Salins Hulbot
Nagkanayon ang presumptive Republican nominee for president of the United States nga si Donald Trump sa usa ka rally sa Iowa pipila ka buwan na ang milabay, nga “I could stand in the middle of Fifth Avenue and shoot somebody, okay, and I wouldn’t lose any voters, okay?” Unya nidugang pa kini og “It’s, like, incredible.” Ingon niini ka loyal ang mga followers ni Trump.
Samtang sa atoa ang mga hisgut-hisgot kabahin sa mga death squad nga giporma ni Rodrigo “Digong” Duterte wala gyud makatandog sa popularidad sa kandidato. Nagsaka hinuon ang iyang rating sa mga survey. Ug nga karong pipila na lang ka adlaw piniliay na, siya gihapon ang top choice sa mga na-interview nga botante para ilang pilion sa pagka presidente sa atong nasod. Gani si Duterte mismo miangkon nga nakapatay na siyag tulo ka tawo. Ug nga nanganti kini nga hutdon niyag patay ang mga kriminal sa atong nasod.
Si Donald ug Digong puros gianggaan sa mga political analyst og teflon. Ang teflon usa ka chemical nga galamiton sa pang luto para dili kini mataptan og bisag unsa. Sa ato pa, way criticism o black propaganda ang makatandog sa loyalty sa ilang followers.
Kon parehas silag appeal, tungod kini kay puparehas silag kaagi ug parehas silag sitwasyon karon.
Puros sila maayong pagkabutang sa bata pa sila. Milyonaryo ang amahan ni Donald ug gubernador ang amahan ni Digong. Puros sila barumbado ug badlungon. Matud pas silingan ni Trump, “Donald was an anomaly.” Well-behaved kuno ang tanang managsuong Trump apan si Donald sabaan ug palaaway. Matod pas iyang barkada sa grade school, ang “D.T.” dunay duha ka meaning sa ilang panahon — Detention Time ug Donald Trump. Wa ka antos ang iyang ginikanan, gipadala si Trump sa usa ka military school para mabut-an.
Tungod sa pagkabadlungon ni Digong, hapit tanang grado ani 75. Maong gipadala kinis iyang ginikanan sa layong lungsod. Apan hapit kada adlaw makakita man kinig sumbagay didto.
Pagka hamtong na nila, nahimong negosyante si Donald ug nahimong abogado si Digong. Paglabay sa pipila ka tuig, nahimong bilyonaryo si Donald sa New York ug nahimong mayor sa gikahadlokang dakbayan sa Davao si Digong. Napitol ni Digong ang krimen sa iyang lugar samtang mibutho sa lainlaing bahin sa kalibutan ang mga hotel ug resort ni Donald.
Puros sila himalikas ug himabaye. Ug andam mo-cheer ang ilang mga followers matag nila pamalikas. Ang ila usab nga mga asawa ug anak puros all-out ang suporta para kanila. There is no question nga gahaguros ang charisma ning duha. Pero dili lang ang ilang personalidad maoy naghatag nilag kusog ning ilang pag-asdang sa pagka pangulo.
Miapil sila sa lumba sa panahon nga duot nas bukog ang kalagot sa mga tawo sa status quo, sa politics as usual, sa bureaucracy, sa red tape ug sa kahinay sa serbisyo. Wa nay appetite ang mga botante sa mga limpyog nawong nga maayo mosulti.
Kay alang kanila, mas maayo ka mosulti, mas maayo ka molusot pinaagi sa paggamit sa pulong. Dili na kabahin sa kandidatora kining pagdagan ni Donald ug Digong kon dili usa na kini ka rebelyon sa mga sinalikway ug wa matagad batok sa kagamhanan. Matud pas usa ka manunulat: “If we didn’t have a Duterte, then we would have to invent one.”