Dili unta gubat ug gubot apan gugma maoy mopatigbabaw niining padayong pangampanya sa atong mga local ug national candidates.
Maayo unta nga kuhaan og panag-ingnan sa atong mga kandidato ang mga nindot nga mga mensahe niadtong 51st International Eucharistic Congress (IEC).
Malikayan ang dugoong pangampanya kung mo-focus lang ang mga kandidato sa ilang mga maayong plataporma de gobyerno ug likayan ang mga personal nga isyu ug ubang matang sa kampanya nga makatandog sa garbo.
Pagtarong kamo ug paglikay sa kagubot!
* * *
Nahimuot ko sa akong nasaksihan niadtong Huwebes sa gabii diha sa Capitol Parish Church atol sa Bisita Iglesia kay gitugtan nga maka-parking ang driver ni Mayor Rama sa “no parking area” sa atubangan ug sulod sa compound sa simbahan.
Ang rason sa traffic enforcer sa ilang pagtugot pagpa-parking ni Mayor Rama mao nga aron idayon pag-release ang ilang honorarium ugmang adlawa, Martes.
In fairness ni Mayor Rama, angayan lang sab nga hatagan siya sa maong pribilihiyo kay gawas nga miduyog siya sa kadaghanan nga nagpahigayon og Bisita Iglesia, nagmonitor usab siya sa mga kalihukan sa Simbahan nga apil sa iyang obligasyon.
Gawas pa sab, sama sa uban, wa magdugay ang grupo ni Mayor Rama sa maong simbahan.
Wa sab niya ipamolitika ang iyang presensiya niadtong higayona kay wa siya manglamano (handshaking) ngadto sa katawhan.
Agig pagtimbaya sa Mayor, akoy miduol kaniya ug milamano kay sa matag tuig nga Bisita Iglesia wa gyu’y sipyat nga magbagat mi ni Mayor Rama.
Maglaom ko nga dili hipokrito si Rama nga bisan kung dili na siya opisyal sa gobyerno, himuon gihapon niya kini ug magpabiling tinarong ang iyang mga binuhatan sulod ug gawas sa opisina.
* * *
Nakapaminaw ug nakakita ko sa telebisyon sa tipik ug kabahin sa gipanulti ni Cebu Auxiliary Bishop Dennis Villarojo atol sa “Siete Palabras” niadtong Biyernes Santo nga iyang gipanghimug-atan ang mga panghitabo niadtong pag-host nato sa ika 51st International Eucharistic Congress.
Ang akong naabtan mao ang kabahin sa iyang pagsaysay sa mga salawayong batasan sa mga delegado ug ang pagkama-abi-abihon natong mga Sugbuanon.
Ang nakanindot kay ang gipikhan ni Villarojo mao ang mga Tagalog-speaking nga mga delegado nga nangasuko human wa tugti nga mo-reserve og lingkuranan diha sa IEC Pavilion alang sa ilang mga kauban nga mga delegado nga na-late pag-abot.
Duna say eksena nga makauulaw kaayo kay ang mga langyaw nga delegado napugos intawon pag-uli sa ilang mga kandila atol sa prosesyon dihang ang mga delegado’ng Pinoy naglumba ug nanag-ilog sa mga kandila.
Pero ang nakanindot lang kay dihay taxi driver nga Bisaya nga nasayop paghatod sa iyang madre nga pasahero nga wa na maningil sa plete kay sumala pa maoy iyang itampo sa IEC ngan nga di siya makasulod sa IEC Pavilion.
Duna say usa ka lugar diha sa Kalunasan nga gidayeg ni Villarojo kay puwerte kaayong nakahatag og tinud-anay nga serbisyo sa duha ka pari’ng langyaw.
Ang mga gisaysay ni Bishop Villarojo nakapalab-as sa akong makauulaw nga experience dihang akong giadto ang ilang secretariat sa IEC Pavilion nga wa ko’y dalang ID aron lang sa pagpakisayod kung puwede pa ba nga maka-isyu sila og mga ID kanamo sa news and public affairs sa DYSS.
In fairness lagi intawon namo sa DYSS niadtong higayona nga naghinangat ang IEC, ni-attempt kami makadaghan pag-avail sa on-line registration alang sa media coverage ug pagkuha og mga ID.
Apan pakyas gyud mi kay dihay mga higayon nga mo-bug down ang on-line registration unya nagkamang ug hinay kaayo ang among Internet connection.
Mao nga nangahas intawon ko pag-adto sa IEC Pavilion bisan way ID.
Nakasulod man tuod ko sa venue bunga sa mga buhat sa kaluoy apan nauwaw sab ko sa akong kaugalingon kay ako ray way ID.
Wa na lang sab ko mamugos sa secretariat ug bisan sa mga kadagkoan sa Simbahan nga kahatagan kami og pribilihiyo nga maisyuhan gihapon og ID tungod kay nipatigbabaw kanako ang kaikog kay nasayod ko niadtong higayona nga puwerte’ng daghanang gisulbad nga mga problema sila si Bishop Villarojo.