Wa na gyu’y respeto ning ubang mga politiko kay bisag sakyanan sa minatay, kab-itan pa gyud og tarpaulin nga anaa ang ilang pangan.
Niadtong Domingo sa udto sa Lahug, nakasunod ko’g minatay paingon nga ilubong.
Sa lubot sa porlon dunay pangan sa usa ka kandidato pagka-konsehal sa dakbayan sa Talisay nga “Aldin Diaz”.
Una nakong pagsabot nga siya maoy namatay. Apan pagkaduol na nako sa gisakyan sa minatay, sayop diay ko.
Hinoon way magbuot sa mga Diaz kay ilaha man ang porlon sa Saint Francis Funeral Homes, apan unta ba, respeto lang ta gamay sa minatay ug sa mga kabanay nga nagbangutan.
Gawas pa sab, unsa may gamit sa pagkab-it sa tarpaulin nga ang taga Lahug dili man botante sa Talisay?
Daghan ang natakdan kaniadto ni Atan Guardo nga nagpahimo sab og mga lungon ug mga bangko nga dunay iyang pangan.
Bisan si kanhi Mayor Tomas Osmeña nagpahimo sab og mga lungon kaniadto nga may sipra sa iyang pangan.
* * *
Gipasaligan ko niadtong Sabado sa hapon ni Cebu City Police Director, S/Superintendent Santos nga iyang imbistigahon ang isyu batok sa usa ka pulis sa Carbon Police Station nga giakusahan nga naghimas-himas ug makig-date sa 15 anyos nga dalagita.
Miingon si Santos nga dili niya palabyon kining maong isyu kay makadaot kini sa ilang imahin.
Buot siya’ng makig-coordinate sa taga Barangay Busay nga maoy nag-custody sa dalagita aron kuhaan og affidavit.
Maglaom ko nga tinud-on ni Santos kining mga badlungon niya’ng mga sakop.
* * *
Nakaduaw gyud intawon kami’ng mga magsuon didto sa Manlapay, Dalaguete niadtong Domingo sa hapon agi’g paghatag og katapusang respeto sa among uyoan nga mipanaw na nga si “Tiyo Uyan” (Victoriano Suarez Bejagan) kinsa usa sa mga suod kaayo sa among amahan nga si “Boy” o Edilberto Sr.
Kadto maoy ikatulo nakong pagtaak sa bukid sa Manlapay nga maoy utlanan sa Dalaguete ug Badian.
Dili gyud ko malimot sa una nako’ng pagtaak didto sa Manlapay nga anaa pa ko sa grade 6 kay nagbaktas ra mi didto sulod sa unom ka oras gikan sa Casay kay namista uban sa among amahan, mga igsuon ug mga ig-agaw. Nag-abot ang tanang kakapoy, pamaol, kagutom og grabeng uhaw.
Sa ikaduha ug ikatulong higayon, sayon na lang namo’ng gibadlas ang bukid kay may sakyanan naman sukwahi sa karaang panahon nga maglakaw ra gyud.
Lahi na ang Manlapay karon ikomparar sa una nako’ng pagtaak tungod kay daghan na kaayong mga panimay.
Gawas niini, may kaugalingon na’ng parokya ang Manlapay nga mao ang “Our Lady of Consolation Parish” diin ang parish priest mao si Padre Jun Almazol, lumad nga taga Balamban ug nadestino kanhi sa Saint Therese Parish Church sa Lahug.
Pagkanindot paminawon nga dako kaayog papel si “Tiyo Uyan” pagtukod kay gawas nga aktibo, iya pa gyu’ng gi-donate ang yuta nga maoy gibarugan sa simbahan.
Akong mga ig-agaw didto misugilon sab kanako nga sukad duna nay mina, apektado ang ilang mga tinubdan sa tubig.
Gawas niini, akong na-obserbahan nga hinay kaayo ang trabaho sa pagpalapad sa kalsada ug pag-ayo gikan sa Mantalongon paingon sa Manlapay.
Mao nga manawagan ko sa taga Department of Public Works and Highways (DPWH) ug sa mga kontraktor nga unta paspasan nila.
Ako sang ipanawagan sa mga nagtrabaho sa “Paleng-Paleng” nga kinahanglang sirad-an na gyud unta kanang tipas nga kalsada paingon sa bung-aw kay delikado kaayo sa disgrasya niadtong dili suweto sa dalan paingon na ss lungsod.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
