat sa Hunger Games.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
