Pwera gaba sab ning klase sa liderato ni Cebu City Mayor Tomas Osmeña nga namawi sa mga patrol cars ug mga armas sa mga pulis nga gipagamit sa Cebu City Hall ngadto sa Cebu City Police Office.
Ang simpleng rason kay gipangrelibohan iyang mga paborito nga mga police officers.
Nagpakita lang gyud ni kung unsa ka arogante si Tomas.
Unsa man gyud diay ang natampo sa mga police officers sa miaging eleksiyon nga miresulta sa kaparutan ni kanhi city mayor Michael Rama?
Unsa kaha kung kuhaon si SPO1 Adonis Dumpit ni PNP Director General Ronald “Bato” Dela Rosa ug dili na tugotan si Dumpit nga himuong personal body guard ni Mr. Osmeña?
Hinuon wa ko magtuo nga birahon ni Bato Dela Rosa si Dumpit kay tabla ra nga ilang gisakyan ang utok-bata ni Osmeña.
Kinsa may pagamiton ni Osmeña sa mga nabawi nga mga armas ug patrol cars?
Magtukod siya’g armory diha sa City Hall or ipagamit sa iyang mga goons?
Akong nahibaw-an gikan kang Supt. Alet Virtucio nga maoy OIC sa Regional Police Community Relation Divisions sa PRO-7 nga sagad diay sa 200 kapin ka mga armas sa City Hall expired na ang lisensiya.
Nagpasabot kini nga puwedeng ipang-confiscate sa Philippine National Police. Apan tungod kay dili mga bastos atong kapolisan, ilang suwatan si Mayor Osmeña ug pahibaw-on nga ipa-renew lang aron dili sila mapugos pagbawi.
* * *
Paeta sa papel sa akong amigo ug among kanhi kauban sa media nga si Mr. Nagiel Bañacia nga maoy nangulo karon sa Cebu City Disaster Risk Reduction and Management Council (CCDRRMC) sa liderato ni Mayor Osmeña.
Ang rason pagpa-recall sa mga ambulance nga na-isyu sa City Hall ngadto sa mga barangay mao nga ilang kompletohon ang mga equipment gawas sa pag-inbentaryo.
Way bulok politika, sumala pa ni Nagiel.
Motuo lang ko ni Nagiel kung nagpabilin siya sa media, pero karon nga nangalagad na siya sa tawo nga sobra sa pagkamadinumtanon, lahi ra gyud.
Nasayod si Nagiel nga “unpredictable” kining mga disgrasya ug trahedya nga gikinahanglan kaayo ang mga ambulance.
Sa mga resiliency and preparedness training and work shop, ipasilsil gyud sa alimpatakan sa mga responders nga 24/7 silang on-standby apil na ang ambulance.
Kung motuman si Nagiel sa iyang amo nga politiko, tabla ra nga gipokpok sa bato iyang kaugalingon ilabina karon nga naglain ang dagan sa panahon kay ting-uwan na ug delikado kaayo ang mga residente ilabina sa mga bukirang barangay.
Unsa may sakyan sa mga pasyente? Balsa?
Kung seryoso gyud si Nagiel nga iyang kompletohan sa mga gamit ang mga ambulance ug inbentaryohon, adtuon niya tag-tagsa uban sa taga General Services Office ug sa iyang mga training staff.
Ilang dalhan didto sa mga kuwang nga equipment ug mopahigayon sila og training sa mga residente alang sa disaster plan gawas sa ilang giingon nga inbentaryo.
* * *
Kadto ra’ng mga leftist (rebelde) ang mosupak nga ibalik pag-mandatory ang ROTC ngadto sa mga tinun-an sa kolehiyo.
Sukad giwagtang ang ROTC, daghan ang nangabayot, nakurakot sa gobyerno, way disiplina ug nahimong mga badlungon sa katilingban.
Mao nga uyon ko ni Presidente Duterte nga ibalik ang ROTC aron daghan nata’ng mahigugmaon sa atong kaugalingong nasod.
Uyon sab si Atty. Fritz Quiñanola ug nangandam na sila si Lt. Col Rodrigo Calcabin Jr ug S/Sgt. Bongbong Galvadores sa 7RCDG sa CENTCOM ug ingon man si Supt. Alet Virtucio sa PNP-7 pagbalik sa ROTC.