Super Hirit
Ako’y nalooy sa usa ka maanyag nga 15 anyos nga batan-ong babaye nga akong gi-anggaan og “Leah” nga taga Samar nga anaa dinhi sa dakbayan sa Sugbo nag- eskuwela sa high school.
Si “Leah” nakabig dinhi sa Sugbo nga mangindahay tungod sa kalisod sa kahimtang sa Samar ug kasamtangang nagbalhin-balhin pagpuyo.
Usahay adto siya mo-ipon sa iyang igsoon nga may ka-live-in ug usahay adto siya sa iyang giila nga amo.
Si “Leah” nga akong na-interview kay gi-ubanan nila ni Vilma Bartolome, GAD focal sa Barangay Busay ug sa mga tanod, mi-asoy nga napriso siya sulod sa tulo (3) ka adlaw niadtong miaging simana sa Carbon Police Station kay gitahapan siya sa taga UNITOP nga nag-shoplifting.
Apan dihang gisubay sa CCTV camera sa maong tindahan, wa makapanghilabot si “Leah” nga maoy hinungdan nga wa siya kasohi sa piskaliya ug gipabuhi-an.
Pagka-paet gyud sa sugilanon ni “Leah” kay gawas nga way klarong ka-on ug kinatulgan sulod sa prisohan sa kasong way hinungdan, gibinastos pa gyud sa mekaniko sulod sa Carbon Police Station.
Matud niya nga gihagkan iyang ngabil sa usa ka mekaniko. Wa siya kalighot kay gikuptan pag-ayo ang iyang mga bukton.
Samtang gisakay na siya sa service car o patrol car kay i-turn-over siya sa Barangay Lahug niadtong Huwebes sa gabii, gihinol-hinol iyang mga paa sa usa ka police.
Nakahigayon ang maong police pagbinastos kaniya kay ang kaubang police mikanaug sa police car kay dunay gipalit.
Gawas nga gihimas-himas si “Leah”, gihatagan siya’g cellphone number sa police kay buot kini’ng makiglaag/ makig date kaniya sa adlaw’ng Biyernes uban sa pasalig nga hatagan siya’g kinyintos pesos ug cellular phone.
Si “Leah” nakahilak pag-ayo kay gipakaubos gyud iyang pagka-dalaga sa mga tawong tampalasan ug mapahimuslanon sa higayon.
Andam gyud siya’ng mokiha ug mangayog hustisya.
Akong gipatawgan ni Super Christian Dave Rivera akong kauban nga technician sa DYSS Super Radyo niadtong higayuna ang numero nga gihatag sa pulis ngadto kang “Leah” aron makatubag sa isyu.
Nagpaila ang nakatubag nga siya si PO3 Ronald Borres. Dihang giingnan siya nga patubagon sa isyu on the air, gibutang ang telepono ug dili na ma-contact.
Si “Leah” nakahinumdum nga samtang didto pa siya sa Carbon Police nakit-an niya nga nagdala’g name plate nga “Tumalo” ang pulis nga nagbinastos kaniya.
Gitawgan sab namo ang Carbon Police Station kung may PO3 Borres ug Police Tumalo apan gipasabot sa nakatubag nga wa ni’ng mga pangalana. Ang nakatubag dali sang mibutang sa telepono dihang gi-angnan nga interbiyuhon.
Ngan nga medyo sensitibo ning maong isyu, akong gitugyan pagbalik si “Leah” sa GAD focal sa Busay nga maoy iyang gidangpan aron gyud katabangan ug suportahan sa taga Department of Social Welfare and Services.
Una siya’ng giturn-over sa Lahug Barangay Hall apan sumaa pa ang GAD focal wa motoo sa iyang pasangil ug giingnan siya nga likayan ang pagreklamo aron dili madaot ang pangan sa kapolisan. Pastilan kung tinuud ni, wa gyu’y mga ayo!
Sa kasamtangan gipa-pahuway una si “Leah” tungod sa traumatic experience nga iyang na-agi-an gikan sa mga tawo nga naghatag kaniya og inhustisya.
Manawagan ko ni Police Regional Office-7 Director, Chief Superintendent Patrocinio Comendador nga imbestigahon ning maong reklamo ni “Leah” ug kinahanglang dunay police lineup aron maila gyud ang responsable ug malimpiyohan kadtong nadudahan.
Way yabag nga tawo nga nakahimo sa krimen nga magpa-ila.
Manghinaut sab ko nga tabangan sa taga Children’s Legal Bureau (CLB) kining biktima. Hatagi intawon ninyo og tino nga hustisya.
* * *
Samtang dunay pipila ka mga pulis nga magpabadlong apan kinahanglang daygon ug atong pasalamatan kining mga pulis nga nakatampo og daku.
Sukad kaniadto, nakadayeg na gyud ko kang SPO2 Meliton Agadier nga anaa karon nadestino sa Argao Police Station.
Niadtong nadestino siya sa Carcar, bisag off-duty nakatayming pag-responde sa kasong pagpanulis sa PUJ diha sa M.J. Cuenco.
Ang tulisan nga misukol napatay sab ni SPO2 Agadier.
Karong bag-o didto sa Sitio Upper Oman Barangay Binlod Argao napatay ni SPO2 Agadier ang nakigpinusilay nga wanted sa pagbaligya’g shabu nga si Marlon Miñoza nga taga Pulangbato ning dakbayan.
Manghinaut ko nga dunay daghang SPO2 Agadier nga klarong wa magpagawong niining mga drug lord.
Way tinguha ang mga kadagkuan sa PRO-7 nga i-recommend si SPO2 Agadier alang sa spot promotion?