Gerard Pareja
Usahay kining bungot magda’g hilas sa mopatubo niani. Kay kon bungoton ka, nagpasabot kini nga wa kay amo nga mobalong kanimo. Ug kon ang tanan sa imong palibut “clean cut,” nagpasabot kini nga wa ka masakop sa “norm.” Lahi ka. Tigas ka. Bungoton ka. Mahimo sab kining tan-awon nga dili ka agresibo nga pagkatawo, taas kag pasensya (o di ba kaha tapulan) kay gipasagdan mo na lang gud ang imong bungot nga mitubo. Relax ra kaayo kas imong kinabuhi. Wa nimo kinahanglana ang modiskarte o mopa-cute.
Usahay sab ang bungot maoy magda’g bug-at. Dihang namarbas ang tanang sakop sa Beatles, Si Paul McCartney ra maoy nagpabangas. Ug tuod man niadtong maong album cover, si McCartney maoy bug-at.
Ug kon batan-on pa ka ug aktibo, kining pagpabungot daw maingon tang padugang sa pusta. Sama sa gihimong pagpalabong sa bungot ni James Harden sa Houston Rockets (sa NBA). Tungod sa iyang bungot, gianggaan si Harden og “old man.” Kon sa ato pa, “manoy.” Ug kay daghan man mosunod sa manoy, daghan usab nga NBA players karon nga nikopya sa bungot ni Harden.
Apan sa Xinjiang, China, nangusog ang kagamhanan sa maong nasud pagpaundang sa mga molupyo didto paggamit og buronda (veil) ug ingon man ang pagpataas sa bungot. Kining maong lakang ilang gihimo batok sa mga kalihokan sa radical Islam.
Xinjiang, diin ang kadaghanan sa mga nanimuyo mga muslim Uyghurs, dili mga Insik; kon tan-awon kay daghan kanila ang may Indo-European og kaliwat. Duna usay pagka-Turkish ang ilang sinultian.
Alang sa ilang kagamhanan, ang pagsul-ob og buronda ug ang pagpataas sa bungot usa ka kampanya alang sa radical Islam nga tinuohan.
Gawas sa pagdili sa bungot ug buronda, gidid-an usab sa China ang paggamit og mga kahadlukan nga pangan, ang pagpasa og mga basahon ug video nga nag-promote sa radical Islam, ang pagbabag sa family planning ug ingon man ang paglikay sa media program sa gobyerno nga mogawas sa ilang state run radio ug TV stations.
Bright gyud ning China, da. Kinsa goy gadahom nga weapon of mass destruction diay ning bungot?
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
