Salins Hulbot
Kay di man gyud ni mo-undang, mangayo tag tabang sa mga graphic illustrator sa pag morph sa nawng ni kanhi presidente Marcos ug ni 60s actress Rosemarie Sonora kay tan-awn tag mogawas ba ang nawng ni Grace Poe. Tingali ang dili makuha pinaagi sa DNA test makuha sa illustration.
Kay matud pas kolumnista sa Manila Times nga si Rigoberto D. Tiglao duna kunoy “slip of the tongue” si Grace Poe dihang mi-ingon kini nga magpa DNA test siya uban kang Senador Bongbong Marcos apan inig human na sa eleksyon.
Nganong inig human pa man sa eleksyon, nangutana ang manunulat. Nahadlok ba kini nga manaug ang iyang rating sa survey kon mahibaw-an sa tanan nga anak diay siya ni Marcos. Pero nganong kusog man kaayo sa survey si Bongbong kon tinuod nga makadaut sa kandidatura ang connection sa kanhi diktador.
Gitubag ra sa manunulat ang iyang pangutana. Matud pa niya ang nahadlukan ni Poe dili lang ang iyang connection ni Marcos kon dili ang pagkawagtang unya sa “magic” sa iyang adoptive dad nga si Fernando Poe Jr. nga mao karoy gahatag og kusog sa iyang kampanya. Ug gawas pa niini mahanaw unya sa sugilanon nga iyang gibaligya -nga siya kinit-an sa simbahan sa Iloilo, gihatag ni Cardinal Sin ngadto sa usa ka haciendera nga fan ni Susan Roces. Ug nga kining maong haciendera maoy nagtugyan kaniya ngadto sa magti-ayong Poe nga sikat nga mga artista niadto.
Murag telenovela ang sugilanon nga mao karoy gipalakaw sa kampo ni Poe. Hatagan ta kini sa tilte nga “Ampon.” Pero ang laing sugilanon napuno usab og intriga ug maong tawgon ta kinig “Lihim.” Nagkanayon kini nga si Grace Poe bunga sa relasyon ni kanhi presidente Marcos ug ni Rosemarie Sonora nga igsuon ni Susan Roces. Wala maghimog pelikula ang sikat nga 60s teen star pagka September 1968 kay nanganak kini. Gi adopt ang maong bata sa magtiayong Susan Roces ug Fernando Poe.
Matud pas mga tsismoso gibayran kuno ni Marcos ang actor nga si Ricky Belmonte pagminyo ni Rosemarie. Mibungag tulo ka anak ang ilang panagtipon. Usa niani mao si Sheryl Cruz (nga dili buot magpakuhag DNA para mahibaw-an kon paryente ba sila ni Grace Poe). Gibiyaan si Belmonte ni Rosemarie nga milarga sa America ug naminyog lain. Dihay hugon-hugon nga gay si Belmonte maong gibiyaan kini sa iyang asawa.
Usa sa mga katarungan nga dili mamatay ang ikaduhang sugilanon mao nga may mas gibug-aton kini. Mas katuohan nga mo adopt ang magtiayong Poe sa ilang pag-umangkon kay sa anak sa wa nila ilhi. Ug kon wa pay gitagoan si Sheryl Cruz nganong di man kini magpa DNA.
Ug nganong inig ka liwas pa man sa pinili-ay magpa DNA test si Grace Poe uban kang Bongbong Marcos.
Sa ato pa, posibleng Marcos-Marcos ang sunod natong mga pangulo.