Salins Hulbot
Dihay ka usa nga ang late night show comedian nga si David Letterman nakahisgot og Chicago ug mipakpak ang iyang live audience. Miingon ang hanggaw: “Why? Are you all from Chicago or you just love to hear the name of places that you know?” Dili pa presidente si Obama niadtong panahona. Diha na ang play nga
Chicago ug inila na usab ang banda nga Chicago. Pero niadtong panahona, sikat kaayo ang Chicago Bulls ni Michael Jordan.
Apan tinuod, daw mabuhi ang atong dugo kon makadungog ta sa mga lugar nga duna tay kasinatian, bisan pa man kon wa kita makataak niani.
Sama ra usab nga dunay mga lugar nga daw walay impact kanimo kon duna man gani mohisgot niani. Dunay termino sa journalism niadto nga “Afghanistanism.”
Usa kini ka description sa balita kabahin sa usa ka lugar diin ang target audience sa usa ka news wala makaila. Hinuon na “out of date” na ang maong termino human nagpunay og ka headline ang gubat sa Afghanistan.
Pero duna say mga lugar nga mabutang sa back seat kay duna silay mas sikat nga sound alike. Sama sa Austria nga masigi intawog ka saypan nga Australia sa mga kuwang og kahibawo. Ug niadto, kon mohisgot kag Brussels, tanduon ka lang sa imong ka istorya nga moingog, “Ah, Brazil!” Kon moingon ka gud og Brazil, mahulagway mo dayon ang mga topless dancers sa ilang festival, mga football matches sa ilang team ug ang mga model nga nangdagsa diri sa Pilipinas.
Lahi rag pronunciation ang Latin American nga nasod sa capital sa Belgium, apan nahitabo lang nga ang iyang sound alike mas mabulokon sa atong bagulbagol. Ug karon, kining subo ug duguong hitabo didto mao nay mosulod sa atong hunahuna kon dunay mohisgot sa maong lugar.
Ang Brussels maoy capital sa Belgium nga maoy political capital sa Europe. French ang popular nga sinultian sa Brussels nga mao usay giilang “de facto capital” sa European Union. Flemish ang ikaduhang pinulongan sa maong lugar nga dunay 1.8 million population.
Mga makina ug pharmaceuticals ang gaunang exports sa Belgium, apan kanatong dili suhito niani, mas nakahibawo kabahin sa chocolate ug wafer sa maong nasod.
Ang pinaka iladong actor sa maong nasod mao si Jean-Claude Van Damme. Ang sikat nga mga musikero mao ang sexy nga si Axelle Red ug ang harmonica player nga si Toots Thielemans. Gikan usab sa Belgium ang surrealist painter nga si Rene Magritte.
Apan karong bag-o, nahimong kapital usab sa mga terorista ang Brussels. Tungod kini kay daghang mga misplaced nga batan-on nga dunay Middle Eastern roots nga human mapriso, moadto man sa Syria, moapil sa ISIS og mouli sa mga Belgian ghetto og mag-suicide bomber, tingali agig panimawos sa katilingban nga napakyas sila pagsulod. Dili relihiyon ang problema sa ilang lugar kon dili socio-economic ra gihapon.
Ngil-ad ang nahitabo nga pamomba sa Brussels. Hinuon lami man lang gihapon ang nga Belgium.