Kung nagkagubot karon ang grupo ni anhing Jeffrey “Jaguar” Diaz ug nagpasanginlanay sa usag-usa kung kinsa kanila ang mitraydor ngadto sa kapolisan, nagkaguliyang usab ang mga kadagkuan sa PNP nga gitohoang protector sa operation nilang “Jaguar” ug “Barok”.
Si Alvaro “Barok” Alvaro nga mi-surrender ngadto kang Bohol NBI chief Atty. Renan Augustus Oliva mikanta na sab diay kung kinsa ang mga kadagkuan sa (PNP 7) ang miprotihir kanila.
Apan kung kinsa kini sila, butang nga angay’ng itribukar ni NBI 7 director Atty. Jose Justo Yap kay makaluluoy ang mga inosente nga masaypan.
Makadaut kini sa tibuok PNP organization kung tago-an ug paton-ogan ang mga vital information nga gidiga ni Barok.
Labaw na’ng dili makiangayon kung dili mabutyag kung kinsa sa atong mga politiko ang protector sa grupo nila’ng Jaguar.
Mas maayo man gyud nga matribukar ang tanan aron makatubag intawon ang mga nahingtungdan.
Dili gyud malikayan ang mga pagduda nga ang mga protector ra’y nagpapatay nilang Jaguar ug sa ubang mga drug lord aron way bulabog nga mahitabo.
Unsa ni’ng balitaa nga dunay 32 ka mga mayor nga midaug sa milabay’ng eleksiyon tungod sa narcopolitics? Pila man niini ang gikan dinhi sa Sugbo?
Wa maapil sa listahan si Cebu City Mayor-elect Tommy Osmeña nga dali’ng naka-react sa statement ni Oliva nga ang pagpatay kang “Jaguar” usa ka klarong cover-up?
Si President-elect Rodrigo Duterte misaad nga dili niya katulgan kining maong mga mayor ug kung mosukol iyang ipapatay.
Nindot sab ni’ng plano ni Duterte nga iyang palabwan ang offer sa mga drug lord nga buot mopa-liquidate kaniya.
Kung 50 milyones pesos ang offer sa mga drug lord ngadto sa makapatay kaniya, himoong 60 milyones ni Duterte kadtong makapatay og drug lord. Ang Police Offier 1 nga nga makapatay og druglord i-promote niya pagka general.
Ambot lang inig lingkod ni Duterte kung wa bay mahitabong massacre sa tanang mga drug lord nga anaa sa New Billibid Prison ug ipakuot ang tanang drug lord nga anaa sa lain-laing prisohan sa nasud.
Kinsa man tuod kini’ng gipasabot nga drug personality dinhi sa Sugbo nga gitawag nila og sleeping giant?
Wa ni siya’y plano nga mo-surrender?
* * *
Unfair kini’ng mga pagduda ngadto kang Bohol NBI chief Renan Augustus Oliva nga maoy protector sa grupo nila ni anhing Jeffrey “Jaguar” Diaz ug Alvaro Alvaro alyas “Barok.”
Tungod ba lang kay didto mi-surrender kaniya si Barok, madudahan na siya nga protector?
Usa ka daku’ng tarong si Attorney Oliva.
Kining mga tawo nga wa makatilaw nga silay gidangpan sa pinangita sa balaud maoy kiat lang sa pasangil.
Ako nga nakatilaw na niini sama niadtong taga Bohol nga gitohoang miyembro sa Bohol robbery group nga sa akoa mitahan atol sa akong radio program sa dySS makaingon gyud nga dili makiangayon kung dudahan ko nga protector sa maong grupo.
Pananglitan kung dunay mga tawo nga nalambigit sa drugas nga gusto’g kausaban sa kinabuhi nga ari nako motahan, ako na lang balibaran kay mapasanginlan ta’g apil?
Hinuon mas mopili ko nga mapasanginlan kay sa mobalibad niadtong atong mga kaigsuonan nga seryoso’ng mag-bag-o ug motabang na sa tinud-anay nga pakiggubat batok sa illegal nga drugas.