1969

Gerard Pareja

Nangamatay karong buwana sila ni Charles Manson ug David Cassidy, mga 70s icons. Ang hinungdan kon nganong inila kaayo ang mass murderer/cult leader nga si Manson ug ang popstar nga si Cassidy, katubod gikan sa nag-una pang dekada. Bisitahon ta ang America ning panahuna.

Maingon ta nga turning point sa American culture ang 1969. Mao kini ang tuig nga namulak ug namatay ang hippie dream ug nga nahimo kining agianan sa bubblegum pop.

Ang tulo ka hinungdan nga misugod og kahinay ang hippie counter culture movement mao ang Woodstock, ang Manson murders ug ang pagsugod pag undang sa Vietnam War.

Gadamgo ang mga hippies nga kon managhugpong sila mausab ang kalibutan kay mapuno kini sa gugma, kalinaw ug pagsinabtanay. Gatuo sila nga kon manglingkud lang ang tanan, manganta, mag marijuana, mag LSD ug uban pa wa nay gubot nga mahitabo. Ug tuod man gatagbo ang tunga sa milyon ka hippies didto sa us aka umahan sa New York, didto sa Woodstock.

Three days of love and music, way liguay. Didto mi climax ilang damgo. Ug pagkahuman niadto nanguli silas ila ug nangita nag panginabuhian. Tingali kon wa mahitabo ang Woodstock, gapabilin unta ang damgo sa usa ka hippie utopia.

Ang mga hippie maoy mga aktibista batok sa gubat sa America ug Vietnam. Niadtong tungora ubayubay na ang mga Amerikanong sundawo ang nangamatay. Mga 400 kanila na kalas niadtong Mayo sa ilang pag asdang niadtong bungtod nga gitawag nilag Hamburger Hill.

Maong sa December niadtong tuiga, mideklarar ang presidente sa America niadto nga si Richard Nixon nga undangon na ang partisipasyon sa America sa panag-away sa North ug South Vietnam.

Nakuhaan og kawsa sa pakigbisog ang hippies kay ang gubat nga ilang giprotestahan padung naman matapus.

Ang mga hippy nagpuyo sa mga commune, diin mag sawo sila sa mga pagkaon ug galamiton. Ang kulto ni Charles Manson nga naila isip the Manson family usa usab ka commune, way kalainan sa mga hippies. Tag-as silag buhok, galago lang ang sinenaan. Mao nga ang makakita kanila motawag nilag hippies. Ug maong dihang gidakup si Charles Manson ug ang iyang mga kauban sa pagpatay sa siyam ka mga binuhat sa mga nagka lainlaing lugar sa California niadtong 1969, nakugang ang tanan. Duna sad diay mass murderer nga hippies nga unta peace, love and music may ilang gisibya.

Niadtong tuiga, misugod sa iyang acting career ang batan-ong si David Cassidy. Pagka 1970, nahimo siyang bida sa musical TV series nga Partridge Family. Ug siya ang nahimong unang superstar sa gitawag nilag bubblegum pop nga ang target audience teenage girls. Si Cassidy ang Justin Bieber sa 70s.

Human mahugno ang damgo sa mga hippy, mibalik pagkabatan-on ang America.
Si Manson namatay sa edad nga 83 ug si Cassidy sa panuigon nga 67.