Pre, kon duna kay makit-ang hitsuraang walker sa Mango, imo sang bangkahan o isuroy una nimo i-check in?” nangutana si Berting kang Loloy.
“Dili intawon, pre, uy,” nagkanayon si Loloy. “Makit-an pa lang tas mga silingan o kauban sa trabaho. Kaming mga minyo, pre, ninja moves ra gyud ning amo.”
* * *
Kining ninja mao ang mga James Bond sa Japan nga misikat pag-15th century. Una kining gituohang mibutho sa 12th century ug nahanaw pagka-17th century. Apan dili susama ni James Bond nga mag-inusara, pundok ang lihok ning mga binayrang ispiya ug killer ning maong nasod.
Tungod tingali kay binayran sila, ubos ang pagtan-aw sa katilingban sa mga ninja. Dili susama sa mga samurai nga gitahod sa mga Hapon.
Human mahanaw ang mga ninja, nahimo silang popular sa imahinasyon sa mga tawo. Gani daw nahimo na man silang super hero nga makalakaw sa tubig ug ma-invisible.
Kini tingaling pagka-invisible maoy hinungdan nga gitawag og ninja moves ang paghimo sa mga kinawatkawat nga kalipay.
* * *
Ang bati nga reputasyon sa mga ninja mao tingali gibasihan ni Duterte sa pagtawag niya sa mga pulis nga mamaligya sa ilang mga nakuhang shabu sa raid og “ninja cops.”
Misaad si Digong nga tagaan niyag dos milyones pesos ang makapasikop og usa ka ninja cop. Nakuyawan ang uban niani kay ubay-ubay raba kuno kining ninja cops sa atoa ug basig mapurdoy ang nasod kay mahutdag pangbayad sa mga nakasikop og ninja cops.
Matud sa akong kaila, kining pag-offer ni Duterte og reward sa mga motabag dakop ning mga kriminal nga pulis usa usab ka ninja move.
* * *
Duna usay iyang ninja moves si Donald Trump. Mao kini ang abtik ug kalit nga panghinol sa mga babaye nga iyang makursunadahan.
Ang nakaparat lang kay nabitik si Ninja Trump sa usa ka recording, ug tungod niani daghan na ang nanggawas nga kababayehan nga niingong biktima sila sa Republican presidential candidate.
Sa pagkakaron, siyam na ka babaye ang mibutho ug miingong naigo sila sa ninja moves ni Donald Trump. Of course being a ninja, limud to the max si Trump.
* * *
“Boss, motuo ka anang ninja ray makapatay ninjo?” pasiaw pa ni Berting kang Loloy.
“Ayaw pagbinuang diha, pre, taga Bohol ra ba akong asawa,” matud pang Loloy.
“Sorry, boss,” nagkanayon si Berting.